وبلىستىق ىشكى ىستەر دەپارتامەنتىنىڭ باستىعى, گەنەرال-مايور بەرىك ءبىلالوۆ جۋىردا قىزىلجار اۋداندىق ىشكى ىستەر ءبولىمىنىڭ ۋچاسكەلىك ينسپەكتورى ازات مۇحامەديننىڭ ەرلىگىن جەكە قۇرامعا ۇلگى ەتىپ, وعان ماراپات كورسەتتى. ال ازاتقا قانداي قيىن-قىستاۋ كەزدە دە شاپشاڭ شەشىم قابىلداۋدى, وزگەلەرگە كومەك قولىن سوزۋدى ءومىردىڭ ءوزى ۇيرەتتى. شالعايداعى قازاق اۋىلىندا تۋىپ-وسكەن ول كۇشتىك قۇرىلىمدا قىزمەت ەتەمىن دەپ ويلاماعان. تاۋەلسىزدىكتىڭ ەلەڭ-الاڭ شاعىندا پەتروپاۆل پەداگوگيكالىق ينستيتۋتىن ءبىتىرىپ, تاريح ءپانى ماماندىعىن العانىمەن جۇمىس تاپپاي قاتتى قينالعان. سودان سيىردىڭ تىلىندەي ديپلومدى ساندىققا سالعان كۇيى الدەكىمدەردىڭ ءجون سىلتەۋىمەن رەسەيدىڭ ەكاتەرينبۋرگ قالاسىنان ءبىر-اق شىققان. مۇندا ايرىقشا ماقساتتاعى ميليتسيا بولىمىنە ورنالاسۋىنا بالا كەزدەن جۇيەلى تۇردە اينالىسقان سپورتتىڭ, ۇستانعان سالاماتتى ءومىر سالتىنىڭ كوپ پايداسى ءتيدى. شەتتە جۇرگەن ءتورت جىل ىشىندە شىنىعىپ, شىمىرلاندى. ارمەنيا, گرۋزيا, چەشەنستان سەكىلدى «ىستىق نۇكتەلەردە» بولىپ, تاتۋ-ءتاتتى بىرلىككە ەشتەڭە جەتپەيتىنىن ۇعىندى. مول تاجىريبە جيناقتاپ, ەلگە ورالعاننان كەيىن وبلىستىق ىشكى ىستەر باسقارماسىنا قىزمەتكە تۇردى. ءبىراز جىل «ارلان» ارنايى ماقساتتاعى توپقا, «كۇزەت» مەكەمەسىنىڭ كادر بولىمىنە جەتەكشىلىك ەتتى. تەمىردەي ءتارتىپتى سۇيەتىن, وزگەلەردەن دە وسى قاسيەتتى تالاپ ەتەتىن ازات وزىنە جۇكتەلگەن مىندەتتەردى ءاردايىم جاۋاپكەرشىلىكپەن اتقارىپ, پودپولكوۆنيك شەنىنە دەيىن كوتەرىلدى.
ال مىنا وقىس وقيعاعا ويدا-جوقتا كەزىكتى. كولىگىن اۆتوتۇراققا قويىپ, تۇنگى تازا اۋامەن كەۋدە كەرە تىنىستاپ كەلە جاتقاندا قىراعى كوزىنە توعىز قاباتتى ءۇيدىڭ ءبىرىنشى قاباتىنان بۋداقتاي شىققان قويۋ ءتۇتىن شالىندى. «ءورت!» دەگەن سۋماڭداعان سۋىق وي تۇلابويىن قارىپ جىبەرگەندەي بولدى. العا قاراي جانۇشىرا ۇمتىلىپ, جولاي كەزدەسكەن ادامدارعا قۇتقارۋ قىزمەتىنە تەلەفون سوعۋدى ايتىپ ۇلگەردى. تەمىر ەسىك تارس جابىق. ۋاقىت ۇتتىرماي, پاتەرگە بالكون ارقىلى كىرۋگە بەل بايلاعانىمەن, ەكى مەتر بيىكتىككە ءوزدىگىنەن كوتەرىلۋ مۇمكىن بولمادى. تىعىرىققا تىرەلىپ, نە ىستەرىن ءبىلمەي تۇرعاندا قاسىنان وتە بەرگەن ءبىر ءجاسوسپىرىمدى كورىپ, كومەككە شاقىردى. ونىڭ دەمەۋىمەن بالكونعا ىرعىپ ءتۇسىپ, ىشكە ەنگەندە كوك ءتۇتىن اراسىنان ەسسىز جاتقان ادامنىڭ سۇلباسى كورىندى. ونى قاۋىپسىز جەرگە شىعارىپ, ۇيگە قايتا ەندى. ونداعى ويى – تاعى بىرەۋلەر قالىپ قويمادى ما دەگەن كۇدىك. بولمەلەردەن وتقا ورانعان زاتتاردى دالاعا شىعارىپ, كومپيۋتەر سىمىن توكتان ايىرا بەرگەندە قولقانى قاپقان اششى تۇتىننەن باسى اينالىپ, السىرەي باستاعانىن سەزدى. ايتەۋىر بالكون ارقىلى سىرتقا شىعىپ ۇلگەردى. ۇرىمتال تۇستا قيىننان قيىستىرىپ جول تاۋىپ, قىزىل ءتىلى سۋماڭداعان ورتكە قارسى ەت قىزۋىمەن ارالاسىپ كەتكەن ازات 50 جاستاعى ونەر يەسىن اجال تىرناعىنان اراشالاپ قالعانىن بىلگەن جوق. قاس قاعىم ۋاقىت ىشىندە ءابجىل قيمىلداماعاندا ونىڭ ارتى ۇلكەن وكىنىشكە ۇرىندىرىپ, وپىق جەگىزەرى ابدەن ىقتيمال ەدى.
ازات – وتباسىندا ۇلگىلى اكە, ورنىقتى وتاعاسى. جان-جارى گۇلايىم ەكەۋى التىن اسىقتاي ەكى قىز ءوسىرىپ وتىر. 47 جاستاعى ازامات قويان-قولتىق ۇرىستان سپورت شەبەرلىگىنە كانديدات. تالاي رەت ايماقتىق جارىستارعا قاتىسىپ, جۇلدەگەر اتانعان. قۇرىش بولاتتاي شىنىعۋىنا, ادامگەرشىلىك اسىل قاسيەتتەردىڭ قالىپتاسۋىنا دەسانتتار ۆزۆودى قۇرامىندا ازاماتتىق بورىشىن وتەۋى زور ىقپالىن تيگىزگەنىن بەيبىت كۇننىڭ باتىرى جاسىرمايدى. ءيا, ەرلىك ۋاقىت, جاس تالعامايدى. انتقا ادال, سەرتكە بەرىك ازاتتىڭ بۇل ارەكەتى جاستار ءۇشىن ءتالىم-تاربيەلىك ماڭىزى زور ونەگە بولارى انىق.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى