بۇزىلمايتىن كولىك

نەگە اپاتقا ۇشىرادى؟ ەڭ قاۋىپسىز دەگەن «Tesla Motors» كولىكتەرىنىڭ ءوزى اپاتقا ۇشىراي باستادى. جاقىندا اقش-تىڭ مونتانا شتاتىندا وسىمەن ءۇشىنشى اپات تىركەلگەننەن كەيىن كومپانيا وكىلدەرى تۇسىنىكتەمە بەرۋگە ءماجبۇر بولدى. «ءتۇن ءىشى بولعانىنا قاراماستان, جۇرگىزۋشى كولىك ءرولىن ۇستاماي, جىبەرە سالعان. بۇلاي جاساۋعا بولمايدى, جۇرگىزۋشى قاراڭعى ۋاقىتتا جانە ناشار جولدارمەن جۇرگەندە ءرولدى ۇستاپ وتىرۋى ءتيىس. اۆتوپيلوتتى تەك كەڭ جولداردا, كۇندىزگى ۋاقىتتا قولدانعان ءجون. ەكىنشىدەن, كولىك تىزگىنىندەگى قىتاي ازاماتى اپات الدىندا باسقارۋ جۇيەسى بىرنەشە مارتە ەسكەرتۋ جاساعانىن ايتىپ وتىر. الايدا, جۇرگىزۋشى اعىلشىنشا بىلمەيتىندىكتەن, ونى تۇسىنبەگەن», دەپ حابارلادى كومپانيا وكىلدەرى. «Tesla Motors» بيىلعى جىلى 90 مىڭ ەلەكتر كولىگىن ساتۋدى جوسپارلاعان بولاتىن. الايدا, بىرىنەن كەيىن ءبىرى بولعان ءۇش اپاتتان كەيىن ساتىلىم تومەندەپ كەتىپتى. Bloomberg اگەنتتىگىنىڭ حابارلاۋىنشا, كومپانيا جىل سوڭىنا دەيىن 79 مىڭنان ارتىق كولىك ساتا المايدى. ايبىن اقپاتشا