6 جاسار اسپازدىڭ تابىسى – 2 مىڭ دوللار
ءۇندىنىڭ نيحال رادج ەسىمدى 6 جاسار بالاسى ءوز روليكتەرىنىڭ ءبىرىن Facebook-تە پايدالانۋعا رۇقسات بەرگەنى ءۇشىن $2 مىڭ دوللار كولەمىندە اقشا الدى.
جۇرتقا كيچا دەگەن نيكپەن كوبىرەك بەلگىلى بولعان اسپاز بالا YouTube-تا ءوزىنىڭ جەكە جازباسىن جۇرگىزەدى. ول اس دايىنداۋمەن 4 جاسىنان باستاپ اينالىسقان. سەبەبى, ءوزى گۋرماندار وتباسىنان شىققان ەكەن.
46 جاستاعى البيون ازاماتى اقىر زامانعا دايىن وتىر
بريتانيانىڭ 46 جاستاعى يان كۋلتحارد ەسىمدى ازاماتى اقىر زامانعا بار ىنتى-شىنتىسىمەن ازىرلەنىپ جاتقان كورىنەدى. ونىڭ ەسەبى بويىنشا, ەكونوميكالىق اپات الداعى 20 جىلدىڭ ىشىندە كەلىپ جەتەدى.
بۇرىنعى اسكەري قىزمەتكەر وسى كەزگە دەيىن شوتلانديا, سولتۇستىك انگليا جانە ۋەلس جەرلەرىنەن اپوكاليپسيس ورناي قالعان جاعدايدا تۇراتىن قونىس دايىنداپ قويىپتى. ولاردىڭ بارلىعىندا كەمىندە 10 كۇنگە جەتەتىن تاماق پەن سۋدىڭ قورلارى بار.
مۇزدى مۇحيت ۇستىندە مۋزىكا وينادى
يتاليانىڭ ليۋدوۆيكو ەيناۋدي اتتى كومپوزيتورى ءارى ءپيانيسى سولتۇستىك مۇزدى مۇحيتتىڭ ۇستىندە ءجۇزۋشى پلاتفورمادا وتىرىپ, ءوزىنىڭ جەكە شىعارماسىن ويناپ شىقتى.
مۋزىكانت كوپتەن بەرگى بۇل ارمانىن نورۆەگيانىڭ شپيتسبەرگەن ارالىنداعى Wahlenbergbreen مۇزدىعىنىڭ الدىڭعى بولىگىندە جۇزەگە اسىرعان. ول مۇندا كەزىندە كۇللى الەمنەن 8 ميلليون ادامنىڭ داۋسىن جيناعان اركتيكانى قورعاۋ تۋرالى «اركتيكا ەلەگياسى» اتتى تۋىندىسىن ورىنداعان.
تويعا كەلگەن توبەتتى تاپ-تۇيناقتاي ەتىپ كيىندىردى
شوتلانديانىڭ ءبىر تۇرعىنى سۇيىكتى توبەتىن وزگە بىرەۋلەردىڭ ۇيلەنۋ تويلارىنا سالتاناتقا ساي كيىندىرىپ الىپ بارىپ, ءوزىنىڭ جانىنا وتىرعىزىپ قويدى.
كيلت پەن جەيدە كيىنگەن ءيتتىڭ موينىندا كوبەلەك-گالستۋك كورىنىپ تۇر. «جاقىندا مەنىڭ ءوزىم دە ۇيلەنەمىن. سوندا توبەتىمسىز توي سۋرەتتەرىن تۇسىرتە الماس ەدىم», دەپ جازىپتى Reddit الەۋمەتتىك جەلىسىنە YellyG دەگەن نيگى بار پايدالانۋشى. وسى كادر Imgur جەلىسىندە پايدا بولعان ەكى كۇننىڭ ىشىندە ونى 1,4 ميلليون ادام قاراپ ۇلگەرگەن.
قارىنداشتان ءپىل ءۇيىرىن سۇرمەلەپ شىعارعان
اقش-تىڭ سيندي چينن دەگەن سۋرەتشى ايەلى ونەردىڭ دالدىكتى كوزدەيتىن مينيماليزم دەگەن ءتۇرى بويىنشا قارىنداشتاردان سۇرمەلەپ, بىرنەشە ءپىلدىڭ سۇلباسىن جاساپ شىققان.
سۋرەتشى «سەرگەنتيتي پىلدەرى» دەگەن اتاۋ بەرگەن بۇل جوبادا وسى جانۋاردىڭ ءبىر ءۇيىرى كورىنىس بەرەدى. تاپسىرىس بويىنشا جاسالعان ءمۇسىن كومپوزيتسياسىندا سيندي بىرەۋدىڭ ورنىنا ءۇش ءپىل قاشاپ شىعارعان. ءاربىر ءپىل ءبىر قارىنداشتان الىنعان. بىراق ولار سوڭىنان ءبىر-بىرىمەن بىرىگىپ كەتكەن. بۇل ومىرگە ونەردىڭ وسىنداي ءبىر ءتۇرى كەلگەنىن كورسەتەدى.
72-دەگى ميك دجاگگەر سەگىزىنشى بالاعا اكە اتاندى
اعىلشىننىڭ بەلگىلى روك-مۋزىكانتى, The Rolling Stones روك-توبىنىڭ ۆوكاليسى ميك دجاگگەر جاسى 72-گە كەلگەندە سەگىزىنشى بالاسىنا اكە اتانعالى وتىر.
مۋزىكانتتىڭ وكىلى 29 جاستاعى بالەرينا مەلاني حامريكتىڭ دجاگگەردەن ەكىقابات ەكەنىن راستاپ بەردى. بىراق قىز روك-جۇلدىزبەن بىرگە تۇرۋ ءۇشىن لوس-اندجەلەسكە نەمەسە كوننەكتيكۋتكە قونىس اۋدارۋعا نيەتتى بولىپ وتىرعان جوق. ال دجاگگەردىڭ بۇعان دەيىن ەكى ايەلى بولعان. بۇلاردان باسقا تاعى ەكى ايەلدەن بالا سۇيگەن.
فين پرەمەرى موڭعولياعا ۇشاقتى ءوزى ايداپ باردى
فينليانديانىڭ پرەمەر-ءمينيسترى يۋحا سيپيليا موڭعوليادا ءوتىپ جاتقان ازيا-ەۋروپا (اسەم) سامميتىنە قاتىسۋ ءۇشىن جالعا العان ۇشاعىن ءوزى باسقارىپ باردى.
پرەمەر-مينيستر كەڭسەسىندەگىلەر سۋومي ۇكىمەتى باسشىسىنىڭ ۇشاقتى ءوز قالتاسىنان شىعارعان اقشاعا جالداپ بارعانىن دا جەتكىزدى. سويتسەك, پرەمەر بۇعان دەيىن دە بىرنەشە قىزمەتتىك ءىسساپارىنا اۋە كەمەسىن ءوزى باسقارىپ بارعان ەكەن.
اقپارات اگەنتتىكتەرىنىڭ ماتەريالدارى نەگىزىندە دايىندالدى