[caption id="attachment_49125" align="aligncenter" width="560"] فوتو: «قازاقستان بارىسى» قازاق كۇرەسىن دامىتۋ قورى[/caption]
بۇگىن بۇكىلالەمدىك دوپينگكە قارسى اگەنتتىگىنىڭ (ۆادا) قازاق كۇرەسىنەن «قازاقستان بارىسى» رەسپۋبليكالىق تۋرنيرىنە قاتىساتىن ءتورت بالۋانعا قاتىستى شەشىمى بەلگىلى بولدى. بالۋاندار اناليزدىك سىنامالارىنان تىيىم سالىنعان مەلدوني سۋبستانتسياسىنىڭ تابىلۋىنا بايلانىستى ءتول كۇرەسىمىزدەن وتەتىن بارلىق جارىستاردان ۋاقىتشا شەتتەتىلگەن بولاتىن.
«بۇكىلالەمدىك دوپينگكە قارسى اگەنتتىگىنىڭ ۇسىنىسى نەگىزىندە دوپينگكە قارسى ۇلتتىق ورتالىعى تارتىپتىك كوميسسياسىنىڭ شەشىمىنە سايكەس, مەرەكە تۇراشەۆ (اقمولا وبلىسى), سامير مامەدوۆ (پاۆلودار وبلىسى) پەن ايبەك نۇعىماروۆتىڭ اناليزدەرىندەگى مەلدونيدىڭ كونتسەنتراتسياسى 1 مكگ/مل-دەن از بولىپ شىقتى», دەپ حابارلادى «قازاقستان بارىسى» قازاق كۇرەسىن دامىتۋ قورىنىڭ ءباسپاسوز قىزمەتى.
وسىعان بايلانىستى قازاق كۇرەسى فەدەراتسياسى مەن «قازاقستان بارىسى» قازاق كۇرەسىن دامىتۋ قورى سپورتشىلارعا ساتتىلىك تىلەپ, «قازاقستان بارىسى» جوباسى مەن بالۋاندارعا قولداۋ كورسەتكەن جانكۇيەرلەرگە العىس بىلدىرەدى.
سونىمەن قاتار, بۇكىلالەمدىك دوپينگكە قارسى اگەنتتىگى دوپينگتىك سىناما اناليزىندە تىيىم سالىنعان مەلدوني سۋبستانتسياسىنىڭ جوعارى كونتسەنتراتسياسى تابىلعان بالۋان الەكساندر كاساچەۆتىڭ (الماتى وبلىسى) ديسكۆاليفيكاتسيالىق مەرزىمىنە قاتىستى شەشىمىن شىعاراتىن بولادى.
ناتيجەسىندە, بيىلعى جىلعى «قازاقستان بارىسى» تۋرنيرىنە مەرەكە تۇراشەۆ, سامير مامەدوۆ جانە ايبەك نۇعىماروۆتى قوسا العاندا, 33 بالۋان قاتىسادى.
1 شىلدە كۇنى ساعات 19:00-دە «حان-شاتىر» ويىن ساۋىق كەشەنىندە قازاق كۇرەسىنەن VI «قازاقستان بارىسى» رەسپۋبليكالىق ءتۋرنيرىنىڭ سالتاناتتى سالماق ولشەۋ ءراسىمى وتەدى. بۇدان كەيىن بالۋاندار جاتتىعۋلارى مەن تۋرنيرگە دايىندىعىن جالعاستىرادى.
«قازاقستان بارىسى» ءتۋرنيرىنىڭ فينالى 3 شىلدە كۇنى استانا قالاسىندا ساعات 12:00-دە «سارىارقا» رەسپۋبليكالىق ۆەلوترەگىندە وتكىزىلەدى. بيلەتتەر استانا قالاسىنىڭ «مەلومان» دۇكەندەر جەلىسىندە, «كەرۋەن», «حان-شاتىر», «مەگا», «سارىارقا» ويىن-ساۋىق كەشەندەرىندە, كونگرەسس-حولل, My Town ي «جاستار» سارايىنىڭ كاسسالارىندا ساتىلادى. تۋرنيرگە كەلگەن كورەرمەندەر اراسىندا JAC S3 اۆتوكولىگى ويناتىلادى. بيلەت بويىنشا اقپاراتتى +7701 1004344 تەلەفون ارقىلى بىلۋگە بولادى. بيلەتتەردىڭ باعاسى: 1000, 2000, 5000 تەڭگە.
قازاق كۇرەسى فەدەراتسياسى اتقارۋ كوميتەتىنىڭ مۇشەسى تاستانبەك ەسەنتاەۆ 21 ماۋسىم كۇنى وتكەن ءباسپاسوز-ءماسليحاتىندا دوپينگكە قارسى ۇلتتىق ورتالىعىنىڭ شەشىمىنە سايكەس, مەرەكە تۇراشەۆ (اقمولا وبلىسى), الەكساندر كاساچەۆ (الماتى وبلىسى), سامير مامەدوۆ (پاۆلودار وبلىسى) پەن ايبەك نۇعىماروۆتىڭ (شىعىس قازاقستان وبلىسى) اناليزدىك سىنامالارىنان تىيىم سالىنعان مەلدوني سۋبستانتسياسىنىڭ تابىلۋىنا بايلانىستى اتالعان بالۋاندار قازاق كۇرەسىنەن ۇيىمداستىرىلاتىن بارلىق جارىستاردان, سونىڭ ىشىندە بيىلعى جىلعى «قازاقستان بارىسى» ءتۋرنيرىنىڭ فينالدىق سىنىنان دا زەرتتەۋ اياقتالعانعا دەيىن ۋاقىتشا شەتتەتىلەتىندىگىن حابارلاعان بولاتىن. وسى بالۋانداردى جارىستارعا جىبەرۋ نەمەسە ناقتى ءبىر ۋاقىتقا جارىستاردان شەتتەتۋ تۋرالى سوڭعى شەشىمدى بۇكىلالەمدىك دوپينگكە قارسى اگەنتتىگىنىڭ (ۆادا) قورىتىندىسىن العاننان سوڭ «دوپينگكە قارسى ۇلتتىق ورتالىعى» رەسپۋبليكالىق مەملەكەتتىك مەكەمەسىنىڭ تارتىپتىك كوميسسياسى قابىلدايتىن بولادى دەگەن ەدى.
داستان كەنجالين