[caption id="attachment_49112" align="aligncenter" width="560"] 24.kz[/caption]
24.kz تەلەارناسىنىڭ حابارلاۋىنشا, ىستامبۇلداعى اەروپورتتا بولعان جويقىن جارىلىستان 36 ادام قازا تاۋىپ, 100-دەن استامى ءارتۇرلى دەڭگەيدە جاراقات العان. وقيعا ورتاسىنا كەلگەن قالا گۋبەرناتورى ۆاسيپ شاحين تەررورلىق اكتىنى ءۇش جانكەشتى ۇيىمداستىرعانىن مالىمدەدى.
جارىلىس اەروپورتتىڭ حالىقارالىق تەرمينالى مەن اۆتوتۇراعىندا ورىن العان. بەلگىلى بولعانداي, لاڭكەستەر تەررورلىق ارەكەتتى عيمارات ىشىندە جاساماق بولعان. الايدا, پوليتسەيلەر ولاردىڭ جولدارىن دەر كەزىندە كەسكەن. كۋاگەرلەردىڭ ايتۋىنشا, جانكەشتىلەر جارىلعىش زاتتى ىسكە قوسپاس بۇرىن پوليتسياعا اۆتوماتتان وق جاۋدىرىپ, تاباندى تۇردە قارسىلىق كورسەتكەن.
لاڭكەستىك وقيعادان سوڭ اتاتۇرىك اەروپورتىندا ۇشاقتاردىڭ ۇشىپ-قونۋى ۋاقىتشا توقتاتىلىپ, قاۋىپسىزدىك شارالارى كۇشەيتىلدى. ال باعىتتىق كەستەگە سايكەس ۇشىپ كەلەتىن رەيستەر بولسا, قالانىڭ ەكىنشى حالىقارالىق اەروپورتىنا جىبەرىلۋدە.
ايتا كەتەيىك, جارىلىستان جاراقات العان ادامداردى اۋرۋحاناعا جەتكىزۋ ءۇشىن 60-قا جۋىق جەدەل جاردەم كولىگى جۇمىلدىرىلىپ, ءتيىستى مەديتسينالىق كومەك كورسەتىلدى.
بۇگىنگى تاڭدا ەلىمىزدىڭ ىستامبۇل قالاسىنداعى باس كونسۋلدىعى زارداپ شەككەندەردىڭ قاتارىندا قازاقستان ازاماتتارىنىڭ بار-جوعىن انىقتاپ جاتىر.
تالعات رايىمبەك.