قازاقستان پرەزيدەنتى نۇرسۇلتان نازارباەۆ وزبەكستان رەسپۋبليكاسىنا جۇمىس ساپارىمەن كەلدى,
دەپ حابارلادى پرەزيدەنتتىڭ ءباسپاسوز قىزمەتى.
مەملەكەت باسشىسى تاشكەنتكە شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ وتىرىسىنا قاتىسۋ ءۇشىن كەلدى. سونداي-اق, ساپار اياسىندا شەتەل مەملەكەتتەرى باسشىلارىمەن بىرقاتار ەكىجاقتى كەزدەسۋلەر وتكىزۋ جوسپارلانعان مەملەكەت باسشىسى نۇرسۇلتان نازارباەۆ اۋعانستان يسلام رەسپۋبليكاسىنىڭ پرەزيدەنتى موحامماد اشراف عانيمەن كەزدەستى. كەزدەسۋ بارىسىندا مەملەكەتتەر باسشىلارى ەكىجاقتى ءوزارا ءىس-قيمىلدىڭ نەگىزگى ماسەلەلەرىن, ونىڭ ىشىندە ساۋدا-ەكونوميكا سالاسىنداعى ءوزارا ءتيىمدى ىنتىماقتاستىق اياسىن كەڭەيتۋ پەرسپەكتيۆالارىن تالقىلادى. بۇدان بولەك, ەكى ەل باسشىلارى وڭىرلىك جانە حالىقارالىق كۇن تارتىبىندەگى بىرقاتار وزەكتى جايتتار جونىندە پىكىر الماستى. نۇرسۇلتان نازارباەۆ مۇسىلماندار ءۇشىن قاسيەتتى رامازان ايىنداعى بۇل كەزدەسۋدىڭ ماڭىزدىلىعىن اتاپ ءوتتى. – ءسىزدىڭ استاناعا ساپارىڭىزدىڭ قورىتىندىسى بويىنشا بىرقاتار ماڭىزدى كەلىسىمدەر جاسالدى. قول جەتكىزىلگەن ۋاعدالاستىقتار اياسىندا قازاقستان ءسىزدىڭ ەلگە استىق جەتكىزەدى. سونىمەن قاتار, وسى جىلى كابۋلدا ۇكىمەتارالىق كوميسسيانىڭ وتىرىسى بولادى. وندا ەلدەرىمىزدىڭ ەكونوميكالىق ىنتىماقتاستىعىن ودان ءارى نىعايتۋ جولدارى قاراستىرىلادى, – دەدى قازاقستان پرەزيدەنتى. م.عاني نۇرسۇلتان نازارباەۆتى الدا كەلە جاتقان ورازا ايت مەرەكەسىمەن قۇتتىقتادى. – قازاقستان اۋعانستاننىڭ ماڭىزدى ساۋدا سەرىكتەسى بولىپ سانالادى. ءبىز دە ۇكىمەتارالىق كوميسسيانىڭ الداعى وتىرىسىنان زور ءۇمىت كۇتەمىز, – دەدى اۋعانستان باسشىسى. ءلايلا ەدىلقىزى, «ەگەمەن قازاقستان» – تاشكەنتتەن