اتاقتى رەسەيلىك فۋتبولشى قازاق ءتىلىن ۇيرەنىپ ءجۇر
قازىر الماتىنىڭ «قايراتى» ساپىندا ويناپ جۇرگەن رەسەي قۇراماسىنىڭ بۇرىنعى شابۋىلشىسى اندرەي ارشاۆين بۇل كوماندادان كەتكەننەن كەيىن فۋتبولشىلىق مانسابىنا نۇكتە قوياتىن ويى بارىن جەتكىزدى. ول بيىلعى قىستا ەكىجاقتى كەلىسىممەن كراسنوداردىڭ «كۋبانىمەن» اراداعى كەلىسىمشارتىن ۇزگەن بولاتىن. ناۋرىز ايىندا ول «1+1» سحەماسى بويىنشا «قايراتتىڭ» ويىنشىسى اتاندى.
الماتىلىق كلۋبتان كەيىن فۋتبولشىلىق مانسابىن توقتاتۋ ىقتيمالدىلىعى تۋرالى قويىلعان سۇراققا فۋتبولشى: «نەگىزى, سولاي بولاتىن شىعار», دەپ جاۋاپ بەرگەن. 35 جاستاعى سپورتشى سونداي-اق قازاق ءتىلىن ۇيرەنگىسى كەلەتىن-كەلمەيتىنى تۋرالى سۇراققا دا جاۋاپ قايتارىپتى. «مەن ۇيرەنىپ تە جاتىرمىن. شىن مانىندە ءبىراز سوزدەردى بىلەمىن. مىسالى, قار دەگەنىمىز – سنەگ, ال ورتالىق – تسەنتر. قازاق ءتىلى – مەن ءۇشىن قيىن ءتىل, بىراق ۋاقىت وتە كەلە تىم بولماسا ول تىلدە جۇرتتىڭ نە ايتىپ جاتقانىن ۇعاتىن حالگە جەتە الاتىن شىعارمىن دەپ ويلايمىن», – دەدى ارشاۆين.
بۇدان بۇرىن اندرەي ارشاۆين سانكت-پەتەربۋرگتىڭ «زەنيتى» (1999-2008, 2012, 2013-2015) مەن لوندوننىڭ «ارسەنالىندا» (2009-2013) ونەر كورسەتكەن. ول «زەنيتتىڭ» قۇرامىندا رەسەيدىڭ ءۇش دۇركىن چەمپيونى اتاندى, ەكى رەت ءتۋرنيردىڭ كۇمىس مەدالىنىڭ يەگەرى بولدى, ءبىر-ءبىر رەتتەن ۋەفا كۋبوگى مەن سۋپەركۋبوگىن, رەسەي سۋپەركۋبوگى مەن پرەمەر-ليگا كۋبوگىن جەڭىپ الدى. 2002-2012 جىلدارى رەسەي قۇراماسى ساپىندا حاۆبەك رەتىندە 75 ماتچ ويناپ, 17 گول سالدى. كوماندانىڭ كاپيتانى دارەجەسىندە 2008 جىلى ەۋروپا چەمپيوناتىندا قولا مەدالعا قول جەتكىزدى.
دامير قوجامقۇل