ەلباسى تاپسىرماسىنا وراي قازىرگى تاڭدا زاڭ ۇستەمدىگىن قامتاماسىز ەتۋ باعىتىندا كوپتەگەن ءىس-شارالار قولعا الىنۋدا. ال زاڭنىڭ ۇستەمدىگى سوتتار جۇمىسىمەن تىكەلەي بايلانىستى. وسىعان وراي كەشە استانا قالاسى مامانداندىرىلعان اۋدانارالىق ەكونوميكالىق سوتىندا «باق-پەن ءوزارا ءىس-قيمىل» دەگەن تاقىرىپتا دوڭگەلەك ۇستەل ءوتتى.
ءسوز جانە بۇقارالىق اقپارات قۇرالدارىنىڭ ەركىندىگى ادامنىڭ نەگىزگى قۇقىقتارىنا جاتاتىندىعىن ەرەكشە ايتا كەتكەن ورىندى. قوعامنىڭ دەموكراتيالىق دامۋىنىڭ اتريبۋتتارى بولىپ تابىلاتىن ءسوز جانە وي ەركىندىگى ازاماتتاردىڭ اقپاراتقا قولجەتىمدىگىن, پىكىر الماسا الۋىن جانە ويىن ەركىن بىلدىرە الۋىمەن ۇشتاسىپ جاتىر. وسى تۇرعىدان كەلگەندە بۇقارالىق اقپارات قۇرالدارى مەن سوتتار اراسىنداعى ءوزارا ءىس-قيمىل ەرەكشە مانگە يە. 2016 جىلدىڭ ساۋىرىندە جوعارعى سوت توراعاسىنىڭ تاپسىرماسىمەن سوتتاردىڭ بۇقارالىق اقپارات قۇرالدارىمەن ءوزارا ءىس-قيمىل تۇجىرىمى قابىلدانۋى دا سوندىقتان.
اتالعان تۇجىرىم ەلباسىنىڭ تاپسىرماسىنا وراي سوت جۇيەسىن جەتىلدىرۋگە باعىتتالعان. استانا قالاسى مامانداندىرىلعان اۋدانارالىق ەكونوميكالىق سوتىنىڭ سۋدياسى نەللي سيتنيكوۆانىڭ اتاپ وتكەنىندەي, سوتتار جۇمىسىن كورسەتۋدە بۇقارالىق اقپارات قۇرالدارى ماڭىزدى ءرول اتقارادى. ويتكەنى, سوتتار تۋرالى پىكىر وسى باسىلىم بەتتەرىندەگى اقپاراتتارعا قاراي قالىپتاسادى. ارىپتەسىنىڭ ويىن جالعاستىرعان سۋديا ايگۇل جامانساريەۆا سوتتار جۇمىسىنىڭ ساپاسى مەن العا قويعان مىندەتتەرى جونىندەگى بۇقارالىق اقپارات قۇرالدارىنىڭ پىكىرى ماڭىزدى ەكەنىن ەرەكشە اتادى. ونىڭ ۇستىنە ازاماتتاردىڭ قۇقىقتارىن, بوستاندىقتارىن جانە زاڭدى مۇددەلەرىن قورعاۋ باعىتىنداعى جۇمىس حالىقتىڭ قۇقىقتىق اعارتىلۋى قاجەتتىگىمەن ۇشتاسىپ جاتىر.
سوتتار تۋرالى اقپاراتتار قولجەتىمدى بولعان سايىن قاراپايىم تۇرعىنداردىڭ سوت پروتسەسىنە دەگەن سەنىمى دە دۇرىس باعىتتا قالىپتاسادى. ەڭ باستىسى اتالعان وتىرىستا مەملەكەتتىك بيلىك ورگاندارى مەن ازاماتتىق قوعام قۇرىلىمدارىنىڭ ءوزارا اشىق ىنتىماقتاستىعىندا سوتتاردىڭ شەشىم قابىلداۋدا باق وكىلدەرىن ويعا قالدىرمايتىنداي تەتىگىن قالىپتاستىرۋ قاجەتتىگى ەرەكشە اتالدى.
اسقار تۇراپباي ۇلى,
«ەگەمەن قازاقستان»