تاياۋدا يليا ءيليننىڭ لوندون-2012 وليمپياداسى كەزىندە رۇقسات ەتىلمەگەن ەسىرتكى پايدالانعانى جونىندە دوپينگ-سىنامادا انىقتالدى. سونىمەن قاتار, قازاقستاندىق اۋىر اتلەتتەر سۆەتلانا پودوبەدوۆا, مايا مانەزا جانە ءزۇلفيا چينشانلو دا دوپينگ داۋىنىڭ قۇربانىنا اينالدى. ولار اتالعان ماسەلە تولىق شەشىلمەيىنشە, الداعى وتەتىن جارىستاردان الاستاتىلدى. دەسە دە, ساڭلاقتارىمىز حوك تاراتقان مالىمەتكە مويىماي, وليمپياداعا قاتىسۋ ءۇشىن دايىندىقتى جالعاستىرا بەرەتىنىن ايتىپ وتىر. وسى رەتتە سىر تولاعايى, الەمدى مويىنداتقان وليمپيا ويىندارىنىڭ ەكى مارتە چەمپيونى يليا يلين دوپينگ داۋىنا بايلانىستى ءوز مالىمدەمەسىن جاسادى.
«بۇل اقپارات توبەمنەن جاي تۇسكەندەي ەسەڭگىرەتىپ تاستادى. حالىقارالىق اۋىر اتلەتيكا فەدەراتسياسىنىڭ ەرەجەسىنە ساي, مەن تۋرالى بارلىق اقپارات حالىقارالىق ADAMS جۇيەسىندە ورنالاسقان. وندا مەنىڭ ءاربىر كۇنىم ساعات-ساعاتپەن جازىلىپ, جاتتىعۋدا, نە باسقا جەردە جۇرگەنىم تولىق كورسەتىلەدى. مەنى دوپينگكە قارسى اگەنتتىكتىڭ باقىلاۋشىلارى وڭاي تابا الادى. بيىلدىڭ وزىندە ەكى رەت – پولشادا جانە الماتىدا دوپينگكە قارسى سىناما تاپسىردىم. وزدەرىڭىز بىلەتىندەي, ەشبىر حالىقارالىق جارىس دوپينگتىك تەكسەرىسسىز وتپەيدى. مەن دە وزگە سپورتشىلار سەكىلدى, 2004 جىلدان بەرى دوپينگكە سىناق تاپسىرامىن. قازىر ريو وليمپياداسىنا دايىندىعىمدى جالعاستىرىپ جاتىرمىن جانە بەرىلەتىن ويىم جوق. ماعان قاتىستى اقىلعا قونىمسىز شەشىمنىڭ بۇرىستىعىن دالەلدەيمىز دەپ سەنەمىن. قانداي شارا قولدانىلسا دا, سىزدەردىڭ 20 جىل بويى ءومىرىمدى سپورت زالىندا وتكىزىپ, قان مەن تەرىم شىققانشا كۇنىنە 3 رەت جاتتىعۋ جاسايتىنىمدى بىلگەندەرىڭىزدى قالايمىن. مەن بارلىق ۋاقىتتا وزىمە ارتىلعان جۇكتى سەزىنىپ, سىزدەردىڭ قولداۋلارىڭىزدى كورىپ كەلدىم. قازىر دە سول قولداۋلارىڭىز ماعان قاجەت بولىپ تۇر. سىزدەردىڭ يليا يليندەرىڭىز», – دەپ جازعان يليا يلين ءوزىنىڭ Instagram پاراقشاسىندا.
وسى ورايدا, قازاقستاننىڭ اۋىر اتلەتيكا فەدەراتسياسى ارنايى مالىمدەمە جاساپ, سپورتشىلارىمىزدىڭ ءوز زاڭدى قۇقىقتارىن قورعاۋدىڭ بارلىق دەڭگەيىندە جانە پروتسەستىڭ ءاربىر كەزەڭىندە قۇقىقتىق كومەك كورسەتەتىنىن جەتكىزدى.
ايتا كەتەيىك, جۋىق ارادا حالىقارالىق وليمپيادا كوميتەتى چەمپيونداردىڭ وليمپياداداعى ماراپاتى مەن ولاردى ريو-2016 وليمپيا ويىندارىنا قاتىستىرۋ جونىندە ماسەلەنى تارتىپتىك كەڭەستە قارايتىن بولادى. مادەنيەت ءجانە سپورت ۆيتسە-ءمينيسترى ساكەن مۇسايبەكوۆتىڭ ايتۋىنشا, حالىقارالىق وليمپيادا كوميتەتى قازاقستاندىق اتلەتتەردىڭ تاعدىرىن 27 ماۋسىمدا شەشەتىن بولادى.
تالعات رايىمبەك,
«ەگەمەن قازاقستان»