تاۋەلسىزدىگىمىزدىڭ 25 جىلدىق بەلەسى ۇلتىمىزدىڭ رۋحاني قۇندىلىقتارىن ناسيحاتتاپ, ەل دامۋىنىڭ دارا جولىن تانىتاتىن ءىس-شارالاردىڭ وتكىزىلۋىمەن ەرەكشەلەنىپ وتىر.
كەشە كونە تاراز قالاسىندا قازاق حالقىنىڭ ۇمىت بولا باستاعان ۇلتتىق تاعامدارىنىڭ جانە «نەو-فولكلور» ستيلىندەگى كيىم ديزاينەرلەرىنىڭ كونكۋرستارى قورىتىندىلاندى. شاراعا مەملەكەتتىك حاتشى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى گۇلشارا ابدىقالىقوۆا قاتىستى.
– ءىس-شاراعا قاتىسۋشىلاردىڭ باسىم كوپشىلىگى جاستار بولۋى قۋانتتى, – دەدى گۇلشارا ناۋشاقىزى. – بۇل جاس بۋىننىڭ كونەنى زەردەلەۋگە, تاريحىمىزدى تانۋعا, ءداستۇرىمىزدى بىلۋگە دەگەن تالپىنىسىن كورسەتەدى. بۇل كونكۋرستاردىڭ مازمۇنى مەملەكەت باسشىسى نۇرسۇلتان نازارباەۆتىڭ «ءداستۇر مەن مادەنيەت – ۇلتتىڭ گەنەتيكالىق كودى. ءبىز ءوزىمىزدىڭ ۇلتتىق مادەنيەتىمىز بەن داستۇرلەرىمىزدى قورعاۋىمىز كەرەك, مادەني يگىلىگىمىزدى بولشەكتەپ بولسا دا جيناستىرۋىمىز كەرەك», دەگەن كەلەلى مىندەتىنە تولىق ساي كەلەدى. رەسپۋبليكالىق دارەجەدەگى ەكى كونكۋرستىڭ شەجىرەلى تاراز جەرىندە وتكىزىلۋى كەزدەيسوق ەمەس. بۇل – تاراز – اقشولاق – اقىرتوبە – قۇلان – مەركى – شۋ – اسپارا ارقىلى ۇلى جىبەك جولى وتكەن قاسيەتتى جەر. ونىڭ توسىندەگى ءار كەسەنەدە تۇنعان تاريح بار, ال ولكەدە سالت-داستۇرلەرىمىزدىڭ ساقتالىپ, دارىپتەلۋىنە تيىسىنشە ءمان بەرىلىپ, جاعداي جاسالىپ وتىر.
تاراز تورىندە وتكەن بۇل كونكۋرستاردىڭ ماقساتى – ۇلتىمىزدىڭ سان عاسىرلار بويعى سالت-ءداستۇرىن ساقتاۋ جانە كەڭىنەن تاراتۋ, ەلدىڭ ءوسىپ-وركەندەۋى ءداستۇرلى ۇلتتىق قۇندىلىقتار نەگىزىندە جۇزەگە اساتىنىنا جۇرتشىلىقتىڭ نازارىن اۋدارۋ, سونداي-اق, ايەلدەردى حالىقارالىق استانادا وتەتىن ەكسپو-2017 كورمەسىنە قاتىسۋعا دايىنداۋ.
ورالحان ءداۋىت,
«ەگەمەن قازاقستان»
جامبىل وبلىسى