پارلامەنت ماجىلىسىندەگى «نۇر وتان» پارتياسى فراكتسياسى جانىنداعى وڭىرلىك ساياسات جانە ماسليحاتتارمەن جۇمىس جونىندەگى كەڭەستىڭ, پارلامەنت ماجىلىسىندەگى قازاقستان حالقى اسسامبلەياسى دەپۋتاتتىق توبىنىڭ جانە «نۇر وتان» پارتياسى جانىنداعى قۇقىقتىق كەڭەستىڭ بىرلەسكەن وتىرىسىندا قوعامدىق كەڭەستەردى قۇرۋ جانە قىزمەتىن جەتىلدىرۋ ماسەلەلەرى تالقىلاندى.
بەينەكونفەرەنتسيا پىشىمىندە وتكەن وتىرىستى پارلامەنت ءماجىلىسى زاڭناما جانە سوت-قۇقىقتىق رەفورماسى كوميتەتىنىڭ ءتوراعاسى, «نۇر وتان» پارتياسى جانىنداعى قۇقىقتىق كەڭەستىڭ ءتوراعاسى نۇرلان ءابدىروۆ اشتى. سونداي-اق, شارا بارىسىندا «نۇر وتان» پارتياسىنىڭ حاتشىسى فارحاد قۋانعانوۆ, پارلامەنت ءماجىلىسىنىڭ دەپۋتاتتارى – پارتيا فراكتسياسى جانىنداعى وڭىرلىك ساياسات جانە ماسليحاتتارمەن جۇمىس جونىندەگى كەڭەستىڭ توراعاسى سەرىك سەيدۋمانوۆ, قازاقستان پرەزيدەنتى جانىنداعى ادام قۇقىعى جونىندەگى كوميسسيانىڭ توراعاسى, دەپۋتات قۋانىش سۇلتانوۆ, پارلامەنت ماجىلىسىندەگى قحا دەپۋتاتتىق توبىنىڭ جەتەكشىسى, ءبىلىم, عىلىم, جاستار ساياساتى جانە بالالار قۇقىعىن قورعاۋ ءجونىندەگى قوعامدىق كەڭەس تورالقاسىنىڭ مۇشەسى ساۋىتبەك ابدراحمانوۆ, مەملەكەتتىك قىزمەت ىستەرى ءجونىندەگى ورگانداردىڭ ءىس-ارەكەت ماسەلەلەرى جونىندەگى قوعامدىق كەڭەستىڭ توراعاسى ورالباي ابدىكارىموۆ, مادەنيەت جانە سپورت ۆيتسە-ءمينيسترى مارات ءازىلحانوۆ, اتىراۋ وبلىسىنداعى قوعامدىق كەڭەستىڭ توراعاسى مۇرات وتەشەۆ ءسوز سويلەدى.
ءماجىلىس دەپۋتاتى, قازاقستان حالقى اسسامبلەياسى دەپۋتاتتىق توبىنىڭ جەتەكشىسى ساۋىتبەك ابدراحمانوۆ ءوز سوزىندە قوعامدىق كەڭەستەر اتقاراتىن جۇمىس اۋقىمدى ەكەنىن ايتا كەلىپ, بارشا حالىقتىڭ ومىرىنە قاتىسى بولاتىنداي ماڭىزدى ماسەلەلەردە جەتى رەت ولشەپ, ءبىر رەت كەسەتىندەي ساليقالىلىق قاجەت بولاتىنىن جەتكىزدى. «ءبىلىم جانە عىلىم مينيسترلىگى قوعامدىق كەڭەسىنىڭ ءمۇشەسى رەتىندە كەڭەستىڭ وتىرىستارىندا ىسكەرلىك اڭگىمە ايتپاقپىن. سونىمەن بىرگە ءۇش تىلدە وقىتۋ, 12 جىلدىق مەكتەپ, بەس كۇندىك وقۋ اپتاسى سياقتى كۇرمەۋلى, كۇردەلى تۇيىندەردى تارقاتۋعا ەۆوليۋتسيالىق جولمەن قاراۋ كەرەكتىگى دە كۇمانسىز. مىسالى, مينيسترلىك ورىس ءتىلدى مەكتەپتەردە «قازاقستان تاريحى» ءپانىن قازاق تىلىندە وقىتۋدى قولعا الماقشى. يدەيانىڭ ءوزى ابدەن قولداۋعا تۇرارلىق ەكەنى, مۇنىڭ مەملەكەتتىك ءتىلدىڭ مەرەيىن اسىراتىنى, ءتۇپتىڭ-ءتۇبىندە قازاقشانى يگەرۋگە سەپتەسەتىنى تالاسسىز. بار ماسەلە وعان دايىندىقتىڭ دەڭگەيىندە. سول مەكتەپتەردەگى وقۋشىلار قازاقشا ساباقتى تۇسىنەتىندەي, قازاقشا وقۋلىقتى پايدالانىپ, جاۋابىن قازاقشا ايتا الاتىنداي بولىپ جاتقاندا ايتار اڭگىمە جوق, ال ولاي بولماي تۇرعاندا ايتار اڭگىمە بار. مۇنىڭ اياعى ساباق بەرگەنسۋگە, جاۋاپ العانسۋعا تىرەلسە ودان ءتىلدىڭ بەدەلى بيىكتەمەيدى, قايتا قازاق ءتىلىنىڭ قادىرى كەتەدى. سوندىقتان بۇل جۇمىس ول مەكتەپتەردە قازاق ءتىلىن وقىتۋ ساپاسىن جاقسارتۋمەن قوسا قابات جۇرگەنى, جاڭا تالاپتىڭ ەنگىزىلەتىن مەرزىمى ناقتى جاعدايدى ەسكەرە وتىرىپ بەلگىلەنگەنى ءجون. قوعامدىق كەڭەس وسىنداي جايلاردى ۇدايى نازاردا ۇستايتىن بولادى», دەدى ساۋىتبەك ابدراحمانوۆ.
شاراعا قاتىسۋشىلار «100 ناقتى قادام» ۇلت جوسپارىنىڭ 99-قادامىن, قوعامدىق كەڭەستەردى قۇرۋ جانە قىزمەتىن جەتىلدىرۋدى ءجۇزەگە اسىرۋ ماسەلەلەرىن تالقىلادى. وتىرىستا اتالىپ وتىلگەندەي, قازىرگى تاڭدا رەسپۋبليكا بويىنشا 225 قوعامدىق كەڭەس قۇرىلدى. ونىڭ ىشىندە 12-ءسى – رەسپۋبليكالىق, 16-سى – وبلىستىق ءجانە استانا, الماتى قالالارى, 197-ءسى قالالىق جانە اۋداندىق دەڭگەيلەردە. بۇگىندە ولاردا 3791 ادام جۇمىس ىستەسە, 70 پايىزدان استامىن كونكۋرستىق نەگىزدە قابىلدانعان ازاماتتىق قوعام وكىلدەرى قۇرايدى.
قوعامدىق كەڭەستەردىڭ مۇشەلەرى قاتارىنا پارلامەنت دەپۋتاتتارى نۇرلان ورازالين, گەورگي كيم, بىرعانىم ءايتىموۆا, قۋانىش سۇلتانوۆ, گۇلجان قاراقۇسوۆا, ارتۋر پلاتونوۆ, بەكبولات تىلەۋحان, قوعام قايراتكەرلەرى ورالباي ابدىكارىموۆ, مىرزاتاي جولداسبەكوۆ, كەنجەعالي ساعاديەۆ, اناتولي باشماكوۆ, مەلس ەلەۋسىزوۆ, زينايدا فەدوتوۆا, ءاليحان تويباەۆ, ۇەۇ باسشىلارى نۇرلان ەرىمبەتوۆ, ەڭلىك نۇرعاليەۆا, مارات باشيموۆ, ەلەنا دميتريەنكو جانە باسقالارى ەندى.
بىرلەسكەن وتىرىس قورىتىندىسىندا بىرقاتار ۇسىنىس قابىلداندى.
ساۋلەبەك ءبىرجان