پارلامەنت ماجىلىسىندەگى «نۇر وتان» پارتياسى فراكتسياسىنىڭ مۇشەسى جانات جاراسوۆتىڭ توراعالىق ەتۋىمەن پارتيا جانىنداعى سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەستىڭ كەزەكتى وتىرىسى ءوتىپ, وندا قوستاناي وبلىسىندا اتقارىلعان جۇمىستاردىڭ جاي-جاپسارى تالقىلاندى. جيىنعا كەڭەس مۇشەلەرى مەن ءماجىلىس دەپۋتاتتارى, پارتيانىڭ ورتالىق اپپاراتىنىڭ جاۋاپتى قىزمەتكەرلەرى جانە مۇددەلى مەملەكەتتىك ورگانداردىڭ وكىلدەرى قاتىستى.
الدىمەن 2015-2025 جىلدارعا ارنالعان سىبايلاس جەمقورلىققا قارسى ءىس-قيمىل باعدارلاماسىنىڭ قوستاناي وڭىرىندە جۇزەگە اسىرىلۋ بارىسى جونىندە وبلىس باسشىسى, «نۇر وتان» پارتياسىنىڭ وسى وبلىستاعى فيليال توراعاسى ارحيمەد مۇحامبەتوۆ ارنايى بايانداما جاسادى. سونداي-اق, جيىندا ءسوز العان ساراپتاما كوميسسياسىنىڭ جەتەكشىسى, كەڭەس توراعاسىنىڭ ءبىرىنشى ورىنباسارى ورالباي ابدىكارىموۆ سوڭعى كەزدەرى قوعام ىشىندە جالاڭ ۇران, قۇرعاق ۋادە كوبەيىپ كەتكەندىگىنە قاتتى قىنجىلىسىن ءبىلدىردى.
نەگىزىنەن, كۇن تارتىبىندە ءۇش ماسەلە تالقىلانعان بولاتىن. ال ايماق باسشىسى ءوز بايانداماسىندا جەرگىلىكتى اتقارۋشى ورگاندار اكىمدىك قىزمەتكەرلەرى ەل يگىلىگى ءۇشىن بەلسەندى ارەكەتتەر جاساپ جاتقاندىعىن اتاپ ءوتتى. «ونىڭ ءبىر پاراسىنا توقتالىپ وتەر بولسام, وسى كەزگە دەيىن ىسكە اسىرىلعان شارۋالارىمىز ەداۋىر. جالپى, جۇمىستىڭ قورىتىندىسى رەتىندە مىناداي دەرەكتەر كەلتىرە الامىن. ماسەلەن, كۇنى بۇگىنگە دەيىن وبلىس اۋماعىندا سىبايلاس جەمقورلىققا قارسى ۇگىت-ناسيحات پەن ءتۇسىندىرۋ جۇمىستارى رەتىندە 403 شارا ۇيىمداستىرىلعان بولسا, وسى باعىتتاعى جۇمىستاردى جانداندىرۋ ماقساتىندا مەملەكەتتىك مەكەمەلەر مەن ۇكىمەتتىك ەمەس ۇيىمدار, جاستار ورتالىقتارى, قوعامدىق كەڭەستەر اراسىندا ءوزارا ىنتىماقتاستىقتى تەرەڭدەتەتىن 11 ارىپتەستىك مەموراندۋمى بەكىتىلدى. سونىمەن قاتار, «نۇرلى جول» مەملەكەتتىك باعدارلاماسى اياسىندا جۇزەگە اسىرىلىپ جاتقان نىساندارداعى جۇمىس ۇدەرىستەرىن قاداعالاۋ ءۇشىن قوستانايلىق نۇروتاندىقتار باستاماسىمەن باق وكىلدەرىن قاتىستىرا وتىرىپ 6 رەت رەيدتىك باقىلاۋ شاراسى ۇيىمداستىرىلدى. ال «وزىڭنەن باستا» اكتسياسىنا وراي, 411 ادام (ونىڭ ىشىندە لاۋازىمدى مەملەكەتتىك قىزمەتكەر مەن اۋدان اكىمدەرى سىندى شەنەۋنىكتەر جانە ولاردىڭ ورىنباسارلارى دا بار) ءوز اتتارىنا تىركەلگەن م ۇلىكتەرى مەن تابىس كولەمدەرىن اشىق جاريالاۋعا بەلسەندى قاتىستى», دەدى ارحيمەد بەكەجان ۇلى.
وسىلايشا, الدىمەن ءوڭىردەگى تىنىس-تىرشىلىكتىڭ وڭتايلى تۇستارىن تىزبەلەگەن اكىم, ءسوز سوڭىنا قاراي, كەيبىر ولقى ءتۇسىپ جاتقان كەمشىلىكتەرگە دە توقتالدى. ونىڭ ايتۋىنشا, قازىرگى كەزدە وڭىردەگى مەملەكەتتىك ساتىپ الۋ قىزمەتىنىڭ پروبلەمالارى بارشىلىق. اكىم وسى جەردە «توبىل» الەۋمەتتىك-كاسىپكەرلىك كورپوراتسياسىنداعى تۇيتكىلدى ماسەلەلەر مەن وبلىستاعى پروبلەمالى قۇرىلىس نىساندارى جانە جولداردىڭ ساپاسىز جوندەلۋىنە قاتىستى قوعام تاراپىنان ايتىلعان سىنداردىڭ شەشىمىن تابۋ جايى شۇعىل قولعا الىنعاندىعىن تىلگە تيەك ەتتى.
ايتا كەتەيىك, القالى جيىن وتەتىن كۇن بەلگىلەنگەنگە دەيىن «نۇر وتان» پارتياسى جانىنداعى سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەس مۇشەلەرى قوستاناي ءوڭىرىن ارالاپ, جۇرتشىلىقپەن جۇزدەسىپ, قوعامدىق قابىلداۋ وتكىزگەن بولاتىن. قىزمەتتىك ساپار اياسىندا جۇمىس توبىنىڭ مۇشەلەرى ايماقتاعى يگى ىستەر مەن شەشىمىن تابۋى ءتيىس تۇيىندەردىڭ جولىن تالقىلاپ, ورەسكەل قاتەلىكتەر مەن بىرقاتار زاڭسىزدىقتاردى تاسپاعا ءتۇسىرىپ, بۇگىنگى جيىن قاتىسۋشىلارىنىڭ الدىندا قايتا تالقىلاۋدى ءجون ساناپتى. وندا قوستاناي قالاسىنىڭ ىرگەسىندەگى «اەروپورت» شاعىن اۋدانىنداعى تۇرعىن ۇيلەردى گازداندىرۋ جانە جىلىتۋ جۇيەسىمەن قامتۋ, قاراسۋ اۋىلىنداعى ەسىل سۋ قۇبىرىن جۇرگىزۋ جايى, قالا ىشىندەگى جولدارعا جوندەۋ جۇرگىزۋ, تاعى ءبىر شاعىن اۋدانداعى كوپقاباتتى تۇرعىن ۇيلەرگە كىرگىزىلگەن جىلۋ قۇبىرىنىڭ بەكىتىلگەن جوسپاردان 32 سانتيمەرگە دەيىن اۋىتقۋى سەكىلدى شيكى تىرلىكتەر تىزبەكتەلگەن.
وبلىس اكىمى ءوز بايانداماسىندا بۇل ماسەلەلەردىڭ ىشىندە ءبىرقاتارى وڭ شەشىمىن تاۋىپ جاتقاندىعىن ەستىرتكەن بولاتىن. ال قوسىمشا بايانداما جاساۋ ءۇشىن مىنبەرگە شىققان و.ابدىكارىموۆ مەملەكەت تاراپىنان بار جاعداي جاسالعانىمەن, وڭىردەگى اتقارىلعان جۇمىستاردىڭ كوڭىل كونشىتپەيتىندىگىنە توقتالىپ ءوتتى. «جەرگىلىكتى اتقارۋشى ورگاندار ءۇشىن مەملەكەت تاراپىنان مەيلىنشە جاعداي جاسالىپ, زور مۇمكىندىكتەر بەرىلگەندىگىن بىلەمىز. ارنايى باعدارلامالار ءتۇزىلىپ, بيۋدجەتتەن قاراجاتتار دا بولىنۋدە. بىراق, جەڭ ۇشىنان جالعاسقان سىبايلاس جەمقورلىققا قارسى كۇرەستە پارتيا تاراپىنان باقىلاۋدى كۇشەيتۋ كەرەك. اسىرەسە, ايماقتارداعى قۇرىلىستار مەن مەملەكەتتىك باعدارلامالار اياسىندا جۇرگىزىلىپ جاتقان جوبالارعا ءجىتى كوڭىل بولگەن ءجون. ءبىزدىڭ قوعامدا سوڭعى كەزدەرى جالاڭ ۇران, قۇرعاق ۋادە كوبەيىپ كەتتى. مۇنداي كورىنىس بيلىك پەن بۇقارانىڭ اراسىنداعى سەنىمگە سەلكەۋ ءتۇسىرۋى مۇمكىن ەكەندىگىن ەشكىم دە جوققا شىعارا المايدى», دەدى ورالباي ابدىكارىم ۇلى.
نۇرلىبەك دوسىباي,
«ەگەمەن قازاقستان»