كەشە رەسەيدىڭ سولتۇستىك استاناسى – سانكت-پەتەربۋرگ قالاسىندا حح پەتەربۋرگ حالىقارالىق ەكونوميكالىق فورۋمى ءوز جۇمىسىن باستادى. فورۋمنىڭ وتكىزىلىپ كەلە جاتقانىنا دا جيىرما شاقتى جىلدىڭ ءجۇزى بولدى
تاريحي شاھاردا وتەتىن القالى جيىندا الەمدىك دەڭگەيدەگى كوشباسشىلار زاماننىڭ مەيلىنشە ماڭىزدى دەگەن ماسەلەلەرىن, سونداي-اق, ساياسي قاتەرلەردى, الەمدىك داعدارىستىڭ ەكونوميكالىق جانە الەۋمەتتىك سالدارلارىن, الەمدىك ەكونوميكانى قالپىنا كەلتىرۋدەگى تۇراقسىز سيپاتتى تالقىلايدى.
بيىل مامىر ايىنىڭ سوڭىندا رەسەي پرەزيدەنتى ۆلاديمير پۋتين استاناعا اتباسىن تىرەگەن-ءدى. ەكى ەل اراسىنداعى ىنتىماقتاستىق تۋرالى اڭگىمە سول جولى دا كەڭىنەن وربىگەن. ەلباسى نۇرسۇلتان نازارباەۆ ەكىجاقتى قارىم-قاتىناستى ورىستەتۋ جايىن ايتا كەلىپ, اڭگىمە اراسىندا اعىمداعى جىلى اتقارىلاتىن شارالارعا دا توقتالعان-تىن.
«جالپى, ءبىزدىڭ الدىمىزدا شانحاي ىنتىماقتاستىق ۇيىمى, تمد مەملەكەتتەرى باسشىلارى كەڭەسى, قازاقستان مەن رەسەي وڭىرارالىق ىنتىماقتاستىق فورۋمى, سونداي-اق, پەتەربۋرگ حالىقارالىق ەكونوميكالىق فورۋمى اياسىندا تىعىز كەزدەسۋلەر كەستەسى تۇر. وسىنداي كەزدەسۋلەردىڭ كوپتىگى ءبىزدىڭ ەلدەرىمىز اراسىنداعى قارىم-قاتىناستىڭ ءوزارا سەنىمدى سيپاتتا ەكەنىن ءبىلدىرەدى. تالقىلاۋلار ارقىلى ءبىز كەز كەلگەن ماسەلەنى شەشىپ كەلەمىز, بۇل ىنتىماقتاستىعىمىزدى ودان ءارى دامىتۋعا سەپتىگىن تيگىزەدى», – دەگەن ەدى سول جولى قازاقستان باسشىسى.
مىنەكي, وسىلايشا اراعا ەكى اپتا سالىپ, قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ سانكت-پەتەربۋرگكە اتباسىن تىرەدى. فورۋم اياسىندا ەكىجاقتى كەزدەسۋلەر وتكىزىپ, رەسەيدىڭ بيزنەس وكىلدەرىمەن سۇحبات قۇردى. ال كەزدەسۋگە «ەۋروحيم», «ەفكو», «لۋكويل», «پوليمەتالل», «ەۋروپا پودشيپنيك كورپوراتسياسى», «سكولكوۆو», «رەسەي تەمىر جولدارى» جانە «اۆتوۆاز» سياقتى رەسەيلىك ءىرى كومپانيالاردىڭ جەتەكشىلەرى قاتىستى.
كەزدەسۋ تىزگىنىن ۇستاعان رەسەيدىڭ ونەركاسىپشىلەر مەن كاسىپكەرلەر وداعىنىڭ توراعاسى الەكساندر شوحين قازاقستان پرەزيدەنتىنە رەسەيلىك بيزنەس وكىلدەرىمەن كەزدەسۋگە ىقىلاس تانىتقانى ءۇشىن العىسىن ءبىلدىردى.
ول ءوز سوزىندە قازىرگى داعدارىسقا بايلانىستى ەكىجاقتى قارىم-قاتىناستىڭ باسەڭسىپ قالعانىن تىلگە تيەك ەتتى. بۇعان ەكونوميكالىق ءوسىمنىڭ تومەندەۋى, ۇلتتىق ۆاليۋتالاردىڭ دەۆالۆاتسياعا ۇشىراۋى دا كەرى ىقپالىن تيگىزدى. قازاقستان باسشىسىنىڭ رەسەيلىك بيزنەس وكىلدەرىمەن كەزدەسۋى ەكىجاقتى بايلانىسقا سونى سەرپىن بەرەتىندىگىنە سەنىم ءبىلدىردى. بيزنەس سالاسىندا جاڭا جوبالاردىڭ تۇساۋى كەسىلىپ, ينۆەستيتسيالىق قارقىن بۇرىنعى قالپىنا كەلەتىنىنە كومەكتەسەتىنىن ايتتى.
نۇرسۇلتان نازارباەۆ ءوز سوزىندە قازان ايىندا استانادا وڭىرلىك فورۋم وتەتىنىن ەسكە سالا وتىرىپ, ەۋرازيالىق ەكونوميكالىق وداق قۇرىلعاننان بەرگى جەتىستىكتەرىمىزدى سارالاپ, كۇن تارتىبىندەگى پروبلەمالاردى ءسوز ەتتى جانە الداعى بىرلەسىپ اتقارىلاتىن شارۋالاردى اقىلداسۋ كەرەكتىگىنە توقتالدى.
بۇگىنگى كۇنگە دەيىن قازاقستاندا رەسەيلىك بيزنەستىڭ قاتىسۋىمەن 6 مىڭ كاسىپورىن جۇمىس ىستەپ جاتىر. تارتىمدى جوبالار دا جەتكىلىكتى. بولاشاقتىڭ ءتيىمدى باستاۋلارى دا بار. 25 ميلليارد اقش دوللارى شاماسىندا ينۆەستيتسيا تارتىلعان, ارينە, ونىڭ ىشىندە باسىم كوپشىلىگى مينەرالدى رەسۋرستاردىڭ ەنشىسىندە. 7-8 ميلليارد دوللار عانا شاعىن جانە ورتا بيزنەستىڭ ۇلەسىنە تيەدى, دەي كەلىپ, نۇرسۇلتان ءابىش ۇلى بۇل باعىتتا قىرۋار جۇمىس اتقارىلۋى قاجەتتىگىن اتاپ كورسەتتى.
ەلباسىنىڭ ايتقانىنداي, قازاقستاندا ينۆەستيتسيا قۇيىپ, جەمىستى ەڭبەك ەتىپ جاتقان «لۋكويل», «ەۋروحيم», «رۋسال» سياقتى ءىرى كومپانيالار بار. ەلىمىزدىڭ وڭتۇستىگىندە «ەۋروحيم» فوسفور تىڭايتقىشىن وندىرەتىن زاۋىتتى ىسكە قوسقالى وتىر. وسكەمەندە جەڭىل كولىك شىعاراتىن «اۆتوۆازدىڭ» دا سالماعى باسىم. قىسقاسى, قالىپتاسقان بايلانىستى ودان ءارى ورىستەتە ءتۇسۋ كەرەك.
سوڭعى ەكى جىلدىڭ باستى جەتىستىگى ەۋرازيالىق ەكونوميكالىق وداقتىڭ قۇرىلۋى, دەدى نۇرسۇلتان ءابىش ۇلى. ارينە, داعدارىس ەكىجاقتى تاۋار اينالىمىنىڭ باسەڭدەۋىنە ءوز اسەرىن تيگىزدى. دەگەنمەن, بۇل وداقتىڭ بەرەرى مول. ەۋرازيالىق ەكونوميكالىق وداقتىڭ زاڭنامالىق بازاسىن تولىققاندى قالىپتاستىرىپ الدىق. جۇمىس كۇشى, تاۋار تاسىمالىن قامتاماسىز ەتۋ ماسەلەلەرى شەشىلدى. ەڭ باستىسى, ەۋرازيالىق ەكونوميكالىق وداق ەلدەرى شەڭبەرىندە ءبىزدىڭ وندىرىسشىلەردىڭ ەركىن باسەكەلەستىگىنە جول اشىلدى, دەدى قازاقستان باسشىسى.
نۇرسۇلتان ءابىش ۇلى ەكى ەلدىڭ اراسىنداعى ساۋدا اينالىمىنىڭ تومەندەۋىنە سىرتقى فاكتورلاردىڭ دا ءوز اسەرىن تيگىزگەندىگىن, ايتسە دە ونى ەڭسەرۋگە بولاتىندىعىن اتاپ كورسەتتى. ول – ءبىزدىڭ ىنتىماقتاستىعىمىزدى ودان ءارى كەڭەيتە ءتۇسۋ. ەكى ەل اراسىنداعى تاۋار اينالىمى وتكەن جىلى 15 ميلليارد اقش دوللارىن قۇرادى. بۇل كورسەتكىش كەزىندە 30 ميلليارد اقش دوللارىنا جەتكەن بولاتىن. ىنتىماقتاستىعىمىزدى بەكەمدەسەك, بىرتىندەپ ونى دا قالپىنا كەلتىرەمىز, دەدى ن.نازارباەۆ.
مەملەكەت باسشىسى رەسەيلىك بيزنەس وكىلدەرىن قازىرگى داعدارىس جاعدايىندا قازاقستاننىڭ ينۆەستيتسيالىق تارتىمدىلىقتى كوتەرۋ جولىندا اتقارىپ جاتقان شارالارىنان جان-جاقتى حاباردار ەتتى. ءبىز «100 ناقتى قادام» ۇلت جوسپارى باعدارلاماسىن قابىلدادىق. سوعان سايكەس ءتيىستى زاڭ جوبالارىن قابىلدادىق. بيىل جاڭا جىلدان باستاپ سونى جۇزەگە اسىرۋعا كىرىستىك. بۇل قازاقستاندى ەڭ دامىعان مەملەكەتتەردىڭ قاتارىنا قوسۋعا كومەكتەسەدى, دەدى نۇرسۇلتان ءابىش ۇلى.
ءارى قاراي مەملەكەت باسشىسى رەفورمانىڭ نەگىزگى باعىتتارى زاماناۋي مەملەكەتتىڭ كاسىبي اپپاراتىن قالىپتاستىرۋعا ارنالعانىن, بيىل جاڭا جىلدان باستاپ مەملەكەتتىك قىزمەتشىلەردى تەستىلەۋدەن وتكىزىپ, ولاردىڭ كاسىبيلىگىن ارتتىرۋ بارىسىندا شارالار جۇرگىزىلىپ جاتقانىن, شەنەۋنىكتەر حالىققا جانە بيزنەسكە ادال قىزمەت ەتۋى ءتيىس ەكەنىن ايرىقشا اتاپ ءوتتى.
ۇلت جوسپارىنىڭ اياسىندا زاڭنىڭ ۇستەمدىگىن قامتاماسىز ەتۋ, بيزنەسكە كەلىسىم بەرۋ جانە باسقا دا كەدەرگىلەردى جويۋ, بارشاعا قولجەتىمدى, ترانسپەرەنتتى ۇكىمەت قالىپتاستىرۋ جۇمىستارىنا باسىمدىق بەرىلىپ وتىرعانى دا قازاقستان پرەزيدەنتىنىڭ نازارىنان تىس قالعان جوق. تاعى ءبىر ايتا كەتەتىن ماسەلە, ءبىز ەلدى يندۋستريالاندىرۋدىڭ ەكىنشى بەسجىلدىعىن جۇزەگە اسىرىپ جاتىرمىز. ويتكەنى, بۇعان دەيىن ەل ەكونوميكاسىنىڭ بىرجاقتى دامىپ كەلە جاتقانىن پايىمدادىق, كەڭەس وداعىنىڭ كەزىندە دە وسى ىڭعايدا دامىعان ەدى. ەندىگى جەردە ءبىز وڭدەۋ سالاسىنا باسا ءمان بەرىپ وتىرمىز. بار شيكىزاتتى ەندى ءوزىمىز وڭدەۋگە بەلسەنە كىرىستىك. يندۋستريالاندىرۋدىڭ ءبىرىنشى جولى وسى, دەدى قازاقستان پرەزيدەنتى.
سونداي-اق, ن.نازارباەۆ مەتاللۋرگيا, مۇناي حيمياسى, ماشينا جاساۋ, قۇرىلىس ماتەريالدارى جانە اگروونەركاسىپ كەشەنى سالالارى ءبىزدىڭ جۇمىسىمىزدىڭ باسىم باعىتتارى بولىپ تابىلاتىنىنا ەكپىن ءتۇسىردى. وسى باعىتتاردا جۇمىس ىستەيتىن ينۆەستورلارعا جەڭىلدىك جاسالاتىنىن, ولار 10 جىلعا دەيىن كورپوراتيۆتىك تابىس سالىعىنان, جەر سالىعىنان, 8 جىلعا دەيىن م ۇلىك سالىعىنان بوساتىلاتىنىن ايتتى. مەملەكەتتىڭ اكىمشىلىك كەدەرگىلەردى جويۋعا مۇددەلىلىك تانىتىپ وتىرعانىنا, سوڭعى كەزدە قۇجاتتاردى رەسىمدەۋ ەلەكتروندى ۇكىمەت ارقىلى جۇزەگە اسىرىلا باستاعانىنا توقتالدى. حالىقارالىق ساراپشىلار دا قازاقستانداعى فيسكالدىق ساياساتتى الەمدەگى ەڭ وزىعى رەتىندە مويىندايدى. ليبەرالدىق سالىق رەجىمى ينۆەستورلار ءۇشىن اسا ءتيىمدى. بيزنەسكە ءتيىمدى سالىقتىق جەڭىلدىك جاعىنان قازاقستان بۇكىلالەمدىك بانكتىڭ رەيتىنگىسىندە 118 مەملەكەتتىڭ ىشىندە 18 ورىندا تۇر», دەدى نۇرسۇلتان ءابىش ۇلى.
ەلباسى ءوزىنىڭ سوزىندە ەلدە اۋقىمدى جەكەشەلەندىرۋدىڭ جۇزەگە اسىپ جاتقانىنا دا توقتالدى. مۇناي سالاسى بار, ينفراقۇرىلىمدىق نىساندار بار, جالپى سانى 800-گە جۋىق كاسىپورىن ساتۋعا قويىلىپ وتىر. جەكەشەلەندىرۋدەن باسقا, ءبىز مەملەكەتتىك-جەكەمەنشىك سەرىكتەستىك بويىنشا دا ىنتىماقتاسۋعا ءازىرمىز, دەدى پرەزيدەنت. ن.نازارباەۆ, سونداي-اق, قازاقستاننىڭ ەۋرازيا قۇرلىعىنىڭ قاق ورتاسىندا ورنالاسقانىنا نازار اۋداردى. مۇحيتقا, تەڭىزگە تىكەلەي جول بولماعانىمەن, قازاقستان ارقىلى جولدى قىسقارتۋعا مۇمكىندىك مول ەكەنىن اتاپ كورسەتتى. قىتايدان ەرتەدە جول تارتقان ۇلى جىبەك جولىن قايتا جاڭعىرتىپ جاتىرمىز. قىسقا مەرزىم ىشىندە ءبىز 2000 شاقىرىم تەمىرجولدى, 4000 شاقىرىم اۆتوموبيل جولىن ىسكە قوستىق. قىتايدىڭ باتىس شەكاراسىنان ەلدىڭ ورتالىعى ارقىلى كاسپي تەڭىزىنە شىعۋعا بولادى. وسى رەتتە اقتاۋ تەڭىز پورتى قايتا جاڭعىرتۋدان وتكىزىلىپ, اۋقىمى كەڭەيۋدە. سول جەردە ەكىنشى پورت – قۇرىقتىڭ قۇرىلىسى بيىل اياقتالادى. سونداي-اق, تۇرىكمەنستان ارقىلى يرانعا جالعايتىن تەمىرجول سالعانىمىزدان دا حاباردار بولارسىزدار. بۇل رەسەي تەمىرجولى ءۇشىن وتە ءتيىمدى باعىت, دەگەن پرەزيدەنت
تارام-تارام جولداردىڭ تامىر بۇلكىلىن دە رەسەيلىك بيزنەس وكىلدەرىنىڭ اقىل-تارازىسىنا سالدى.
«باتىس قىتاي – باتىس ەۋروپا» كولىك ءدالىزىنىڭ قۇرىلىسى دا بىتۋگە تاياۋ. بۇل جولدىڭ 2800 شاقىرىمى قازاقستان ارقىلى وتەدى. ءبىز ونىڭ قۇرىلىسىن كەلەسى جىلى تولىق اياقتايمىز. 2019 جىلعا دەيىن ۇزىندىعى 8000 شاقىرىمنان اساتىن 17 اۆتوجول جوباسى قاراستىرىلىپ وتىر. «باتىس قىتاي – باتىس ەۋروپا» كولىك ءدالىزىن ءبىز رەسەيدىڭ شەكاراسىنا دەيىن جەتكىزدىك. ەندى ونى ورىنبورعا جالعاۋ كەرەك, سوسىن ءارى قاراي كەتە بەرەدى. مۇنى ازيا دامۋ بانكى قارجىلاندىرۋعا ىقىلاس تانىتىپ وتىر. رەسەي جاعىنىڭ بۇل ماسەلەنى قاراستىرۋىن قالاعان بولار ەدىم. سوندا بۇل ەۋروپا مەن ازيانى جالعايتىن تولىققاندى ستراتەگيالىق ماڭىزى بار كولىك ءدالىزى بولىپ شىعادى, دەدى ەلباسى.
ءسوزىنىڭ سوڭىندا نۇرسۇلتان ءابىش ۇلى رەسەيلىك بيزنەس وكىلدەرىن ەكسپو-2017 حالىقارالىق كورمەسىنە قاتىسۋعا شاقىرىپ, «بولاشاقتىڭ ەنەرگياسى» بارلىق وزەكتى ماسەلەلەردى قامتيتىنىن, قۋات كوزدەرىن ءتيىمدى پايدالانۋعا ۇيىتقى بولاتىنىن جەتكىزدى. رەسەيلىك كومپانيالاردىڭ قول جەتكىزگەن جەتىستىكتەرىن حالىقارالىق كورمەدەن كورۋگە ىنتالى ەكەنىن دە ءبىلدىردى. كورمە اياقتالىسىمەن, ونىڭ ورنىندا «استانا» حالىقارالىق قارجى ورتالىعى ءوز قىزمەتىنە كىرىسەتىنىن دە تىلگە تيەك ەتتى.
رەسەي بيزنەس وكىلدەرىنىڭ قاتارىنان العاشقى بولىپ ءسوز العان «لۋكويل» كومپانياسىنىڭ پرەزيدەنتى ۆاگيت الەكپەروۆ كومپانيا ءوز قىزمەتىن 40 شاقتى ەلدە جۇرگىزەتىندىگىن ايتا كەلىپ, ايتسە دە, قازاقستاندى ستراتەگيالىق دامۋى جاعىنان الدىڭعى قاتارعا قوياتىندىعىن اتاپ ءوتتى. ال «سكولكوۆو» قورىنىڭ توراعاسى ۆيكتور ۆەكسەلبەرگ ءوز سوزىندە يننوۆاتسيالىق جوبالارعا دا ەرەكشە ءمان بەرۋ كەرەكتىگىنە توقتالدى. بۇل باعىتتا وزدەرىنىڭ بەلگىلى ءبىر تابىستارعا قول جەتكىزگەنىنەن, جوبالار اياسىندا بۇگىندە 1,5 مىڭعا جۋىق كومپانيا جۇمىس ىستەپ جاتقانىنان حاباردار ەتتى. 18 مىڭعا جۋىق يننوۆاتسيالىق جۇمىس ورنى اشىلعانىن دا كولدەنەڭ تارتتى. سوڭعى كەزدە قازاقستان جاعىمەن بىرلەسىپ, يننوۆاتسيالىق جوبالارعا بايقاۋ جاريالاعانىن, وعان دەگەن قىزىعۋشىلىق ارتا تۇسكەنىن جەتكىزدى. وتىنىشتەردىڭ دەنى الدىڭعى قاتارلى تەحنولوگيالىق شەشىمدەرگە جاۋاپ بەرەتىندىگى دە نازاردان تىس قالعان جوق. بۇل يننوۆاتسيالىق سەكتورداعى قازاقستاننىڭ الەۋەتى جوعارى ەكەندىگىن كورسەتەدى, ءبىز وسى ىنتىماقتاستىقتى ودان ءارى دامىتقىمىز كەلەدى. الداعى ۋاقىتتا جوبادان ناقتى ىسكە كوشەمىز دەگەن سەنىمدەمىن, دەدى ۆ.ۆەكسەلبەرگ.
ءسوزىنىڭ سوڭىندا «سكولكوۆو» قورىنىڭ توراعاسى وزدەرىنىڭ استانادا كەلەسى جىلى وتەتىن ەكسپو-2017 حالىقارالىق كورمەسىنە قاتىساتىندارىن, يننوۆاتسيالىق جوبالاردى اپاراتىندارىن, سونداي-اق, ءوز كومپانياسىنىڭ سەرىكتەستەرىن دە سوعان شاقىراتىنىن جەتكىزدى. ال «ەۋروپا پودشيپنيك كورپوراتسياسى» اشىق اكتسيونەرلىك قوعامىنىڭ باسقارما توراعاسى الەكساندر موسكالەنكو كورپوراتسيا تمد اۋماعىنىڭ 70 پايىزىن تەمىرجول ۆاگوندارىنىڭ پودشيپنيكتەرىمەن قامتاماسىز ەتىپ وتىرعانىن ايتا كەلىپ, ااق-تىڭ قىزمەتى قازاقستاندا دا ءساتتى جۇزەگە اسىرىلىپ جاتقانىن جەتكىزدى. سۇرانىستىڭ ازايعانىنا قاراماستان, ستەپنوگورداعى كاسىپورىن قالىپتى جاعدايدى جۇمىس ىستەپ تۇر, دەدى ول.
قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆپەن كەزدەسۋگە رەسەي بيزنەسىنىڭ الپاۋىتتارى تۇگەل دەرلىك جينالعانداي. ۇزىن-cانى ءىرى-ءىرى 50 كومپانيانىڭ باسشىسى كەلدى. ەلباسىنىڭ مازمۇندى اڭگىمەسىنەن تولىققاندى اقپاراتقا قانىققان كاسىپكەرلەر قازاقستان جاعىنىڭ وڭ وزگەرىستەرىنە كوز جەتكىزدى.
قازاقستان پرەزيدەنتى نۇرسۇلتان نازارباەۆ, سونداي-اق, گۆينەيا رەسپۋبليكاسىنىڭ پرەزيدەنتى الفا كوندەمەن كەزدەستى.
20-شى پەتەربۋرگ حالىقارالىق ەكونوميكالىق فورۋمى اياسىندا وتكەن كەزدەسۋ بارىسىندا مەملەكەتتەر باسشىلارى ساياسي, ساۋدا-ەكونوميكالىق جانە مادەني-گۋمانيتارلىق سالالارداعى ەكىجاقتى بايلانىستاردى جولعا قويۋ پەرسپەكتيۆالارىن قاراستىردى. بۇدان بولەك, يسلام ىنتىماقتاستىعى ۇيىمى شەڭبەرىندەگى بىرلەسكەن جۇمىستاردى قوسا العاندا, حالىقارالىق كۇن تارتىبىندەگى بىرقاتار ماسەلەلەر تالقىلاندى.
مەملەكەت باسشىسى مۇسىلماندار ءۇشىن قاسيەتتى رامازان ايىندا ءوتىپ جاتقان گۆينەيا پرەزيدەنتىمەن العاشقى كەزدەسۋىنىڭ سيمۆولدىق ءمانى بار ەكەنىن اتاپ ءوتتى.
– ءبىزدىڭ ەلىمىز تاۋەلسىزدىككە 25 جىل بۇرىن قول جەتكىزدى, افريكا قۇرلىعى مەملەكەتتەرىمەن ىنتىماقتاستىقتى ەندى عانا باستاپ جاتىرمىز. جاقىندا ساپارمەن كەلگەن سەنەگال جانە رۋاندا ەلدەرىنىڭ پرەزيدەنتتەرى قازاقستاندا بولدى. قازاقستان مەن گۆينەيا اراسىنىڭ شالعايلىعى ەلدەرىمىزدىڭ ءوزارا تىعىز ىقپالداستىق ورناتۋىنا كەدەرگى بولمايدى دەپ سەنەمىن, – دەدى نۇرسۇلتان نازارباەۆ.
ا.كوندە قازاقستان پرەزيدەنتىنە كەزدەسۋ ءۇشىن العىس ايتىپ, ەكىجاقتى سەرىكتەستىكتىڭ ءتۇرلى سالالارىنداعى قارىم-قاتىناستاردىڭ ودان ءارى دامي بەرەتىنىنە سەنىم ءبىلدىردى.
قازاقستان پرەزيدەنتى نۇرسۇلتان نازارباەۆ «رەسەي تەمىر جولدارى» ااق پرەزيدەنتى ولەگ بەلوزەروۆپەن دە كەزدەستى. كەزدەسۋ بارىسىندا كولىك-لوگيستيكا سالاسىنداعى ىنتىماقتاستىقتى دامىتۋ ماسەلەلەرى, سونداي-اق, ەكى ەلدىڭ كولىك الەۋەتىن ىسكە اسىرۋدىڭ پەرسپەكتيۆالى باعىتتارى تالقىلاندى.
نۇرسۇلتان نازارباەۆ تەمىرجول كومپانياسىمەن ىنتىماقتاستىقتىڭ تابىستىلىعىنا نازار اۋدارىپ, وسى سالاداعى سەرىكتەستىكتى يننوۆاتسيالىق تەحنولوگيالاردى ەنگىزۋ جانە تاسىمالدار تيىمدىلىگىن ارتتىرۋ ارقىلى ودان ءارى دامىتۋ قاجەتتىگىن ايتتى.
و.بەلوزەروۆ قازاقستان تاراپىمەن ءوزارا ءىس-قيمىل دەڭگەيىنىڭ جوعارى ەكەنىن اتاپ ءوتىپ, تاياۋ كەزەڭگە ارنالعان جۇمىس جوسپارلارى جونىندە اڭگىمەلەدى.
سانكت-پەتەربۋرگتەگى حالىقارالىق فورۋم بۇگىن ءوز جۇمىسىن ءارى قاراي جالعاستىرادى.
عابيت ىسكەندەر ۇلى,
«ەگەمەن قازاقستان» –
سانكت-پەتەربۋرگتەن
سۋرەتتەردى تۇسىرگەندەر
س.بوندارەنكو, ب.وتارباەۆ