قاراعاندىنىڭ ىرگەسىندەگى سپاسسك وقۋ ورتالىعىندا جاستاردىڭ «ايبىن» رەسپۋبليكالىق اسكەري-پاتريوتتىق جيىنى ءوتىپ جاتىر. ماۋسىمنىڭ 17-ءسى كۇنى مارەگە جەتەتىن بۇل شاراعا ەلىمىزدىڭ جوعارى وقۋ ورىندارىنداعى اسكەري كافەدرالاردىڭ ستۋدەنتتەرى, اسكەري مەكتەپتەردىڭ كادەتتەرى جانە اسكەري-پاتريوتتىق كلۋبتاردىڭ مۇشەلەرى قاتىسۋدا.
«ايبىن» جيىنىنىڭ اشىلۋ سالتاناتىنا قاراعاندى وبلىسىنىڭ اكىمى نۇرمۇحامبەت ابدىبەكوۆ, قورعانىس مينيسترىنىڭ ءبىرىنشى ورىنباسارى – قارۋلى كۇشتەر باس شتابىنىڭ باستىعى, گەنەرال-پولكوۆنيك ساكەن جاسۇزاقوۆ, ءماجىلىس دەپۋتاتتارى قۋانىش سۇلتانوۆ, مايرا ايسينا, باقىتبەك سماعۇل, سونىمەن قاتار, باس اسكەري پروكۋرور, ادىلەت گەنەرال-لەيتەنانتى ەرعالي مەرزادينوۆ, ۇشقىش-عارىشكەر, «قازعارىش» اق ۆيتسە-پرەزيدەنتى, اۆياتسيا گەنەرال-مايورى ايدىن ايىمبەتوۆ, ۇقك توراعاسىنىڭ ورىنباسارى, گەنەرال-مايور دارحان ءدىلمانوۆ جانە باسقا دا رەسمي تۇلعالار قاتىستى.
ءوڭىر باسشىسى ءوز سوزىندە وسىناۋ رەسپۋبليكالىق اسكەري-پاتريوتتىق جيىندى وتكىزۋ قاراعاندى وبلىسىنا ەكىنشى جىل سەنىپ تاپسىرىلىپ وتىرعانىن, وعان قاتىسۋشى ءار ازاماتقا ءوز ءوڭىرىنىڭ اتىنان كەلۋى دە ۇلكەن ابىروي ەكەنىن اتاپ ءوتتى.
– بۇل جەرگە ءوز ورتاسىنان ىرىكتەلىپ كەلگەن ەڭ لايىقتى جىگىتتەر جينالىپ وتىر, – دەدى نۇرمۇحامبەت ءابدىبەكوۆ. – كوپشىلىگىڭىز اسكەري دايىندىق بارىسىندا ۇزدىك ناتيجە كورسەتىپ, اسكەري ادام بولام, وتان الدىنداعى پارىزىمدى ابىرويمەن اتقارامىن دەگەن ماقساتتارىڭىزعا نىق قادام باسىپ كەلەسىزدەر. بۇگىن سىزدەرگە ناعىز قىزمەت الدىندا كۇش جيىپ, جەتىستىكتەرىڭىزدى كورسەتۋ مۇمكىندىگى تۋىپ وتىر.
اشىلۋ سالتاناتىنىڭ رەسمي بولىگىنەن سوڭ قوناقتار نازارىنا قويان-قولتىق جەكپە-جەكتەر, اسكەري اتۋ بويىنشا كورسەتىلىمدەر, قۇرمەت قاراۋىلى روتاسىنىڭ, ارنايى ماقساتتاعى ءبولىمشەلەردىڭ سالتاناتتى شەرۋى, ۇشۋ توبىنىڭ ونەرى ۇسىنىلدى.
ايتا كەتۋ كەرەك, بۇل جيىننىڭ نەگىزگى ماقساتى – جاستار اراسىندا اسكەري-پاتريوتتىق تاربيە جۇمىسىن جەتىلدىرۋ.
قايرات ءابىلدينوۆ,
«ەگەمەن قازاقستان»
قاراعاندى وبلىسى