گاز ءتاريفى وسە مە؟

وسىعان وراي قوعامدىق تىڭداۋدىڭ استانادا وتەتىندىگى اتىراۋ كاسىپكەرلەرىن الاڭداتىپ وتىر «قازترانسگازايماق» اك­تسيو­نەرلىك قوعامىنىڭ وبلىس­تىق فيليالى گازدىڭ قۇ­نىن كوتەرۋگە قام جاساپ وتىر. تابيعي گاز ءتاريفى وسەتىنىنەن حاباردار بولعان اتىراۋلىق كا­سىپكەرلەردەن مازا كەتتى.ولاردىڭ پىكىرىنشە, بۇل  كاسىپ­كەرلىكتىڭ دامۋىنا ەداۋىر كەدەرگى كەلتىرۋى مۇمكىن. سول سەبەپتەن, «اتامەكەن» ۇلتتىق كاسىپكەرلەر پالاتاسى اتىراۋ وبلىستىق في­ليالىنىڭ ديرەكتورى, «نۇر وتان» پارتياسىنىڭ ءوڭىر­لىك فيليالى جانىنداعى كاسىپ­كەر­لىكتى قولداۋ جونىندەگى قوعام­دىق كەڭەس توراعاسى اسىل­بەك جاكيەۆ اتالعان ماسە­لەنى پارتيا الاڭىندا تالقى­لاۋ­دى ۇيعارىپتى. قوعامدىق كەڭەس مۇشەلەرى الدىندا  «قازترانسگازايماق» اكتسيو­نەر­لىك قوعامىنىڭ اتىراۋ ءوندى­رىستىك فيليالىنىڭ ديرەك­تورى ماقسۇت ابۋوۆ ءتاريفتىڭ جوعارىلاۋى كاسىپورىن­نىڭ ينۆەستيتسيالىق باعدار­لا­ماسىندا قارالعان جۇمىستاردىڭ اۋقىمىمەن بايلانىستىرادى. الايدا, قوعامدىق كەڭەس ءمۇ­شەلەرى «قازترانسگازايماق­تىڭ» وندىرىستىك بازاسىن حالىق­تىڭ قالتاسىنا سالماق ءتۇسىرۋ ارقىلى جاقسارتۋىنا كەلىس­پەيدى. كاسىپكەرلەر الەمدىك ەكو­نو­ميكالىق داعدارىس تۇسىن­دا ءتاريفتىڭ ءوسۋىن ورىنسىز دەپ سانايدى. «قازترانسگازايماق» اكتسيونەرلىك قوعامى­نىڭ اتىراۋ وندىرىستىك فيليالىنىڭ ديرەكتورى ماقسۇت ءابۋوۆتىڭ ءمالىم ەتۋىنشە, 2015 جىلدىڭ 1 شىلدەسىنەن بەرى ءبىر تەكشە مەتر گازدى تاسىمالداۋ ءۇشىن 1 266,54 تەڭگە مولشەرىندەگى وتەمدىك ءتاريفى قولدانىلادى. ەندى كومپانيانىڭ ءتاريفتى ءوسىرۋ جونىندەگى وتىنىمىندە 2016-2020 جىلدارى ءبىر مەتر گازدى تاسىمالداۋ ءتاريفى ءتورت جىلعا بولگەندە ءبىر تەكشە مەتر ءۇشىن 5 701,42 تەڭگە بولۋى ءتيىس ەكەن. دەمەك, بۇل قازىرگى قولدانىستاعى باعادان 4,5 ەسەگە كوپ بولعالى تۇر. وسىعان وراي كومپانيا قوعامدىق تىڭداۋ وتكىزۋدى جوسپارلاپتى. الايدا, مۇنايلى ءوڭىر تۇرعىندارى ءۇشىن ماڭىزدى ماسەلە ورتاعا سالىناتىن قوعامدىق تىڭداۋ 17 ماۋسىمدا اتىراۋدا ەمەس, استانادا وتكەلى وتىر.  نەگە بۇلاي؟ اتىراۋ تۇرعىندارىنا قاجەتتى ماسەلە استانادا ەمەس, نەگە جەرگىلىكتى جەردە تالقىلانبايدى؟ ءيا, راسىندا كاسىپكەرلەر ءتاريفتىڭ وسۋىنە ءبىر, قوعامدىق تىڭداۋدىڭ استانادا وتەتىندىگىنە ەكى الاڭداپ وتىر. كاسىپكەرلەر كوڭىلىن كۇپتى ەتكەن ماسەلەنىڭ باستى سەبەبىنە توقتالار بولساق, «تەك قانا گاز باعاسى عانا كوتەرىلمەيدى. گازبەن بىرگە جىلۋدىڭ دا ءتاريفى كوتەرىلەدى. سەبەبى, قازىر سۋ گاز قوندىرعىلارىمەن  ىسىتىلادى. ەلەكتر ەنەرگياسى دا گازدى تۇتىنۋ ارقىلى وندىرىلەدى. ءونىمىمىز بار. ءونىمىمىزدىڭ بارلىعى وسى ەلەكتر, سۋعا, گاز باعالارىنا بايلانىستى» – دەيدى  وبلىستىق ءماسليحاتتىڭ  دەپۋتاتى  ءادىل جۇبانوۆ. جولداسبەك شوپەعۇل, «ەگەمەن قازاقستان» اتىراۋ