استانا قالاسىندا وتكەن الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ جۇمىس توبىنىڭ كەزەكتى وتىرىسى اياسىندا قازاقستاننىڭ جەتەكشى ءدىني بىرلەستىكتەرىنىڭ باسشىلارىنىڭ ەكسترەميزم مەن تەرروريزمگە قارسى ءىس-قيمىل ماسەلەلەرى جونىندەگى ۇندەۋگە قول قويۋ ءراسىمى ءوتتى.
ۇندەۋگە قازاقستان مۇسىلماندارى ءدىني باسقارماسىنىڭ, قازاقستان پراۆوسلاۆيە شىركەۋىنىڭ, ريم-كاتوليك شىركەۋىنىڭ جانە قازاقستاننىڭ يۋدەي قاۋىمداستىعىنىڭ باسشىلارى قاتىستى.
قابىلدانعان ۇندەۋدە ەكسترەميزم مەن تەرروريزم يدەولوگياسىنا قارسى تۇرۋعا, قوعامدىق تۇراقتىلىقتى ساقتاۋعا, سونىمەن قاتار, قازاقستاننىڭ ءوسىپ-وركەندەۋى جولىنداعى ەتنوسارالىق جانە كونفەسسياارالىق كەلىسىمدى ودان ءارى نىعايتۋعا جۇمىلدىرىلعان بىرلەسكەن كۇش-جىگەردىڭ ماڭىزدىلىعى اتاپ كورسەتىلگەن.
«ءبىز, قازاقستاننىڭ جەتەكشى ءدىني بىرلەستىكتەرىنىڭ باسشىلارى مەن وكىلدەرى, قازاقستان رەسپۋبليكاسى پرەزيدەنتىنىڭ باستامالارىنا قولداۋ بىلدىرە وتىرىپ, ەكسترەميزم مەن تەرروريزمنىڭ كەز كەلگەن كورىنىستەرى مەن تۇرلەرىن ءۇزىلدى-كەسىلدى قابىلدامايمىز, زورلىق-زومبىلىقتىڭ كەز كەلگەن ءتۇرىن ءدىني تۇرعىدان اقتاۋ ارەكەتتەرىن ايىپتايمىز. ءدىن مەن ەكسترەميزمنىڭ ۇيلەسپەيتىنىن مالىمدەيمىز, جازىقسىز ادامداردىڭ ولىمىنە اكەلىپ سوعاتىن الەمنىڭ ءتۇرلى ايماقتارىندا ورىن الىپ جاتقان قاتىگەز تەرروريستىك ارەكەتتەرگە ۇلكەن الاڭداۋشىلىق بىلدىرەمىز», دەلىنگەن ۇندەۋدە.
«ەگەمەن-اقپارات»