وليمپيادانىڭ باستالۋىنا 62 كۇن قالدى
جىگىتتەر جۇلدەسىز بولمايتىندارىنا سەنىمدى
كۇن ساناپ وليمپيالىق ويىندار وتەتىن ۋاقىت جاقىنداپ كەلەدى. ەندى ەكى ايدان ءسال عانا ارتىق مەرزىم ىشىندە ريو-دە-جانەيروداعى «ماراكانا» ستاديونىندا الاماننىڭ الاۋى لاپ ەتىپ تۇتانىپ, ءتورت جىلدا ءبىر اينالىپ كەلەتىن جاھاندىق جارىستىڭ باستالعانىن جاريا ەتەدى. مەزگىلى تاياعان سايىن دۇنيەجۇزىلىك دۇبىرگە ءدۇبىر قوساتىن ساڭلاقتار سانى ارتىپ, ەسىمدەرى ايقىندالا تۇسۋدە. وسى قاتارداعى قازاقستان سپورتشىلارى قازىرگە دەيىن 88 ليتسەنزيا الىپ ۇلگەردى.
ويىندار وتەتىن شاق جاقىنداعان سايىن ونىڭ توڭىرەگىندەگى اڭگىمەلەر دە كۇشەيىپ كەلەدى. دالىرەك ايتقاندا, ريودا بۇعان جاقسى جاعداي جاسالاتىنىنا كۇمان كەلتىرۋشىلەر كوپ. ەڭ باستى قاۋىپ, بۇل ەلدە زيكا ناۋقاسىنىڭ كوبىرەك تاراپ كەتكەنى بولىپ وتىر. وسىعان بايلانىستى قاۋىپكە قاتەر ۇلاستىرىپ جاتقاندار دا بار. ال ءبىز ءبارىنىڭ ءساتتى وتەتىنىنە سەنگىمىز كەلەدى.
اۋىر اتلەتتەر بايگەگە كىمدى قوسادى؟
اۋىر اتلەتيكادان بۇگىنگى كۇننىڭ باستى سۇراعى وسى بولىپ تۇر. ال ونى شەشەتىن باستى جارىس كەشە تالدىقورعان قالاسىنداعى جاستار سپورت سارايىندا باستالدى. ماۋسىمنىڭ 3-نەن 7-نە دەيىنگى ارالىقتا جالاۋ جەلبىرەتەتىن قازاقستان چەمپيوناتى كوماندا ءۇشىن بەرىلىپ وتىرعان 10 ليتسەنزيانى كىمدەردىڭ الاتىنىن انىقتايدى.
بىرىنشىلىككە قاتىسۋ ءۇشىن مۇندا رەسپۋبليكانىڭ تۇكپىر-تۇكپىرىنەن ەكى جۇزدەن استام اتلەت كەلىپ وتىر. وسى باسەكەنىڭ قورىتىندىسىمەن قازاقستان وليمپيالىق قۇراماسىنىڭ ساپى قۇرالادى. جارىستار كۇن سايىن تاڭەرتەڭگى 11-دە باستالادى. ولاردىڭ بارىسىنان «قازاقستان» جانە «Kazsport» تەلەارنالارى تىكەلەي ەفيردە رەپورتاجدار جۇرگىزىپ تۇرادى.
قازاقستان بوكسشىلارى مەدال ءۇشىن كۇرەسەدى
قازاقستان بوكسشىلارى ريو-دە-جانەيرو رينگىندە مەدال الۋ ءۇشىن شايقاساتىن بولادى. ولاردىڭ كەمىندە ءبىر جۇلدە الىپ قايتۋعا تولىق مۇمكىندىكتەرى بار. «استانا ارلانس» كاسىپقويلار كومانداسىنىڭ باس جاتتىقتىرۋشىسى نۇرلان اقۇرپەكوۆ وسىنداي بولجام ايتادى. – ءبىزدىڭ كوماندانىڭ ءۇش جۇلدەنى دە الۋعا تولىق مۇمكىندىكتەرى بار. مەن ولاردىڭ قاي ءتۇرىنىڭ دە كوبىرەك بولعانىن قالايمىن. سونىڭ ىشىندە, التىن جۇلدەسىز قالماۋىمىز كەرەك, – دەدى ول.
جاتتىقتىرۋشى قۇراما ساپىنداعى جىگىتتەردىڭ ءبارى تاجىريبەلى ەكەنىن, الداعى الامان جارىستا قاي-قايسىسىنىڭ دا جوعارى بيىكتەن كورىنە الاتىنىن اتاپ ءوتتى.
ايتا كەتەتىن جايت, قازاقستاننىڭ بوكسشىلار قۇراماسى وسى وليمپيادادا ءبىرىنشى رەت تولىق قۇرامىمەن ونەر كورسەتكەلى وتىر. ولار ەلىمىزدىڭ باس كومانداسى ءۇشىن باسى 1996 جىلدان ارنا تارتاتىن ويىنداردىڭ بارلىعىنان دا مەدال الىپ ورالدى. سونىڭ ىشىندە التىن مەدالسىز قايتقان وليمپيالىق ويىندارىمىز دا بولعان جوق. بۇل جولى ريودا ەلىمىزدىڭ نامىسىن ءبىرجان جاقىپوۆ, ولجاس ساتتىباەۆ, قايرات ەراليەۆ, بەرىك ءابدىراحمانوۆ, ابىلايحان ءجۇسىپوۆ, دانيار ەلەۋسىنوۆ, جانىبەك ءالىمحان ۇلى, ادىلبەك نيازىمبەتوۆ, ۆاسيلي لەۆيت جانە يۆان دىچكو قورعاعالى وتىر. ولاردىڭ قاي-قايسىسى دا جوعارى جەتىستىككە جەتە الادى.
رەسەي ويىندارعا جەڭىل اتلەتتەرسىز بارۋى مۇمكىن
رەسەي جەڭىل اتلەتيكا قۇراماسىنىڭ ريو-دە-جانەيروعا بارا الماي قالۋ قاۋپى ءتونىپ تۇر. حالىقارالىق جەڭىل اتلەتيكا فەدەراتسيالارى اسسوتسياتسياسىنىڭ (IAAF) ءۇش مۇشەسى جاقىندا وسىندا بولجام ءبىلدىردى. بۇعان اسسوتسياتسيانىڭ 2015 جىلعى 13 قاراشادا تىيىم سالىنعان پرەپاراتتاردى پايدالانۋعا جول بەرىپ قويعانى ءۇشىن بۇكىلرەسەيلىك جەڭىل اتلەتيكا اسسوتسياتسياسىن ءوزىنىڭ قاتارىنان شىعارىپ تاستاعانى نەگىزگى سەبەپ بولعالى تۇر.
رەسەيلىكتەرگە الدا پايدالانىپ قالۋدى كەرەك ەتەتىن ءبىر عانا مۇمكىندىك بار. ول – IAAF-تىڭ 17 ماۋسىم كۇنى وتەتىن كەڭەس وتىرىسى. ەگەر وسى جيىندا بۇكىلرەسەيلىك جەڭىل اتلەتيكا اسسوتسياتسياسى ءوزىنىڭ قۇقىقتارىن قالپىنا كەلتىرىپ, قايتادان حالىقارالىق قاۋىمداستىققا مۇشە بولىپ كىرە السا, رەسەي جەڭىل اتلەتتەرىنىڭ ويىندارعا قاتىسۋعا جولدارى اشىلادى. ال بۇعان قول جەتپەسە, سپورتشىلار امالسىز قالىپ قويادى.
بيىلعى جىلعى 14 ءساۋىر كۇنى ءوتكەن تىكەلەي ەفير حابارى كەزىندە رەسەي پرەزيدەنتى ۆلاديمير پۋتين ەلدىڭ جەڭىل اتلەتيكا ۇلتتىق قۇراماسىنىڭ باس جاتتىقتىرۋشىسى يۋري بورزاكوۆسكيگە كوماندانى ويىندارعا دايىنداۋ جونىندە تاپسىرما بەردى. مەملەكەت باسشىسى سونداي-اق, سپورت مينيسترلىگىنىڭ رەسەي سپورتشىلارىنىڭ قۇقىقتارى ءۇشىن كۇرەسۋدى جالعاستىراتىنىن اتاپ وتكەن ەدى.
زيكا ۆيرۋسى جۇرتتى ءالى قاتتى ۇرەيلەندىرىپ وتىر
الەمدى جايلاپ بارا جاتقان زيكا ۆيرۋسىنىڭ ءبىر وشاعى برازيليا ەكەنى, مۇنداعى احۋالدىڭ ءالى دە قاۋىپتى كۇيىندە قالىپ تۇرعانى وليمپيادا قارساڭىندا جۇرتشىلىقتى ۇرەيلەندىرە باستادى. مۇنىڭ سوڭى مەديتسينا سالاسىنداعى 150 ساراپشىنىڭ زيكا ۆيرۋسىنا بايلانىستى وليمپيالىق ويىنداردى باسقا قالاعا اۋىستىرۋ جونىندە حات جازۋعا ۇلاستى.
دارىگەرلەر مالىمدەمەلەرىن دۇنيەجۇزىلىك دەنساۋلىق ۇيىمىنىڭ باس ديرەكتورى مارگارەت چەننىڭ اتىنا جولداعان. عالىمدار جاھاندىق جارىستى بيىل توقتاتىپ تاستاۋعا شاقىرىپ وتىرعان جوق. بىراق دودانى ريودا قالدىرۋعا بولمايتىنىن ايتادى. ولار تەك برازيليادا ويىندار ءوتىپ جاتسا, ءبىر مەزگىلدە 500 مىڭ شەتەلدىك تۋريستەردىڭ زيكا دەرتىن جۇقتىرىپ, ءوز ەلدەرىنە الىپ كەتەتىنىن ايتىپ ساقتاندىرادى. ەگەر بۇل كەسەل افريكا مەن وڭتۇستىك ازيانىڭ كەدەي ەلدەرىنە تاراپ جاتسا, احۋالدىڭ كۇرت ناشارلاپ كەتەتىنىن اتاپ وتەدى. «ويىندار ءۇشىن تاۋەكەلگە بارۋ ادامگەرشىلىككە جاتپايدى», – دەپ جازادى حات اۆتورلارى.
ساراپشىلار ريو-دە-جانەيرونىڭ اتالمىش ىندەتتىڭ كوبىرەك تاراۋ ىقتيمالدىلىعى جوعارى ەكىنشى قالاسى ەكەنىنە دە نازار اۋدارادى. بۇل قالاداعى دەنساۋلىق ساقتاۋ جۇيەسى ناشار. ال زيكا باسىلۋدىڭ ورنىنا باسىنىپ بارادى, دەپ اتاپ كورسەتەدى حات جازۋشىلار. وسىعان وراي دۇنيەجۇزىلىك دەنساۋلىق ساقتاۋ ۇيىمىنان بۇل ماسەلەنى تالداپ شەشەتىن تاۋەلسىز كونسۋلتاتسيالىق توپ قۇرۋدى ۇسىنادى.
ايتا كەتەيىك, زيكا اۋرۋى Aedes تەكتى ماسانىڭ شاعۋىنان تارايدى. ونى جۇقتىرعان ادامنىڭ ىستىعى كوتەرىلىپ, دەنەسى قىشيدى, باسى اۋىرىپ, بۋىندارى ءىسىپ كەتەدى.
سەرىك ءپىرنازار,
«ەگەمەن قازاقستان»