استانا. 3 ماۋسىم. ازەربايجاندا تاياۋ ارالىقتا مەكتەپتەردە ورىس تىلىندە وقىتۋ جۇيەسىنىڭ توقتاتىلۋى مۇمكىن. بۇل تۋرالى Oxu.Az پورتالىنا اقپارىنا سۇيەنگەن egemen.kz ءتىلشىسى حابارلادى.
ناسيمي اتىنداعى ازەربايجان ءتىل ءبىلىمى ينستيتۋتىنىڭ عىلىمي قىزمەتكەرى دجاحيد يسمايىلوگلۋ ورىس ءتىلىنىڭ يمپەريادان قالعان قالدىق بولىپ تابىلاتىنىن ايتادى. ونىڭ پىكىرىشە, جاعداي بۇلاي بولىپ كەتە بەرسە, ازەربايجان ءتىلىنىڭ دامۋىنا ەداۋىر كەدەرگى كەلتىرىلەدى. سوندىقتان ورىس تىلىندە وقىتۋ جۇيەسىنەن قىسقا مەرزىم ىشىندە قۇتىلۋ كەرەك.
«ءبىز, ازەربايجاندار, ۇزاق جىلدار بويى ەكى ءتىل جاعدايىندا ءومىر ءسۇرىپ كەلدىك تە, ورىس تىلىنە ايرىقشا ماڭىز بەردىك, كەي جاعدايلاردا ول انا تىلىمىزدەن دە اسىپ ءتۇسىپ تۇردى», – دەيدى ول. ماماننىڭ ايتۋىنشا, قازىرگى تاڭدا ازەربايجاندا ورىس ءتىلىن دامىتۋدىڭ ۇلكەن نەگىزى بار, ەندى ءبىلىم جۇيەسىندە ورىس سەكتورىنىڭ بولا بەرۋى ازەربايجان ءتىلىنىڭ, سونىڭ ىشىندە بالالار ادەبيەتىنىڭ دامۋىنا كوپ كەدەرگى كەلتىرەدى.
«سوندىقتان ءبىزدىڭ ەلىمىزدە تۋعان تىلىمىزدە ءبىلىم الۋ ەشبىر بالاماسىز مىندەتتى نارسە بولۋعا ءتيىس, ورىس سەكتورىن جويۋىمىز كەرەك, ال ورىس ءتىلىن شەتەل تىلدەرى قاتارىندا وقىتۋعا كوشكەن ءجون. ولاي بولماعان جاعدايدا تۋعان ءتىلدى دامىتۋعا دەگەن سۇرانىس بولماي قالىپ, ازەربايجان ءتىلىن دامىتۋ تەجەلە بەرەدى», – دەدى عىلىمي قىزمەتكەر سوسىن.
«ءبىر مىسال كەلتىرەيىن. بۇگىندە اتا-انالاردىڭ كوپشىلىگى وزدەرىنىڭ بالالارىن ورىس سەكتورىندا وقىتىپ جۇرگەندەرىن ازەربايجان تىلىندەگى مەكتەپتەردى وقۋ قۇرالدىرى مەن ادەبيەتتىڭ جەتىمسىزدىگىمەن بايلانىستىرادى. راس, بىزدە مۇنداي جەتىمسىزدىك بار. بىراق ءدال قازىرگىدەي التەرناتيۆتى تىلدە ءبىلىم الۋ جالعاسىپ تۇرعان كەزدە بۇل جەتىمسىزدىكتىڭ بولعانى – بولعان, ءوز تىلىمىزدە وقۋعا دەگەن ىنتا ءازىر تۋا قويمايدى», – دەپ اتاپ ءوتتى يسمايىلوگلۋ.
تالعات رايىمبەك.
دەرەك, فوتو: Oxu.Az.