بۇۇ-نىڭ نيۋ-يوركتەگى شتاب-پاتەرىندە قازاقستان رەسپۋبليكاسىنىڭ بۇۇ-نىڭ ەنەرگەتيكا بويىنشا تۇراقتى دامۋ ماقساتتارىن ىسكە اسىرۋعا قوسقان ۇلەسى تۋرالى جوعارى دەڭگەيدەگى ءىس-شارا وتكىزىلدى.
ونىڭ شەڭبەرىندە استانا قالاسىندا وتەتىن ەكسپو-2017 كورمەسىن تانىستىرۋ ءراسىمى بولدى. شارانى ۇيىمداستىرۋعا قازاقستان رەسپۋبليكاسىنىڭ بۇۇ جانىنداعى تۇراقتى وكىلدىگى, بۇۇ ەكونوميكالىق جانە الەۋمەتتىك ماسەلەلەر دەپارتامەنتى, ەڭ ناشار دامىعان ەلدەر, تەڭىزگە شىعۋ ءمۇمكىندىگى جوق دامۋشى ەلدەر جانە شاعىن ارالدىق دامۋشى ەلدەر بويىنشا بۇۇ باس حاتشىسىنىڭ ورىنباسارىنىڭ ءوفيسى قاتىستى.
كەزدەسۋدىڭ تابىستى وتۋىنە «استانا ەكسپو-2017» ۇلتتىق كومپانياسى, نازارباەۆ ۋنيۆەرسيتەت جانە G-Global حالىقارالىق حاتشىلىعى ءوز ۇلەسىن قوستى.
ءىس-شاراعا قاتىسۋشىلار – بۇۇ جانىنداعى تۇراقتى وكىلدىكتەردىڭ ەلشىلەرى مەن ساراپشىلارى, ۇكىمەتتىك ەمەس ۇيىمداردىڭ, عىلىمي جانە ىسكەرلىك توپتاردىڭ وكىلدەرى 2030 جىلعا قاراي ەنەرگياعا جالپىعا بىردەي قولجەتىمدىلىكتى قامتاماسىز ەتۋ ءۇشىن بۇۇ-نىڭ, ۇلتتىق ۇكىمەتتەردىڭ, بيزنەستىڭ, ازاماتتىق قوعام مەن باسقا دا مۇددەلى تاراپتاردىڭ كۇش-جىگەرىن ۇيلەستىرۋ بويىنشا پىكىر الماستى.
ءىس-شارا بارىسىندا بۇۇ باس حاتشىسىنىڭ ورىنباسارى گيان چاندرا اچاريا, بۇۇ باس حاتشىسىنىڭ ەكونوميكالىق دامۋ بويىنشا كومەكشىسى لەنني مونتيەل, بۇۇ باس حاتشىسىنىڭ ارنايى وكىلى – بارشا ءۇشىن تۇراقتى ەنەرگەتيكا باستاماسىنىڭ جەتەكشىسى رەيچەل كايت, نازارباەۆ ۋنيۆەرسيتەتتىڭ يننوۆاتسيالار بويىنشا ۆيتسە-پرەزيدەنتى قانات بايعارين, G-Global باسشىسىنىڭ ورىنباسارى مۇرات قارىمساقوۆ, ۇكىمەتتىك ەمەس ۇيىمداردىڭ, اكادەميالىق جانە ىسكەرلىك توپتاردىڭ وكىلدەرى ءسوز سويلەدى.
ەكسپو-2017 وكىلى رۋسلان جەمكوۆ كورمەگە دايىندىق بارىسى جانە سالىنعان وبەكتىلەردى كورمەدەن كەيىنگى پايدالانۋ تۋرالى ەگجەي-تەگجەيلى اڭگىمەلەپ, ونىڭ تۇساۋكەسەرىن جاسادى. قاتىسۋشىلار ەنەرگيا تيىمدىلىگىن ارتتىرۋ, بالامالى ەنەرگيا كوزدەرىن دامىتۋ جانە قازىرگى زامانعى ەنەرگيا كوزدەرىنىڭ جالپىعا بىردەي قولجەتىمدىلىگىن قامتاماسىز ەتۋ سالاسىنداعى ۇلتتىق ساياساتپەن تانىستىرىلدى.
سونداي-اق, قازاقستان پرەزيدەنتى نۇرسۇلتان نازارباەۆتىڭ استانادا بۇۇ قامقورلىعىمەن «جاسىل» تەحنولوگيالار مەن ينۆەستيتسيالىق جوبالاردى دامىتۋ بويىنشا حالىقارالىق ورتالىق قۇرۋ باستاماسىنا قاتىستى اقپارات بەرىلدى.
سوڭىنان وتكەن تالقىلاۋ بارىسىندا ءىس-شاراعا قاتىسۋشىلار «بولاشاقتىڭ ەنەرگياسى» تاقىرىبىندا ەكسپو-2017 مامانداندىرىلعان حالىقارالىق كورمەسىن وتكىزۋ قازاقستاننىڭ ەنەرگەتيكا سالاسىنداعى جاھاندىق ماقساتتارعا جەتۋگە قوساتىن ناقتى ۇلەسى بولىپ تابىلاتىنىن اتاپ ءوتتى.