الماتى. 2 ماۋسىم. مومىش ۇلى مەن اقىن سارا كوشەلەرىنىڭ قيىلىسىنداعى №136 تۇرعىن ءۇيدىڭ («العاباس-6» ىقشام اۋدانى) تۇرعىندارى ءتۇن ىشىندە قاعىلعان دابىلمەن سىرتقا شىعارىلدى. سەبەبى, 9 قاباتتى تۇرعىن ءۇيدىڭ ءبىر جاعىنا شوگىپ, اۋا باستاعانى بايقالعان. بۇل تۋرالى الماتى قالالىق توتەنشە جاعدايلار دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
توتەنشە وقيعا بولعان جەردە قازىر قالالىق جانە الاتاۋ اۋداندىق اكىمىنىڭ قۇزىرلى وكىلدەرى مەن قۇتقارۋشىلار, قۇقىق قورعاۋ ورگاندارىنىڭ قىزمەتكەرلەرى, ءورت سوندىرۋشىلەر مەن جەدەل جاردەم قىزمەتىنىڭ ماماندارى ءجۇر. اۋماق قورشالعان. بوتەن ادام كىرىگىزىلمەيدى. تۇعىندار ءۇيدىڭ قيسايۋى ءبىر اي توقتاۋسىز جاۋعان جاڭبىردىڭ سالدارىنان بولۋى مۇمكىن دەگەن بولجام ايتۋدا.
ىشكى ىستەر مينيسترلىگى توتەنشە جاعدايلار كوميتەتىنىڭ رەسمي وكىلى رۋسلان يمانقۇلوۆتىڭ مالىمدەۋىنشە, تەز ارادا سىرتقا شىعارىلعان 200-گە جۋىق ادام شاتىرلى قالاشىقتار مەن قوناق ۇيلەرگە جايلاستىرىلدى. قۇرىلىسشى مامانداردان قۇرىلعان كوميسسيا ىسكە كىرىستى. تۇرعىن ءۇيدىڭ جارامدى-جارامسىزدىعى تۋرالى اقتىق شەشىمدى سولار ايتادى.
تالعات ءسۇيىنباي.
دەرەك, فوتو: الماتى قالالىق توتەنشە جاعدايلار دەپارتامەنتىنىڭ ءباسپاسوز قىزمەتى.