ورال وڭىرىندە جەر رەفورماسىنا بايلانىستى قوعامدىق كەڭەستىڭ كەڭەيتىلگەن وتىرىستارى وتكىزىلىپ كەلەدى. وعان ءوڭىر باسشىلىعى, مەملەكەتتىك قۇرىلىمدار مەن قوعامدىق ۇيىمداردىڭ جانە ساياسي پارتيالار مەن ازاماتتىق قوعام ينستيتۋتىنىڭ وكىلدەرى قاتىسىپ ءجۇر. سونداي-اق, وسى ماجىلىستەردە اۋىل شارۋاشىلىعى سالاسىنىڭ مايتالماندارى ءوز وي-پىكىرلەرىن ورتاعا سالۋدا. باسقوسۋدا كىم-كىمنىڭ دە ءوز پىكىرلەرىن بىلدىرۋىنە مۇمكىندىك بەرىلۋدە. سونىڭ ناتيجەسىندە جۇزگە تارتا ازاماتتاردىڭ وي-پىكىرى حاتتاماعا تىركەلدى.
سوڭعى كەزدە قوعامدا ءارتۇرلى پىكىر تۋعىزۋعا سەبەپشى بولعان جەر كودەكسىنە ەنگىزىلگەن وزگەرىستەر مەن تولىقتىرۋلار جونىندە قوعامدىق ۇيىمدار مەن ساياسي پارتيالار مۇشەلەرى بىزگە ءوز ۇسىنىس پىكىرلەرىن اشىق ايتتى. سوعان ساي قوعامدىق كەڭەستىڭ كەڭەيتىلگەن تورالقا ءماجىلىسى وتكىزىلدى. اتالعان جيىندا جەرگە بايلانىستى ءتيىستى مەكەمە باسشىلارىنىڭ ەسەپتەرى تىڭدالدى. وسى ارادا ايتا كەتەرلىك جايت «قوعامدىق كەڭەستەر تۋرالى» زاڭنىڭ 5 جانە 7-باپتارى نەگىزىندە ءبىزدىڭ ۇيىمنىڭ مەملەكەتتىك ورگاندارعا ۇسىنىس تۇسىرۋگە قۇزىرەتى بار. وسى مۇمكىندىگىمىزدى پايدالانىپ اتالمىش جيىننىڭ قورىتىندىسى بويىنشا وبلىس اكىمىنىڭ اتىنا ۇسىنىس تۇسىردىك.
مۇندا ءبىز زاڭعا ەنگىزىلگەن نورمالاردى ءتيىستى مەملەكەتتىك ورگاندار وكىلدەرىمەن ءتۇسىندىرۋ جۇمىستارى ءوز دەڭگەيىندە ۇيىمداستىرىلماعانىن اتاپ كورسەتتىك. بولاشاقتا ماڭىزى جوعارى زاڭدار مەن وسى زاڭدارعا ەنگىزىلەتىن تولىقتىرۋلار مەن وزگەرىستەردى حالىق اراسىندا كەڭىنەن ۇيىمداستىرۋ قاجەتتىلىگىن ءومىردىڭ ءوزى دالەلدەدى دەۋگە بولادى. وسى ارادا قوعامدىق كەڭەستەردىڭ ماجىلىستەرىندە پىكىر بىلدىرگەن ساياسي پارتيا, ۇكىمەتتىك ەمەس ۇيىمدار, شارۋاشىلىق جەتەكشىلەرى جانە جەكەلەگەن ازاماتتاردىڭ ۇسىنىستارىن وقىرماندار نازارىنا بەرە كەتكەننىڭ ارتىقشىلىعى جوق دەپ ەسەپتەيمىن.
ماسەلەن, قوعام قايرەتكەرى, ۇكىمەتتىك ەمەس ۇيىم جەتەكشىسى عازيز حايمۋلدين بۇرىنعى مەنشىك يەلەرى تاستاپ كەتكەن جەرلەردى مەملەكەت مەنشىگىنە قايتارىپ يگەرۋ ماسەلەسىنە توقتالدى. بۇل ءۇشىن جەردى قازاقستاندىقتارعا جالعا بەرۋ كەرەكتىگىن ايتتى. ال وبلىستىق قوعامدىق كەڭەستىڭ مۇشەسى ءاليا ساليەۆانىڭ ويىنشا, نارىق زامانىندا جەردىڭ جالپى قولدانىستا بولۋى مۇمكىن ەمەس. قولىنان ءىس كەلەتىن ازاماتتار جەردى جالعا الۋعا نەمەسە مۇمكىندىگى بولسا ساتىپ الىپ, مەملەكتتىك باعدارلامالاردى پايلالانىپ ول جەرلەردىڭ ەل ءۇشىن دە, ءوزى ءۇشىن دە پايدا اكەلۋ باعىتىندا جۇمىس ىستەۋى ءتيىس.
زەلەنوۆ اۋدانىنداعى شارۋا قوجالىعىنىڭ باسشىسى سەرگەي شونايبەكوۆ جەر كودەكسىنە ەنگىزىلگەن جاڭا قاعيداتتار مەن نورمالاردا شارۋالار ءۇشىن ءتيىمدى تۇستار مول ەكەنىن جەتكىزدى. سونىمەن بىرگە, ول رەسپۋبليكالىق كوميسسيا مەن رەسپۋبليكا ۇكىمەتى الداعى ۋاقىتتا جەر ماسەلەسىنە قاتىستى بىرلەسكەن شەشىمدەر مەن قاۋلىلار شاعىرعان كەزدە ءار ءوڭىردىڭ ەرەكشەلىگىن ەسكەرگەنى دۇرىس بولاتىنىن ءبىلدىردى.
ءتۇيىپ ايتقاندا, ءتاۋەلسىزدىگىمىزدىڭ شيرەك عاسىرلىق كەزەڭىندە ەلباسىنىڭ سىندارلى ساياساتىنىڭ ارقاسىندا كوپتەگەن جەتىستىككە جەتتىك. مۇنى كوپۇلتتى ەلىمىزدىڭ ءبىر شاڭىراقتىڭ استىندا ءوزارا كەلىسىم مەن تاتۋلىق ارقىلى قول جەتكىزگەن تابىسى دەپ باعالاعانىمىز ءجون. حالقىمىزدىڭ سوزگە توقتاي بىلەتىن ءمارت قاسيەتى بار. ولار ءارتۇرلى كۇردەلى ماسەلەلەر تۋىنداعان تۇستا ونى جينالىپ, ءوزارا كەڭەسىپ ءبىر-ءبىرىن تىڭداي ءبىلۋ ارقىلى شەشكەن. بۇگىنگى قوعامدىق كەڭەستەردىڭ قىزمەتىندە دە حالقىمىزدىڭ سول ءداستۇرىنىڭ ىزدەرى مەن بەلگىلەرى بار ەكەنى انىق. وسىلايشا, ءبىز دە ەل يگىلىگى ءۇشىن ءتيىستى زاڭ نورمالارىن كەلىسە وتىرىپ قابىلداۋىمىز قاجەت. بۇل پىكىرىمنىڭ جەر رەفورماسىنا دا تىكەلەي قاتىسى بار ەكەنىن كوزىقاراقتى وقىرمان ايقىن اڭعارىپ وتىر دەپ بىلەمىن.
ەربول سالىقوۆ,
باتىس قازاقستان وبلىستىق
قوعامدىق كەڭەسىنىڭ توراعاسى
باتىس قازاقستان وبلىسى