1 ماۋسىم – حالىقارالىق بالالاردى قورعاۋ كۇنىنە وراي وتكىزىلگەن قايىرىمدىلىق اكتسياسى اياسىندا استانا SOS بالالار اۋىلىنىڭ تاربيەلەنۋشىلەرى ءوز قولدارىمەن باتپىراۋىق جاساۋدى ۇيرەنىپ, وزدەرى جاساعان ونداعان باتپىراۋىقتى ۇشىرىپ كوردى. ەۋرازيالىق توپ (ERG) ۇيىمداستىرعان ۇشۋ اپپاراتتارىن جاساۋدى ۇيرەتەتىن شەبەرلىك ساباعى ەل تاۋەلسىزدىگىنىڭ 25 جىلدىعىنا ارنالىپ وتىر.
بالالاردىڭ مەرەيلى مەرەكەسىندە اۋەزدى ءان مەن كۇمبىرلەگەن كۇي شالقىدى. ويتكەنى, بالالار اۋىلىنىڭ تاربيەلەنۋشىلەرىنە ەرەكشە قۋانىش سىيلايتىن ەسكى دوستارى كەلدى. بالعىندار وسى دوستارىمەن قاناتتاسا, قاتار ءجۇرىپ اۋىل اۋماعىندا سپورت الاڭىن سالىپ, جەمىس-جيدەكتەر اللەياسىن دا بىرلەسە وتىرعىزعان بولاتىن. ەرتە كوكتەمدە ەگىلگەن سول ماۋەلى اعاشتار بۇگىندە گۇلدەپ, كوپ وتپەي جەمىس ءتۇيىپ, العاش رەت ءونىم بەرمەك.
شارانى SOS بالالار اۋىلىنىڭ ديرەكتورى زاۋرەش ارىستانوۆا اشىپ بەردى. «ءبىزدىڭ بۇرىننان كەلە جاتقان دوستارىمىز – ەۋرازيالىق توپ وزدەرى بۇگىنگى اكتسيانى وتكىزۋ تۋرالى باستاما كوتەرىپ, ونى جۇزەگە اسىرىپ وتىر. ولار بىزبەن ۇزاق مەرزىمدى ارىپتەستىك ورناتۋمەن شەكتەلمەي, ءاربىر مەرەكە سايىن قاسىمىزدان تابىلادى. بالالاردىڭ جازعى دەمالىسىن ۇيىمداستىرۋعا جاردەمدەسۋدەن بولەك, كومپانيا ەڭ سەنىمدى ارقاسۇيەر دوس رەتىندە ءبىزدىڭ تۋىنداعان كەز كەلگەن تۇيتكىلدەرىمىزدى شەشۋگە بارىنشا كۇش سالىپ كەلەدى», – دەدى ول.
بالالار اۋىلى بيىل باستى مەرەكەنى جىلداعىدان ەرەكشە سيپاتتا اتاپ ءوتۋدى ۇيعارىپتى. بۇعان دەيىن ءتۇرلى فلەشموبتار بىرنەشە رەت ۇيىمداستىرىلعانىمەن, بۇل جولعى شارانىڭ ءمانى بولەك. كىشكەنتاي بۇلدىرشىندەر انيماتورلارمەن كوڭىل كوتەرىپ جۇرگەن شاقتا, ەرەسەك بالالار ارنايى ۇيىمداستىرىلعان شەبەرلىك ساباعىنا قاتىسىپ, باتپىراۋىق جاساۋدى ۇيرەندى. ءسويتىپ, شاراعا قاتىسۋشىلاردىڭ قىزۋ قولداۋىمەن بالالار قولىنان شىققان ونداعان باتپىراۋىق پەن اۋە شارلارى كوككە كوتەرىلىپ, اسپاندا قالىقتادى. شاراعا قاتىسۋشىلاردىڭ ايتۋىنشا, اسپاندا قالىقتاعان باتپىراۋىقتار تۋعان ەلدىڭ قارقىندى دامىپ, قانات جايۋىنىڭ بەلگىسىندەي بولىپ كورىنىپتى.
قوسىمشا توسىن سىي رەتىندە ەۋرازيالىق توپ اتىنان بالالار ۇيىنە 5 ملن. تەڭگەلىك چەك تابىس ەتىلدى. ەۋرازيالىق توپتىڭ اپپارات جەتەكشىسى سەيىتقالي راحىموۆ تابىس ەتكەن سىيلىق SOS بالالار اۋىلى تاربيەلەنۋشىلەرىنىڭ جازعى دەمالىسىن ۇيىمداستىرىپ, قوعامدىق شارالارعا بەلسەنە قاتىسۋىنا جانە سپورتتىق جابدىقتار ساتىپ الۋعا جۇمسالماق.
قايىرىمدىلىق – اسىل قاسيەت, ىزگىلىكتىڭ كورىنىسى. ول كومەككە مۇقتاج جاندارعا سۇيىسپەنشىلىكپەن بەرىلەتىن كومەك. سونداي-اق, كىسىنىڭ اينالاسىنداعى ادامدارعا دەگەن ىقىلاسى مەن ادامگەرشىلىك قارىم-قاتىناسى. قاباعىنا قاراپ ءحالىن, جۇزىنە قاراپ جانىن تۇسىنەتىن حالىق ەمەسپىز بە, مۇنداي شاراپاتى مول ساۋاپتى ءىستى, باقىتتان باستارى اينالعان بالا جۇرەگى دە سەزگەندەي اسەر قالدىردى.
كىم بىلەدى, بالكىم بالعىن بۇلدىرشىندەر وسىنداي مەرەكەنىڭ كۇندە ءوتۋىن ىشتەي ارمانداپ تا وتىرعان بولار. بۇل ءسات ونداعى بالالار ءۇشىن شات-شادىمان باقىتقا كەنەلگەن كۇندەردىڭ ءبىرى بولىپ ماڭگى ەستەرىندە قالماق.
– بالالاردىڭ باسىم بولىگى اسىعا كۇتكەن جازعى دەمالىس باستالدى. ەندى ساباققا دايىندالۋ قامىنا الاڭداماي ەركىن دەمالۋعا بولادى. مەن سەندەردىڭ الداعى ۋاقىتتى كوڭىلدى وتكىزىپ, جاقسىلاپ دەمالىپ, كۇش-قۋات جيناپ قايتۋلارىڭا تىلەكتەسپىن. ءبىزدىڭ ءداستۇرلى سىيلىعىمىز وسىعان سەپ بولادى دەپ سەنەمىن. ءبىزدى سەندەردىڭ جازعى دەمالىستارىڭنىڭ جاقسى, كوڭىلدى ءارى پايدالى وتۋىنە قولعابىس ەتە العانىمىز قۋانتادى. دەمالىس اياقتالىپ, ساباق باستالعان كەزدە «جازدى قالاي وتكىزدىم» اتتى تاقىرىپقا شىعارما جازۋدان توسىلمايسىڭدار دەگەن ۇمىتتەمىز», – دەدى س. راحىموۆ.
ERG مەن SOS بالالار اۋىلى ەرتەدەن ەرەكشە ىقىلاستى ءارى سەنىمدى دوستار. توپتىڭ «ERG كومەك» كورپوراتيۆتىك قورى وسى بالالار اۋىلىنىڭ تاربيەلەنۋشىلەرىن 2007 جىلدان بەرى تۇراقتى قولداپ كەلەدى. بۇگىندە قارجىلاندىرۋدىڭ جالپى سوماسى 34 ملن. تەڭگەگە جەتتى. بۇل قاراجات مەكەمەنىڭ استاناداعى اۋماعىنا سپورت الاڭىن سالۋعا, بالالاردىڭ جازعى دەمالىسىن ۇيىمداستىرۋعا, قازاقستانداعى SOS بالالار اۋىلىنىڭ تاربيەلەنۋشىلەرىنە ءVىى قىسقى ازيا ويىندارى اشىلۋ سالتاناتىنىڭ بيلەتتەرىن ساتىپ الۋعا, بالالار سۋرەتتەرىنىڭ بايقاۋلارى مەن وزگە دە كوپتەگەن ءىس-شارالاردى ۇيىمداستىرۋعا جۇمسالدى.
ەۋرازيالىق توپ تەك SOS بالالار اۋىلىنا كومەك كورسەتۋمەن عانا شەكتەلىپ قالماي, كومپانيانىڭ وندىرىستىك كاسىپورىندارى ورنالاسقان وڭىرلەر – اقتوبە, قاراعاندى, قوستاناي جانە پاۆلودار وبلىستارىنداعى بالالار ۇيلەرىنە تۇراقتى قامقورلىق كورسەتىپ كەلەدى. سوڭعى جىلدارى ERG دەمەۋشىلىك پەن قايىرىمدىلىق شارالارىنا 70 ملرد. تەڭگەگە جۋىق قاراجات باعىتتاعان.
راۋشان تاۋىرحانقىزى,
«ەگەمەن قازاقستان»