قازىر اقشا تولەپ شىعۋعا بولاتىن باسىلىمدار, كەز كەلگەن ورىندى ج ۇلىپ اپەرەتىن اقىلى كوممەرتسيالىق كونكۋرستار مەن جوبالار جۇرتتى شارشاتتى. ال شىنايى تالانتتار قاشاندا قولداۋعا ءزارۋ. ارينە ونىڭ ىشىندە دارىندى بالالار دا بار.
ال ەندى ءانشى بولعىم كەلەدى, ءانشى بولسام دەپ ارماندامايتىن بالا كەمدە-كەم. ءاربىر بالانىڭ كەۋدەسىنەن جارىپ شىققان تىلەگى ولاردى قاناتتاندىرىپ, ساحناعا جەتەلەيتىنى انىق. سوندىقتان وسىنداي ۇلكەن ارمانداردىڭ كۋاسى بولىپ جۇرگەنىنە 15 جىل بولعان التىن ماحانبەتوۆا ەشقانداي دەمەۋشىسىز «ءانشى بولعىم كەلەدى» جۋرنالىنىڭ العاشقى نومىرلەرىن شىعارىپ ۇلگەردى.
– العاشقى اۆتورلىق جوبام «ءانشى بولعىم كەلەدى» تەلەۆيزيالىق ءان بايقاۋى 2002 جىلى ناۋرىز ايىندا ەفيرگە شىققان ساتتەن باستاپ, جۇزدەگەن بالاقاندار جۇزدەرى بال-بۇل جانىپ, ءبىرىنشى قادامدارىن جاساعان ەدى. ولاردىڭ الدى قازىر ەسترادا جۇلدىزدارى. قانشاما اقىن-سازگەرلەر وسى «ءانشى بولعىم كەلەدىنىڭ» اياسىندا باقىتتى بالالىق شاق اۋەندەرىن جازىپ, ءوز ۇلەستەرىن قوسا ءبىلدى. ەندىگى قۋاناتىنىم بالالار اندەرى كوپتەپ دۇنيەگە كەلە باستادى, الايدا سول اندەردىڭ ناسيحاتى ءالى كۇنگە دەيىن كەمشىن. ارينە, اندەردىڭ ءبارى بىردەي ساپالى, بالا جاسىنا لايىقتى بولماۋى مۇمكىن. بىراق, سارالاي كەلگەندە, نەبىر ادەمى, جەڭىل, ويناقى, مازمۇندى اندەرى جەتىپ ارتىلادى. وسىنداي ماسەلەلەردى ويلاي كەلە, بالالارعا ارنالعان مۋزىكالىق-تانىمدىق جۋرنال شىعارۋ كوپتەن كوكەيىمدە ءجۇر ەدى, – دەيدى جوبا جەتەكشىسى التىن ماحانبەتوۆا.
– ەلىمىزدە بالالارعا ارنالعان مەرزىمدى ءباسپاسوز جوق ەمەس, جەتكىلىكتى. بىراق مۋزىكالىق جۋرنال العاش رەت بالالار يگىلىگىنە ۇسىنىلدى. تاعى ءبىر وزگەشەلىك, ءار ءنومىر سايىن جۋرنالمەن بىرگە ءۇنتاسپاسى دا قاتار شىعىپ وتىرادى. انجيناقتا ەلىمىزگە تانىمال كومپوزيتورلاردىڭ بالالارعا ارناعان 10 ءانى ونەرلى ورەندەر مەن ەسترادا وكىلدەرىنىڭ ورىنداۋىندا تۇراقتى تۇردە بەرىلۋدە. سونداي-اق, سول 10 ءاننىڭ اۋەنى (مينۋسوۆكا) قوسا بەرىلەدى. بۇل كاسىبي ارلەۋشىلەرگە (ارانجيروۆكاشى) مۇقتاج, مينۋسوۆكاعا ءزارۋ اۋىل بالالارى ءۇشىن ۇلكەن كومەك. ماسەلەن, ءانشى بولعىسى كەلەتىن بالاپاندار ەندىگى جەردە مينۋسوۆكا ىزدەپ اۋرە بولمايدى, جۋرنالدى جازدىرىپ السا, التى ايدا 60 ءتۇرلى ءان مەن مينۋسوۆكاسى قولدارىنا تيەدى, – دەيدى جۋرنالدىڭ باس رەداكتورى قانشايىم بايداۋلەت.
قىسقاسى, بالاعا ءوز جاسىنا لايىقتى ءان ايتقىزىپ, ولەڭ جاتتاتۋدى ماقسات تۇتقان يدەيا اۆتورلارى بۇل جۋرنالدىڭ كوممەرتسيالىق جوبا ەمەستىگىن, ۇلتتىق مۋزىكالىق مۇرالاردى دا جانداندىرۋعا قۇرىلعانىن جانە كەلەشەكتە كوبىنەسە جازىلىمعا يەك ارتاتىندىعىن ايتادى.
ايناش ەسالي,
«ەگەمەن قازاقستان»
الماتى