ەلورداداعى تۇڭعىش پرەزيدەنت مۋزەيىندە حالىقارالىق بالالاردى قورعاۋ كۇنىنە ارنالعان «شىعارماشىلىق شەكسىزدىگى» كورمەسى اشىلدى. سونىمەن قاتار, شەبەرلىك-ساعاتتارى جانە «ءۆى جۇلدىزاي» قورىنىڭ مۇمكىندىكتەرى شەكتەۋلى بالالار شىعارماشىلىعىنىڭ ءحى رەسپۋبليكالىق فەستيۆالىنىڭ «بەينەلەۋ ونەرى» جانە «ساندىك قولدانبالى ونەر» اتالىمدارى بويىنشا جەڭىمپازداردى ماراپاتتاۋ ءراسىمى ءوتتى.
مەرەكەلىك باعدارلاما مۋزەيدىڭ «بالالىق شاقتان كوزقاراس» جوباسىنىڭ اياسىندا «ءۆى جۇلدىزاي» قايىرىمدىلىق كورپوراتيۆتىك قورى, بالالار كوركەمونەر مەكتەبى – يۋنەسكو كلۋبى جانە قازاقستاننىڭ ۇلتتىق وليمپيادا كوميتەتىمەن بىرلەسىپ ۇيىمداستىرعان بولاتىن. كورمەنىڭ اشىلۋ سالتاناتىندا اتالعان مۋزەي ديرەكتورى الما ساعىنعالي, «BI جۇلدىزاي» كورپوراتيۆتىك قورى ديرەكتورىنىڭ ورىنباسارى التىناي ءتاڭىربەرگەنوۆا, بالالار كوركەمسۋرەت مەكتەبى – يۋنەسكو كلۋبىنىڭ ديرەكتورى گۇلزيا يسەنوۆا, قازاقستاننىڭ ۇلتتىق وليمپيادا كوميتەتىنىڭ وكىلى جىگەر ازبەرگەنوۆ ءسوز سويلەپ, يگى شارانىڭ ماقسات-مۇددەسىنە از-كەم توقتالىپ, بۇلدىرشىندەرگە ءساتتى قادام تىلەدى.
«ءۆى جۇلدىزاي» قورىنىڭ بالالار شىعارماشىلىعىنىڭ رەسپۋبليكالىق فەستيۆالى قازاقستاننىڭ بارلىق ايماعىنان جينالعان بالالاردىڭ باسىن قوستى. 11 جىل ىشىندە فەستيۆالگە 35 583 بالا قاتىسقان ەكەن. فەستيۆال تۇلەكتەرى Bala Tukvisyon كونكۋرسىنا, بەلايا تروست فەستيۆالىنە, مۋز-تۆ 2015 پرەمياسىنا قاتىسۋعا جانە قازاق ۇلتتىق ونەر ۋنيۆەرسيتەتىنىڭ ستۋدەنتى اتانۋ مۇمكىندىگىنە يە بولدى.
فەستيۆال ءبىلىم جانە عىلىم مينيسترلىگىنىڭ جانە وبلىستىق, قالالىق مادەنيەت باسقارمالارىنىڭ قولداۋىمەن جىل سايىن وتكىزىلىپ كەلەدى. رەسپۋبليكالىق فەستيۆالدىڭ العاشقى ىرىكتەۋ كەزەڭى ءساۋىردىڭ 5-ءسى مەن 20-سى ارالىعىندا ەلىمىزدىڭ 16 قالاسىندا وتكىزىلدى. قازىلار القاسى قاتىسۋشىلاردىڭ تالانتتارىن 6 نوميناتسيا بويىنشا باعالادى: «حورەوگرافيا», «ۆوكالدىق ورىنداۋ», «اسپاپتى ورىنداۋ», «ولەڭدى ىمداپ ورىنداۋ», «ساندىك-قولدانبالى ونەر», «بەينەلەۋ ونەرى».
بالالار شىعارماشىلىعىنا ارنالعان رەسپۋبليكالىق كونكۋرس ءداستۇرلى تۇردە 1 ماۋسىم – حالىقارالىق بالالاردى قورعاۋ كۇنىندە «قازاقستان» ورتالىق كونتسەرت زالىندا جالعاسقان گالا-كونتسەرتپەن اياقتالدى.
راۋشان سۇلەيمەنوۆا