«قۋانسا, بالا قۋانسىن», دەيمىز. بالا – بولاشاق, بالا – ءومىر جالعاسى. قازاقستان رەسپۋبليكاسى ۇلتتىق ۇلانىنىڭ ەلوردا ءىرگەسىندەگى 5573 اسكەري بولىمىندە بالالار كۇنىنە ورايلاستىرىلىپ مەرەكەلىك قايىرىمدىلىق شارا ءوتتى.
وعان استانا قالاسىنىڭ كامەلەتكە تولماعانداردى بەيىمدەۋ ورتالىعىنىڭ تاربيەلەنۋشى جاسوسپىرىمدەرى, ۇلاندىق اسكەري قىزمەتشىلەردىڭ بالالارى قاتىسىپ, 300-دەن اسا ءبۇلدىرشىن قۋانىشقا تولى مەرەكەنىڭ كۋاگەرى بولدى.
الدىمەن مادەنيەت ۇيىندە بالالار ءتۇرلى مۋلتفيلمدەردى تاماشالادى. ونەرپازدار تەاترلاندىرىلعان قويىلىمدار قويدى. «ادام-ورمەكشى», «تەڭىز قاراقشىلارى» سىندى كوپكە تانىمال كينوتۋىندىلار كەيىپكەرلەرىنىڭ كەيپىنە ەنىپ كيىنگەن ارتىستەر بالالارمەن ءبىرگە ءتۇرلى ويىندار وينادى. ۇلتتىق ۇلاننىڭ تاربيە جانە الەۋمەتتىك قۇقىقتىق جۇمىستار ءجونىندەگى باس باسقارماسى باستىعىنىڭ ورىنباسارى پولكوۆنيك قانات بەلياكوۆ: «تاربيە – تال بەسىكتەن», دەيدى حالقىمىز. وسىنداي قىزىقتى دا يگىلىكتى شارالار ۇيىمداستىرۋعا ۇلتتىق ۇلان باس قولباسشىلىعى جىل سايىن ەرەكشە كوڭىل ءبولىپ كەلەدى. بۇل سول شارالاردىڭ باستاماسى. الداعى ۋاقىتتا وسىنداي جۇمىستار ءار وڭىردە, ءار اسكەري ءبولىمدە ۇيىمداستىرىلماقشى, دەپ اتاپ ءوتتى.
مۇنان كەيىن بالالار قارۋ-جاراق كورمەسىن, ۇلاندىقتاردىڭ ساپتىق الاڭدا كورسەتكەن «ءاسكەري دەفيلە» ونەرىن تاماشالادى.
قورىتا ايتقاندا, بۇل كۇن ءار ءبۇلدىرشىننىڭ ەسىندە شاتتىقتىڭ شىرايىن شاشقان ءسات رەتىندە ساقتالىپ قالارى ءسوزسىز.
ارمان اۋباكىروۆ,
مايور