اقتوبە – بولاشاقتا ۇلكەن اگلومەراتسيالىق ورتالىق بولاتىن قالا. سوندىقتان دا, قالانىڭ كەلبەتى كەلگەن-كەتكەندى سۇيسىندىرەتىندەي كورىكتى دە كوركەم بولۋى كەرەك. بۇل باعىتتا قالا تازالىعىن قالىپتى ۇستاۋ ماڭىزدى. وسى ماقساتتا جاقىندا وبلىس ورتالىعىن اباتتاندىرۋ, كوگالداندىرۋ جانە بەزەندىرۋ بويىنشا ءموبيلدى شتاب قۇرىلدى. شتاب قۇرامىنا كاسىپكەرلىك, ساۋلەت جانە قۇرىلىس, ىشكى ىستەر, توتەنشە جاعدايلار بولىمدەرىنىڭ وكىلدەرى, سونىمەن بىرگە, قالالىق ءماسليحات دەپۋتاتتارى مەن قوعامدىق كەڭەس مۇشەلەرى كىردى. وعان اقتوبە قالاسى اكىمىنىڭ ءبىرىنشى ورىنباسارى جاندوس بايىرحانوۆ توراعالىق ەتەدى.
ءموبيلدى شاتاب جۇمىسقا كىرىسىپ تە كەتتى. شتاب مۇشەلەرى ك.نوكين كوشەسىنە رەيد جۇرگىزىپ, «MirCom», «West Oil», «باتىسقازجارمەڭكە», «سۇلتان» ءسۇ, «عالىم» مەيرامحاناسى, بىرنەشە تەحنيكالىق قىزمەت كورسەتۋ بەكەتتەرى مەن اۆتوجۋ ورتالىقتارىنىڭ اۋماقتارىن قاراپ شىقتى. ساۋدا نىساندارىنىڭ يەلەرىنە ونداعان ەسكەرتۋ جاسالىپ, ون كۇن مەرزىمدە ولقىلىقتاردى قالپىنا كەلتىرۋگە تاپسىرما بەرىلدى.
«MirCom» جشس ديرەكتورى ءازيز ادايبەكوۆكە تال ەگىپ, كوشەتتەردى رەتكە كەلتىرۋ, سونىمەن بىرگە, جاساندى گۇلدەردىڭ ورنىنا گۇلزارلارعا ءتىرى گۇل ەگۋگە ۇسىنىستار جاسالدى. عيماراتتىڭ ماڭدايىنداعى جارنامالىق باننەرلەرگە قاتىستى دا سىن ايتىلدى. جارناما ورنالاستىرۋعا رۇقسات تەك ءبىر جىلعا بەرىلەتىنى بەلگىلى, الايدا, اتالعان سەرىكتەستىك ماڭىنداعى باننەرگە قاراپ, كۇن جەپ, جەلشايعان جارنامانىڭ بىرنەشە جىل قاتارىنان ءىلىنىپ تۇرعانىن اڭعارۋعا بولادى.
وزگە ساۋدا نىساندارىنىڭ وكىلدەرىنە دە جارىقتاندىرۋ, عيماراتتاردىڭ قاسبەتتەرىن قالپىنا كەلتىرۋ, اۋماقتارىن كوگالداندىرۋ ۇسىنىلدى.
شتاب قالانى اباتتاندىرۋ, كوگالداندىرۋ جانە بەزەندىرۋ بويىنشا جىل بويى رەيدتەر ۇيىمداستىرادى. قالا اكىمىنىڭ ءبىرىنشى ورىنباسارى جاندوس بايىرحانوۆتىڭ ايتۋىنشا, تەكسەرىلگەن ءاربىر شارشى مەتر نازاردان تىس قالمايدى. ءموبيلدى توپتار قالا كوشەلەرىنە كۇن سايىن شىعىپ, شاعىن جانە ورتا بيزنەس نىساندارىن, سونداي-اق, بانكتەردىڭ قالاداعى فيليالدارى مەن مەملەكەتتىك مەكەمەلەردى دە تەكسەرىپ وتىرماق.
ساتىبالدى ءساۋىرباي,
«ەگەمەن قازاقستان»
اقتوبە وبلىسى