20 جىلعا سوتتالۋى كەرەك
ستۋدەنت ايگەرىم وسپانبەكوۆانى ولتىرگەنى ءۇشىن كۇدىكتى رەتىندە ۇستالعان الىشەر ارعىنباەۆقا قاتىستى العاشقى سوت وتىرىسى شىمكەنتتەگى ءال-فارابي اۋداندىق سوتىندا ءوتتى. ارعىنباەۆتىڭ قىلمىسى تولىق دالەلدەنگەن جاعدايدا ول 20 جىلعا دەيىن سوتتالۋى ابدەن مۇمكىن. ال كۇدىكتىنىڭ ادۆوكاتى ونىڭ ەكى جاس بالاسى بار ەكەندىگىن ەسكەرىپ, ءۇي قاماعىنا الۋدى ۇسىنعان ەدى. بىراق سۋديا عاني بايارىستان كۇدىكتىنىڭ اسا اۋىر قىلمىس جاساعانىن العا تارتىپ, ادۆوكاتتىڭ ءوتىنىشىن قابىلداماي تاستادى.
ايگەرىم مامىر ايىنىڭ 10-ى كۇنى سارىاعاش اۋدانىنان شىمكەنتكە جول تارتىپ, ءىز-ءتۇزسىز جوعالدى. قالاداعى «حالىقتار دوستىعى» ۋنيۆەرسيتەتىندە وقيتىن قىزىنىڭ حابارسىز كەتكەنىنە مازاسىزدانعان اكەسى پوليتسياعا شاعىمدانعان. ستۋدەنتتىڭ ءىز-ءتۇزسىز جوعالۋى اتا-انا, تۋعان-تۋىسقانىنىڭ عانا قابىرعاسىنا ايازداي باتقان جوق. ونى ىزدەۋشىلەردىڭ قاتارىندا پوليتسيادان بولەك, ەرىكتىلەردىڭ قاتارى مول بولدى. جاستىق جالىنى لاپىلداپ, ارمانى ىشىندە كەتكەن قارشاداي قىزدىڭ دەنەسى ارادا 14 كۇن وتكەننەن كەيىن تابىلدى.
وقو ءىىد قىلمىستى ىزدەستىرۋ باسقارماسىنىڭ باسشىسى نۇريددين داۋىلباەۆ ايگەرىم وسپانبەكوۆانىڭ دەنەسى سارىاعاش – شىمكەنت باعىتىنداعى تاس جولدىڭ وڭ جاعىنداعى باعىس اۋىلىنا باستايتىن جول جاعاسىنان ءجۇز وتىز مەتر جەردەن تابىلعانىن ايتادى.
ساراپتاما انىقتاعانداي, ايگەرىم كەۋدەسى مەن ىشىنە سۇعىلعان وتكىر زاتتان كوز جۇمعان. كەيىنىرەك بەلگىلى بولعانداي, قانىشەر وتۆەرتكا سۇققان ەكەن. وسىلايشا, ورىمدەي جاس قىزدىڭ ءومىرى ءۇزىلدى. بەيكۇنا, قورعانسىز قىزدىڭ اللا الدىنداعى اماناتىن قيعان قانىشەر ەكى جاس بالاسىنىڭ بارلىعىن العا تارتىپ, ۇيقاماققا شىعۋعا نيەتتى, كەشىرىم وتىنەدى. كەيىن بەلگىلى بولعانداي, ايگەرىم ءوزى مىنگەن تاكسي جۇرگىزۋشىسىنەن قاۋىپتەنىپ, جاتاقحاناداعى قۇربىسىنا شىمكەنتتەگى كىرە بەرىستەگى ايالدامادان كۇتىپ الۋىن ءوتىنىپ, قالتا تەلەفونىمەن حابار بەرگەن ەكەن.
ەندى, مىنە, تارازىنىڭ ءبىر باسىندا قىزىنان ايىرىلىپ اڭىراپ قالعان اتا-انا, ەكىنشى باسىندا وڭ مەن سولىن تانىماي جاتىپ قامقورسىز قالعان شيەتتەي ەكى جاس بالا. ەكى جاققا دا وڭاي ەمەس. بىراق, ءوزى ارداقتايتىن وتباسى بارىن قولى قالتىراماي جاس قىزدى ءولتىرىپ جاتقاندا ويلاماعاندىعى قانىشەردىڭ قاندى قولىن جۋا الماق ەمەس.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى