ەۋروپانىڭ ەكى دۇركىن چەمپيونى اتاندى
پورتۋگاليانىڭ پورتو قالاسىندا وتكىزىلگەن ارداگەر سپورتشىلار اراسىنداعى ەۋروپا چەمپيوناتىندا كوكشەتاۋلىق بوريس نۇعمانوۆقا تەڭ كەلەر ەشكىم تابىلمادى.
الەمنىڭ 14 مەملەكەتىنەن 140 سپورتشى قاتىسقان دودالى جارىستا بوريس نۇعمانوۆ گىر كوتەرۋدەن قوس سايىستا ەكى بىردەي التىن مەدالدى جەڭىپ الدى. تارتىستى باسەكەدە كوكشەلىك اقساقال جۇلقي جانە سەرپە كوتەرۋدە الدىنا جان سالمادى.
بيىل ءوزىنىڭ 70 جىلدىعىن اتاپ وتكەن بوريس اعامىز بۇعان دەيىن دە حالىقارالىق جارىستارعا قاتىسىپ, جۇلدەلى ورىنداردى ەنشىلەگەنىن بىلەمىز. ونە بويى ونەگەگە تولى ب.نۇعمانوۆتىڭ وبلىستىق, رەسپۋبليكالىق جارىستاردا مەرەي بيىگىنەن كورىنىپ جۇرگەن شاكىرتتەرى دە كوپتەپ سانالادى.
– پورتۋگالياداعى ءبىز قاتىسقان جارىستا گىر كوتەرۋشى ستۋدەنتتەردىڭ ءVى الەم چەمپيوناتى قاتار وتكىزىلدى. سپورتشىلاردىڭ اياق الىسىن باقىلاپ وتىردىم. بايقاۋىمشا, ءبىزدىڭ ستۋدەنتتەرىمىز ولاردان كەم تۇسپەيتىن سياقتى. سوندىقتان, جاستاردى سپورتتىڭ وسى تۇرىنە باۋلىپ, ءوزىم دە بۇعان بەلسەنە قاتىسسام دەيمىن, دەيدى ارداگەر اعامىز.
باقبەرگەن امالبەك,
«ەگەمەن قازاقستان»
اقمولا وبلىسى