پارلامەنت ءماجىلىسىنىڭ زاڭناما جانە سوت-قۇقىقتىق رەفورما كوميتەتىنىڭ دەپۋتاتتارى وڭتۇستىك قازاقستان وبلىسىنىڭ ورداباسى, سايرام, وتىرار اۋداندارى مەن تۇركىستان قالاسىندا بولدى, دەپ حابارلادى ءماجىلىستىڭ ءباسپاسوز قىزمەتى.
ساپار كەزىندە اۋدان اكىمدەرىمەن, جەكە سوت ورىنداۋشىلارمەن, قۇقىق قورعاۋ ورگاندارىنىڭ وكىلدەرىمەن كەزدەسۋلەر ءوتتى. سونىمەن قاتار, شىمكەنت قالاسىندا وڭتۇستىك قازاقستان وبلىسىنىڭ جەكە سوت ورىنداۋشىلارى قاتىسقان كەزدەسۋ ءوتتى. كەزدەسۋ كەزىندە قىزىقتى جانە ناقتى اڭگىمە بولدى. جەكە سوت ورىنداۋشىلارىنىڭ قىزمەتىنە قاتىستى پروبلەمالىق ماسەلەلەر تالقىلاندى. پروكۋراتۋرا, سوت, ىشكى ىستەر ورگاندارىنىڭ وكىلدەرى تىڭدالدى.
ساپار كەزىندە جەكە سوت ورىنداۋشىلارىنىڭ جۇمىستارى بويىنشا تۇرعىنداردىڭ ءپىكىرى تىڭدالىپ, دەپۋتاتتار تۇرعىندارمەن جانە ءوتىنىش بەرۋشىلەرمەن كەزدەسۋلەر ءوتكىزدى. ال ساپاردىڭ ناتيجەسى بويىنشا دەپۋتاتتار وڭتۇستىك قازاقستان وبلىسىنىڭ اكىمى ب.اتامقۇلوۆپەن دە كەزدەستى.
سونداي-اق, جەكە سوت ورىنداۋ ينستيتۋتىن جەتىلدىرۋ ماسەلەلەرى تالقىلانعان دوڭگەلەك ۇستەل ءوتتى. وعان پارلامەنت دەپۋتاتتارى, «نۇر وتان» پارتياسى قۇقىقتىق كەڭەسىنىڭ مۇشەلەرى, ادىلەت, قۇقىق قورعاۋ ورگاندارىنىڭ, جەكە سوت ورىنداۋشىلارى رەسپۋبليكالىق پالاتاسىنىڭ, ازاماتتىق قوعامنىڭ وكىلدەرى جانە ساراپشىلار قاتىستى.