ورال. 1 ماۋسىم. باتىس قازاقستان وبلىسىنىڭ جاڭاقالا اۋداندىق اۋرۋحاناسىندا ەستىگەن ادامدى ەستەن تاندىرارلىق وسپادار وقيعا ورىن الدى. وپەراتسيا ۇستەلىندە پاتسيەنت قانعا بوگىپ جاتقاندا, دالىزدە دارىگەرلەر ءبىر-بىرلەرىمەن توبەلەسىپ كەتتى. بۇل تۋرالى «نادەجدا» گازەتىنىڭ دەرەگىنە سىلتەمە جاساعان egemen.kz ءتىلشىسى حابارلادى.
باسىلىمنىڭ مالىمەتىنشە, جامباسىنان جاراقات الىپ, قانسىراپ جاتقان اۋرۋ وپەراتسيا ۇستەلىنە جاتقىزىلىپ, وتاعا دايىندىق جاسالا باستاعان كەزدە كوريدوردا حيريرگ پەن انەستەزيولوگ باستاعان دارىگەرلەر ءوزارا الدەنەگە كەلىسە الماي, ءبىر-بىرلەرىمەن توبەلەسىپ كەتكەن. ولاردىڭ جاعا ۇستاسۋلارى سول دالىزدە تۇرعان ۆيدەوباقىلاۋعا ءتۇسىپ قالعان.
ال روليكتى رەداكتسياعا سول كەزدە ءوزىنىڭ ومىرىنە اراشا سۇراپ وپەراتسيا ۇستەلىندە قانسىراپ جاتقان پاتسيەنت راديسلاۆ سابىرعاليەۆتىڭ اناسى اكەلىپ بەرگەن. وكىنىشتىسى, جىگىت سول جەردە ءجانتاسىلىم ەتكەن. انانىڭ ايتۋىنشا, ونىڭ ۇلى دارىگەرلەردىڭ ءوز مىندەتتەرىن ورىنداپ, جەدەل كومەك كورسەتۋ ورنىنا ءبىر-بىرلەرىمەن ەسەپ ايىرىسىپ, جۇدىرىق سىلتەسىپ كەتۋلەرى سالدارىنان قايتىس بولعان.
«مەن دارىگەرلەردى, اتاپ ايتقاندا, باس دارىگەردى, باس دارىگەردىڭ ورىنباسارىن, انەستەزيولوگتى, سول كۇنى كەزەكشىلىكتە تۇرعان دارىگەر-ناركولوگتى جازالاۋدى تالاپ ەتەمىن. ولاردىڭ ءبارى مەنىڭ ۇلىما ۋاقتىلى جاردەم كورسەتىلمەگەنى ءۇشىن كىنالى», - دەيدى قايتىس بولعان جىگىتتىڭ اناسى روزا يمانعاليەۆا.
بۇل قايعىلى وقيعا وتكەن جىلدىڭ جەلتوقسان ايىندا ورىن العان. ەكى جىگىت اۋدان ورتالىعىنا جاقىن ماڭعا بالىق اۋلاۋعا بارادى. ەدىلسور كولىنە جاقىن ماڭداعى جەكە مەنشىك تەرريتوريادا بەلگىسىز بىرەۋ ولارعا قاراپ وق اتادى. سونىڭ ءبىرى 38 جاستاعى راديسلاۆتىڭ جامباسىنا تيەدى.
وسىدان كەيىن دوسى جاراقات العان جىگىتتى اۋدان ورتالىعىنداعى اۋرۋحاناعا جەتكىزەدى. بىراق ول ەمدەۋ ورنىنا جەتكەننەن كەيىن قايتىس بولىپ كەتەدى. سودان بەرگى ارالىقتا مارقۇمعا وق اتقان ادام ۇستالىپ, 8 جىلعا تۇرمەگە كەسىلەدى. ال مەديكتەر ەشقانداي جازا المايدى. راديسلاۆتىڭ تۋعان-تۋىستارى ونىڭ قازاسىنا ءوز قىزمەتتەرىنە سالدىر-سالاق قاراعان اۋداندىق اۋرۋحانا دارىگەرلەرىن كىنالى دەپ وتىر.
تەمىر قۇسايىن.
دەرەك, فوتو, ۆيدەو: نادەجدا.
https://youtu.be/GoZWTVHDsCE