ايدىڭ-كۇننىڭ امانىندا قىلجيىپ قۇلاپ جاتقانداردى, اياق استى ۇيىقتاپ كەتكەندەردى كورگەندە, نە ويلارىڭدى بىلمەي دال بولاسىڭ. كۇندەردىڭ كۇنىندە قازاقستاندىقتاردىڭ كوپشىلىگى لەتارگيالىق ۇيقىعا كەتىپ جۇرمەسە نە قىلسىن؟! ولاي دەيتىنىمىزدىڭ دە ءجونى بار. وسىدان ءبىرجارىم جىلداي ۋاقىت بۇرىن باتىس قازاقستان وبلىسىنىڭ بەرەزوۆكا اۋىلىندا مەكتەپ وقۋشىلارى ەسىنەن ايىرىلىپ, قۇلاپ تۇسكەندىگى تۋرالى وقيعا قالىڭ جۇرتتى قوبالجىتقان ەدى. ارينە, ولار كەيىن ەسىن جيدى. ايتسە دە, ۇكىمەت ۋلانعان اۋىلداردىڭ تۇرعىندارىن جاپپاي كوشىرۋگە شەشىم قابىلدادى. بەرەزوۆكا اۋىلىنان 1675, كورشىلەس بەستاۋ اۋىلىنان 133 ادام اقساي قالاسىنا قونىس اۋداراتىن بولدى.
سويتسە, ەكى اۋىل دا اتاقتى قاراشىعاناق گاز كەنىشىنە جاقىن ورنالاسقان كورىنەدى.
ايتپاقشى, باتىس قازاقستانداعى بەرەزوۆكا مەن باستاۋ اۋىلىنىڭ تۇرعىندارى سالدەن كەيىن ەسىن جيىپ جاتسا, اقمولا وبلىسىندا كالاچي مەن كراسنوگورسك اۋىلدارىنىڭ جۇرتى اياق استى ۇيقىعا باس قوياتىندى شىعاردى. ءبىر شوشىنارلىعى, تۇرعىندار كوشەدە كەلە جاتىپ-اق ۇيىقتاپ كەتەدى. ءتىپتى, كەيبىرەۋلەردىڭ قالىڭ ۇيقىعا كەتكەنى سونشالىق, ەكى-ءۇش كۇن بويى تۇياق سەرىپپەيتىن كورىنەدى. تيەسىلى ورىندار تاعى دا ۇيقىباستىلىقتىڭ ەمىن تابا الماي, ءبىراز اۋرە-سارساڭعا ءتۇستى.
كالاچيدەگى ۇيقىنىڭ تۇپكى توركىنى اۋىلعا جاقىن ماڭدا ورنالاسقان جابىق ۋران كەنىشىنەن شىعاتىن كومىرتەگى قالدىقتارىنا بايلانىستى ەكەن. كەزىندە ۋران وندىرىلگەن كەنىش بۇگىندە قاراۋسىز قالعان. قازىر ەلىمىزدىڭ وڭتۇستىگىندە شەتەلدىكتەر ءوندىرىپ جاتقان ۋران كەنىشتەرى ەرتەڭگى كۇنى وسىنداي كۇي كەشپەسىنە كىم كەپىلدىك بەرەدى؟ قازىر باقۋاتتى ءومىر ءسۇرىپ جاتقان سوزاق حالقى بولاشاقتا دەنساۋلىعىنان زارداپ شەگىپ جۇرمەسە بولعانى دا. ويتكەنى, ەسىنەن تانىپ قالىپ, بىرنەشە كۇنگە «قالعىپ كەتكەندەردى» كورگەندە, بولاشاعىمىزدىڭ قانداي بولارىن بولجاۋدىڭ ءوزى قيىن؟! الەمدە ۋران وندىرۋدەن الدىڭعى قاتاردامىز دەپ ۇرانداتىپ ءجۇرىپ, ونىڭ قورشاعان ورتاعا اكەلەتىن زاردابى ەستەن شىعىپ كەتپەگەي.
بەتپاقدالاداعى كيىكتەردىڭ قىناداي قىرىلۋى, كاسپيدەگى يتبالىقتاردىڭ اۋىق-اۋىق اجال قۇشۋى جاي عانا كەزدەيسوقتىق دەپ ايتۋعا بولا ما؟
قورشاعان ورتانىڭ قاسىرەتىن تارتقانداردى باسقا جەرگە قونىستاندىردى دەلىك, سونىمەن بار ماسەلە شەشىلە مە؟ ەكولوگيالىق تالاپتار جەتكىلىكتى دەڭگەيدە ورىندالماسا, جان-جانۋارلاردىڭ قىرىلعانى ءوز الدىنا, حالىقتىڭ جاپپاي اۋرۋعا شالدىعۋىنا اكەلىپ جۇرمەي مە؟
كىم-كىمنىڭ دە قارجىسىن سالىپ, قازبا بايلىقتى يگەرگەنىنە قارسىلىق جوق, ارينە. ەڭ باستىسى, قورشاعان ورتانى بۇلدىرمەي, بارلىعىن تالاپقا ساي اتقارىپ جاتسا, حالىق تا, جان-جانۋارلار دا الاڭسىز ءومىر كەشەدى عوي. ال ازىرگە ولاي بولماي تۇر. وسىدان كەيىن بارىپ ينۆەستورلار يگىلىگىن كورگەن وڭىردە قانداي ءىز قالادى دەگەن زاڭدى ساۋال تۋىندايدى.
شولۋشى مەن سۋرەتشى