عالىمداردىڭ ايتۋىنشا, ەلىمىزدەگى 150 مىڭ اقبوكەننىڭ قىرىلۋىنا اۋا رايىنىڭ وزگەرىسكە ۇشىراۋى جانە جۇقپالى ىندەتتىڭ كەڭ تارالۋى سەبەپ بولعان. بيىل زەرتتەۋشىلەر «دالا ارۋلارىنىڭ» مىناداي قىرىلۋلارىن ولاردىڭ تىنىس الۋ جولىنداعى قاۋىپتى باكتەريالاردىڭ شامادان تىس كوبەيىپ كەتۋىنەن كورىپ وتىر. مۇنى عالىمدار دا قۇپتادى. ويتكەنى, اۋا رايىنىڭ كۇرت وزگەرىسكە ۇشىراۋى, ياعني قىستىڭ قاتتىلىعى مەن كوكتەمگى كەزدىڭ دىمقىل كەلۋى جانۋارلار اعزاسىنداعى تەرىس اۋىتقۋشىلىققا نەگىزگى سەبەپشى بولادى ەكەن.
ۇلىبريتانيا ماماندارىنىڭ ايتۋىنشا, جانۋارلاردىڭ قىرىلۋ ەپيدەمياسى اۋا تەمپەراتۋراسىنىڭ كۇرت تومەندەۋىنەن جانە تەڭىز داۋىلى سالدارىنان ورىن الادى. شەتەلدىك زوولوگتار سونداي-اق, كيىكتەردە پاستەرەلەز اۋرۋىن الدىن الۋعا باعىتتالعان ادىستەر قازاقستاندا جوقتىڭ قاسى دەگەندى العا تارتادى. سونىمەن قاتار, ولار جانۋارلاردى ەگۋ جۇمىستارىنىڭ مەحانيزمى ەلىمىزدە قۇرىلماعان كورىنەدى.
ەندى شەتەلدىك اقپارات كوزدەرى دەرەگىنە جۇگىنسەك, 25 جىلعا جەتپەيتىن ۋاقىت ىشىندە براكونەرلەر الەمدەگى كيىكتىڭ 95 پايىزىنا جۋىعىن قىرىپ جىبەرگەن ەكەن. وسىنىڭ سالدارىنان اتالعان جانۋارلار مۇلدە جويىلىپ كەتۋگە شاق قالىپ تۇر. بۇگىندە قيىر شىعىستىڭ ءدارى-دارمەك نارىعىندا كيىك ءمۇيىزىنىڭ ءبىر گرامى ەكى فۋنت ستەرلينگتەن ساتىلادى.
ەستەرىڭىزگە سالا كەتەيىك, 2015 جىلدىڭ مامىر ايىندا كيىكتەردىڭ جاپپاي قىرىلۋى ورىن العان-دى. وسىنىڭ سالدارىنان قوستاناي, اقتوبە جانە اقمولا وبلىستارىنىڭ اۋماقتارىندا 150 مىڭنان استام دالا جانۋارىنىڭ ولەكسەسى تابىلعان بولاتىن. بۇل قازاقستان جەرىندە مەكەندەگەن بارلىق كيىكتەردىڭ تەڭ جارتىسىن قۇرايدى.
تالعات رايىمبەك,
«ەگەمەن قازاقستان»