اقتاۋلىق سانگەر نۇرجامال نۇرپەيىسوۆا – قازاقتىڭ ۇلتتىق كيىمدەرىن زاماناۋي جەتىستىكتەرمەن ساباقتاستىرا دامىتىپ كەلە جاتقان شەبەر ءارى سانگەر. ءسان الەمىندە وزىندىك ورنىن قالىپتاستىرىپ ۇلگەرگەن ونىڭ بۇيىمدارىنا – كيىمدەرى مەن اشەكەيلەرىنە شەتەلدەن دە تاپسىرىستار تۇسۋدە.
نۇرجامالدىڭ ءسان الەمى تابالدىرىعىنان اتتاعانىنا 15 جىلدان اسىپ بارادى. ۇلتتىق ويۋ-ورنەكتەردى زامان تالابىنا ساي دامىتا قولدانعان ديزاينەردىڭ باتىل قادامى مەن باستاماسى سالاداعى جاڭالىق بولدى. ناتيجەسىندە ول جەتەكشىلىك ەتەتىن ءسان ءۇيىنىڭ اتاۋىمەن ەلىمىزدە «نۇر-شاح» اتتى وتاندىق برەند قالىپتاستى.
– ءسان الەمىنە كەلگەندەگى ءبىرىنشى ماقساتىم – ۇلتتىق ويۋ-ورنەكتى كۇندەلىكتى تۇرمىسقا ەنگىزۋ بولدى. اسىرەسە, ماڭعىستاۋدىڭ وزىندىك ناقىشتارىن تانىتقىم كەلدى. ال تابىستىڭ كىلتى ەڭبەك پەن ۇنەمى ىزدەنىستە بولۋدا دەپ بىلەمىن, – دەيدى ن.نۇرپەيىسوۆا.
«نۇر-شاح» ءسان ۇيىندە 50-دەن استام قىز-كەلىنشەك ەڭبەك ەتەدى. سىپايى, ءوز ءىسىنىڭ شەبەرلەرىن تاڭداپ العان كاسىپكەر مۇقتاجدارعا دەمەۋ جاساۋدى ەستەن شىعارمايدى, مۇمكىندىگى شەكتەۋلى جانداردى جۇمىسپەن قامتىپ وتىر. ال قىزمەتكەرلەر بولسا, نۇرجامالدىڭ ادال, جاۋاپتى باسشى ەكەنىن ريزاشىلىقپەن جەتكىزەدى.
ايىنا 300-دەن استام تۋىندى دايىنداپ شىعاراتىن ءسان ءۇيىنىڭ ونىمدەرىنە دۋبايدان, رەسەيدەن سۇرانىس تۇسۋدە. بۇدان بىرنەشە اي بۇرىن «ساكۋرا» اتتى جاڭا توپتاماسىن ۇسىنعان «نۇر-شاح» ءسان ءۇيى قازىر ەكىنشى كيىمدەر جەلىسىن شىعارا باستادى. ەندى جاپپاي شىعارىلىمداعى كيىمدەر ءوندىرىسى جولعا قويىلىپ, حالىققا قولجەتىمدى باعادا ساتىلاتىن بولادى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى