قازاقستان مەن رەسەي شەكاراسىندا كونتراباندالىق جۇك مامىر ايىنىڭ باسىندا ۇستالعان. قۇجاتتا ارماتۋرا, پلاستيكالىق قۇبىر دەپ كورسەتىلگەن قاپتاردىڭ ىشىنەن شاق بولماسا ولۋگە قالعان 7 مىڭ تاسباقا شىققان. تاسباقالاردى تىرباڭداپ تىرشىلىك بەلگىسىن بىلدىرمەس ءۇشىن اياعىن ارقاسىمەن قوسىپ سكوتچپەن جاپسىرىپ تاستايدى.
قازاقستان وڭىرىنەن تەرىلىپ العان تاسباقالار ەلگە قايتارىلماس بۇرىن ورىنبورداعى ۋنيۆەرسيتەتتىڭ زوولوگيا كافەدراسىنىڭ وقىتۋشىلارى ولاردى ارناۋلى بولمەگە ورنالاستىرىپ, بيولوگتاردىڭ باقىلاۋىندا بولىپتى. تاسباقالار ەستەرىن جيىپ, كۇش-قۋات العاننان كەيىن قازاقستانعا قايتارىلدى. ولار مامانداردىڭ قاتىسۋىمەن «ارىس-قاراتاۋ» مەملەكەتتىك تابيعي قورىعىنىڭ ەرەكشە قورعالاتىن ايماعىنا جىبەرىلدى. كەيىنگى كەزدە ەشكىمگە زيانى جوق باۋىرىمەن جورعالاۋشىلارعا قيانات جاساۋشىلار كوبەيىپ كەتتى. سوندىقتان تاسباقالار ەركىندىككە جىبەرىلەردىڭ الدىندا ولاردىڭ ساۋىتىنا قىزىل بوياۋ جاعىلدى. مۇنداعى ماقسات, تاسباقاعا قاستىق قىلعىسى كەلگەندەردى ۇركىتۋ ءارى قىزىل بوياۋى ارقىلى ولاردىڭ ءارى قارايعى تىرشىلىگىن زەرتتەۋ نىسانعا الىنادى. الماتىداعى زوولوگيالىق ينستيتۋتى قىزمەتكەرلەرى اراعا اي سالىپ قايتا كەلىپ, تاسباقالاردىڭ جاڭا ورتانى جەرسىنۋىن قاداعالايدى.
وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باس مامانى باقىت مۇساليەۆ: «نەگىزىنەن عىلىمي ينستيتۋت ماماندارىمەن بىرلەسىپ جىنىسىن انىقتاپ, كەلەسى جىلى وسىندا قالا ما, قالماي ما, سونى ءبىلۋ ماقساتىندا بوياپ, كولەمىن ءبىلىپ, ءبارىن زەرتتەپ, جىبەرىپ جاتىرمىز», – دەيدى.
ادامنىڭ قاتىگەزدىگىندە شەك جوق قوي. تاسباقانى تاعام رەتىندە پايدالاناتىن قىتاي سياقتى ەلدەردە قايناپ تۇرعان قازانعا تىرىدەي تاستاپ جىبەرەدى. بايعۇس الاسۇرىپ, جانى شىعىپ كەتكەنشە جاس بالاشا شىڭعىرادى ەكەن. كەرەڭ قۇلاقتار ەستىمەيدى. ال تاسباقانىڭ قارعىسى قاتتى بولادى دەيدى. بىراق اقشا ءۇشىن بارىنە باراتىن قاسكويلەر ەرتەڭگىسىن ويلاپ جاتپايدى.
تاسباقانىڭ بۇل ءتۇرى «قىزىل كىتاپقا» ەنبەگەندىكتەن, قۇقىق قورعاۋ ورگاندارىنىڭ دا قولى قىسقا. ايىپپۇل سالادى, سوت جوق. سونى ءبىلىپ العان قاسكۇنەمدەر وسىنداي تاعىلىققا ويلانباستان بارا بەرەدى.
باقتيار تايجان,
«ەگەمەن قازاقستان»