مەملەكەت باسشىسى نۇرسۇلتان نازارباەۆ «استانا ەكسپو-2017» ۇلتتىق كومپانياسى» اق باسقارماسىنىڭ توراعاسى احمەتجان ەسىموۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋدە ا.ەسىموۆ مەملەكەت باسشىسىنا ەكسپو-2017 حالىقارالىق كورمەسىنە دايىندىق, سونداي-اق, ونىڭ مازمۇندىق تۇرعىدان جابدىقتالۋى جونىندە باياندادى.
«استانا ەكسپو-2017» ۇلتتىق كومپانياسى» اق باسقارماسىنىڭ توراعاسى قۇرىلىس جۇمىستارى كەستەگە سايكەس ءجۇرىپ جاتقانىن ايتتى. قازىرگى كەزدە 87 ەل جانە 15 حالىقارالىق ۇيىم كورمەگە قاتىساتىنىن راستاعان.
كورمە تاقىرىبىن اشاتىن تاقىرىپتىق نىساننىڭ ءبىرى «ۇزدىك تاجىريبەلەر ايماعى» پاۆيلونى بولماق. بۇل ايماقتا قاتىسۋشىلار ەنەرگەتيكا سالاسىنداعى جەتىستىكتەرىن كورسەتىپ قانا قويماي, تەحنولوگيالاردى, ستراتەگيالار مەن جوبالاردى ىلگەرىلەتۋ تۇرعىسىندا ءپىكىر جانە تاجىريبە الماسۋعا ءمۇمكىندىك الادى دەپ جوسپارلانىپ وتىر.
قازاقستان پرەزيدەنتى كەيىننەن قازاقستان پاۆيلونىن بولاشاقتىڭ مۋزەيىنىڭ نەگىزى رەتىندە پايدالانۋعا مۇمكىندىك بەرەتىن كورمە كونتەنتىنىڭ ساپالى بولۋى ءۇشىن حالىقارالىق تاجىريبەنى قولدانۋدىڭ ماڭىزدىلىعىنا نازار اۋداردى.
سۋرەتتەردى تۇسىرگەندەر
س.بوندارەنكو, ب.وتارباەۆ