استانا. 29 مامىر. بۇگىن فۋتبولدان قازاقستان پرەمەر-ليگاسىنىڭ 13-تۋرى ويىندارى وينالدى. بۇل تۋرالى egemen.kz ءتىلشىسى حابارلادى.
تۋردىڭ ءتورت بىردەي كەزدەسۋىندە ويىن تاعدىرىن جالعىز گول شەشسە, ءبىر ماتچتا ەسەپ اشىلعان جوق. ال الماتىدا وتكەن جەرگىلىكتى «قايرات» پەن ورالدىڭ «اقجايىعى» اراسىنداعى ويىن بارىسىندا جانكۇيەرلەر بەس گولدىڭ كۋاسى بولدى. ناتيجەسىندە الاڭ يەلەرى 3:2 ەسەبىمەن جەڭىسكە جەتىپ, ءبىرىنشى اينالىمدا كەتكەن ەسەنى قايتاردى. ايتا كەتەيىك, اتالعان اينالىمدا «اقجايىق» ورالدا «قايراتتان» 2:1 ەسەبىمەن باسىم تۇسكەن بولاتىن.
بۇل ويىندا دا 89-مينۋتقا دەيىن ورالدىقتار الدا بولدى. 3-مينۋتتا «اقجايىق» ويىنشىسى رۋسلان ۆاليۋللين ەسەپ اشىپ, كومانداسىن العا شىعارسا, 16-مينۋتتا «قايراتتىڭ» كاپيتانى باۋىرجان يسلامحان پەنالتيدەن تارازى باسىن تەڭەستىردى. ال 31-مينۋتتا باتىس قازاقستاننان كەلگەن كوماندا ساپىنان ولەگ حرومتسوۆ مەرگەندىگىمەن كوزگە ءتۇسىپ, «اقجايىق» ەكىنشى رەت ەسەپتە العا شىقتى.
سوڭعى ساتكە دەيىن شابۋىلداعان الاڭ يەلەرى 89-مينۋتتا عانا دەگەندەرىنە جەتتى. اتاپ ايتقاندا, كوماندانىڭ سۇرمەرگەنى جەرار گوۋ ناتيجەلى سوققىسىمەن كوزگە ءتۇسىپ, ستاديونعا جينالعان جانكۇيەرلەردى قۋانىشقا بولەدى. ال قوسىمشا ۋاقىتتا, ياعني 92-مينۋتتا الماتىلىقتار ويىنعا تىڭنان قوسىلعان كامەرۋندىق لەگيونەر گاەل تاۆامبانىڭ كومەگىمەن جەڭىس دوبىن سوعىپ كەتتى.
وسىلايشا, «قايرات» تۋرنير كەستەسىندەگى ءۇشىنشى ورنىن ساقتاپ قالدى. ءوز كەزەگىندە, كوش باستاپ كەلە جاتقان «استانا» مەن ەكىنشى ورىنعا نىق تابان تىرەگەن «ەرتىس» تە بۇگىنگى ويىندارىن جەڭىسپەن اياقتاعانىن اتاپ وتكەن ءجون.
13-تۋر ويىندارىنىڭ ناتيجەلەرى:
«ورداباسى» (شىمكەنت) – «جەتىسۋ» (تالدىقورعان) 0:1
گول: دۋشان ساۆيچ 11.
«شاحتەر» (قاراعاندى) – «توبىل» (قوستاناي) 1:0
گول: ماقسات بايجانوۆ 42.
«قايرات» (الماتى) – «اقجايىق» (ورال) 3:2
گولدار: باۋىرجان يسلامحان 16 (پەنالتي), جەرار گوۋ 89, گاەل تاۆامبا 90+2 – رۋسلان ۆاليۋللين 3, ولەگ حرومتسوۆ 31.
«وقجەتپەس» (كوكشەتاۋ) – «تاراز» (تاراز) 0:0
«اتىراۋ» (اتىراۋ) – «ەرتىس» (پاۆلودار) 0:1
گول: رومان مۇرتازاەۆ 51.
«اقتوبە» (اقتوبە) – «استانا» (استانا) 0:1
گول: نەمانيا ماكسيموۆيچ 83.
13-تۋر ويىندارىنىڭ قورىتىندىسى بويىنشا تۋرنير كەستەسى
ۇزدىك مەرگەندەر:
رومان مۇرتازاەۆ («ەرتىس») – 8 گول;
جەرار گوۋ («قايرات») – 7 گول
دۋشان ساۆيچ («جەتىسۋ») – 6 گول;
سامات سماقوۆ («اقتوبە») – 5 گول.
14-تۋر ويىندارى 2 ماۋسىم كۇنى وينالادى. اتالعان تۋرداعى قارسىلاستار رەتى تومەندەگىدەي:
«جەتىسۋ» – «اقتوبە»
«ەرتىس» – «شاحتەر»
«وقجەتپەس» – «اقجايىق»
«تاراز» – «استانا»
«توبىل» – «ورداباسى»
«قايرات» – «اتىراۋ».
ەلامان قوڭىر.
دەرەك: egemen.kz.
فوتو: vk.com.