استانا. 29 مامىر. سەنبىدەن جەكسەنبىگە قاراعان ءتۇنى ۋەفا چەمپيوندار ليگاسىنىڭ فينالدىق ويىنىندا يسپانيانىڭ قوس كومانداسى ونەر كورسەتتى. بۇل كەزدەسۋدە «رەال» «اتلەتيكودان» پەنالتي سەرياسىندا باسىم ءتۇسىپ, وسى ءتۋرنيردىڭ 11 رەت جەڭىمپازى اتاندى. بۇل تۋرالى egemen.kz ءتىلشىسى حابارلادى.
«رەال» (مادريد, يسپانيا) – «اتلەتيكو» (مادريد, يسپانيا) 1:1 (5:3)
گولدار: سەرحيو راموس 15 – فەررەيرا-كارراسكو 79.
«رەال»: ناۆاس, مارسەلو, راموس, پەپە, كارۆاحال, مودريچ, كازەميرو, كرووس, رونالدۋ, بەنزەما, بەيل.
«اتلەتيكو»: وبلاك, لۋيس, ساۆيچ, گودين, حۋانفران, كوكە, فەرناندەس, گابي, ساۋل, توررەس, گريزمانن.
ميلان قالاسىنداعى «سان سيرو» ستاديونىندا جانكۇيەرلەر ناعىز تارتىستى باسەكەنى تاماشالادى. كەزدەسۋدىڭ ءبىرىنشى تايمىندا قوس كوماندا بىرنەشە قاۋىپتى شابۋىلدارىمەن الماستى. وسىنداي ساتتەردىڭ بىرىندە «رەال» كاپيتانى سەرحيو راموس مۇمكىندىگىن ءمۇلت جىبەرمەي, كومانداسىن العا شىعاردى. «اتلەتيكو» وسىدان كەيىن قانشا تىرىسسا دا, العاشقى 45 مينۋتتا تارازى باسىن تەڭەستىرە المادى.
ەكىنشى تايمدا ديەگو سيمەونەدەن جاڭا نۇسقاۋلار العان «اتلەتيكو» ويىنشىلارى شيراق قيمىلداي باستادى. تورەشىنىڭ ىسقىرىعىن ەستي سالا, شابۋىلعا كوشكەن ولار ءبىرىنشى مينۋتتا-اق پەنالتي تەبۋ مۇمكىندىگىنە يە بولدى. ايىپ الاڭىندا يسپانيالىق فەرناندو توررەسكە قارسى پورتۋگاليا قۇراما كومانداسىنىڭ ويىنشىسى پەپە ويىن ءتارتىبىن بۇزدى. الايدا, 11 مەترلىك ايىپ دوبىن ورىنداۋعا كەلگەن انتۋان گريزمانن قاتتى قوبالجىعاندىقتان مۇمكىندىگىن ءتيىمدى پايدالانا المادى. بىراق وسىعان قاراماستان ولار كەزەكتى شابۋىلدارىنىڭ بىرىندە تارازى باسىن تەڭەستىرىپ كەتتى. كەزدەسۋدىڭ 79 مينۋتىندا حۋانفراننىڭ پاسىن فەررەيرا-كارراسكو گولعا اينالدىرا ءبىلدى. ماتچتىڭ نەگىزگى ۋاقىتى 1:1 ەسەبىمەن اياقتالدى.
ال ەكسترا-تايمدا ەسەپ وزگەرىسسىز قالدى. وسىدان سوڭ, پەنالتي سەرياسى ورىن الىپ, «رەال» فينالدىق كەزدەسۋدە قارسىلاستارىنان تاعى دا باسىم ءتۇستى. ونىڭ ناتيجەسى تومەندەگىدەي:
پەنالتي سەرياسى: 1:0 – ۆاسكەس, 1:1 – گريزمانن, 2:1 – مارسەلو, 2:2 – گابي, 3:2 – بەيل, 3:3 – ساۋل, 4:3 – راموس, 4:3 – حۋانفران (باعانا), 5:3 – رونالدۋ.
ايان ءابدۋالي.
دەرەك: egemen.kz.
فوتو: vk.com.