وبلىستىق ءبىلىم بەرۋ باسقارماسى وڭىردەگى مەملەكەتتىك پەداگوگيكالىق ينستيتۋت, س.تورايعىروۆ اتىنداعى مەملەكەتتىك ۋنيۆەرسيتەت, يننوۆاتسيالىق ەۋرازيا ۋنيۆەرسيتەتى, ب.احمەتوۆ اتىنداعى پەداگوگيكالىق, مۋزىكالىق كوللەدج بىتىرۋشىلەرىن اۋداندىق اكىمدىكتەرمەن بىرلەسە وتىرىپ كەڭەس وتكىزدى.
كەڭەستە جوعارى وقۋ ورىندارىن بىتىرەتىن تۇلەكتەردىڭ «ديپلوممەن – اۋىلعا!» بارۋ ماسەلەسى قاراستىرىلدى. ءبىلىم باسقارماسىنىڭ حابارىنشا, بيىل پەداگوگيكالىق ماماندىقتار بويىنشا جەرگىلىكتى جوعارى وقۋ ورىندارىنان 805 تۇلەك, كوللەدجدەردەن 334 تۇلەك بىتىرەدى. اۋىلدىق كۆوتا گرانتتارى – 87, اۋدان جانە قالا اكىمدەرىنىڭ گرانتى بويىنشا – 77, ەلىمىزدىڭ ءبىلىم بەرۋ گرانتتارى بويىنشا 413 ءبىتىرۋشى ءبىلىم العان. كوپتىلدە وقىتۋ باعدارلاماسى بويىنشا 87 تۇلەك ءارتۇرلى ءپان ماماندىقتارى بويىنشا ءبىلىم الدى. تۇلەكتەردى اۋىلداردا جۇمىس ورىندارىنا ءبولۋ كەزىندە ءبىتىرۋشى ديپلومىنىڭ ورتاشا بالى ەسكەرىلەدى. بىتىرۋشىلەردى جۇمىس ورىندارىنا ءبولۋ قورىتىندىسى بويىنشا 520 تۇلەك اۋىلدارعا اتتانادى.
ونىڭ ىشىندە 351-ءى جوعارى وقۋ ورىندارىن, ال 169-ى كوللەدج بىتىرەدى. وڭىردەگى جاس ماماندارعا قاجەتتىلىكتى قامتاماسىز ەتۋ ءۇشىن ءبىلىم باسقارماسى, اۋداندىق جانە قالالىق ءبىلىم بەرۋ بولىمدەرىنىڭ وكىلدەرى سەمەي, قاراعاندى, استانا, الماتى قالالارىنىڭ جوعارى وقۋ ورىندارىنىڭ بوس ورىندار جارمەڭكەسىنە قاتىسادى. ناتيجەسىندە الداعى وقۋ جىلىندا سەمەيدىڭ شاكارىم اتىنداعى مەملەكەتتىك ۋنيۆەرسيتەتىنىڭ 19 تۇلەگى ءبىزدىڭ وبلىسىمىزعا كەلەدى دەپ جوسپارلانۋدا. سوڭعى ءۇش جىل ىشىندە وبلىس مەكتەپتەرىنە ءبىر جارىم مىڭنان اسا جاس مامان قىزمەت ەتۋدە. اۋىلدىق جەرگە جۇمىس جاساۋعا كەلگەن ماماندارعا مەملەكەت كەپىلدەندىرىلگەن الەۋمەتتىك توپتاما ۇسىنادى – تۇرعىن ۇيمەن قامتاماسىز ەتۋ (جالعا بەرۋ, قىزمەتتىك, ت.ب.), باسپانا ساتىپ الۋعا بيۋدجەتتىك نەسيە 1500 اەك (3181,5 مىڭ تەڭگەگە دەيىن), 70 اەك كولەمىندە كوشەراقى (148470 تەڭگە). بۇل شارالار, اسىرەسە, جاس ماماندار – وتباسىلار ءۇشىن ماڭىزدى.
ۇلگى ەتەرلىك جاستار دا از ەمەس, مىسالى, رۇستەم سۇلەيمەنوۆ پەن نازەركە وماروۆا ەكەۋى دە پەداگوگيكالىق ينستيتۋت بىتىرگەن سوڭ اۋىلعا كەلىپ ەڭبەك ەتۋدە. كۋرچاتوۆ قالاسىنىڭ ءدال جانىندا ورنالاسقان الىستاعى اقجار اۋىلىنداعى قازاق ورتا مەكتەبىندە جاس مۇعالىمدەر نايما دۋمان, ارمانگۇل مۇتان, بۇلبۇل ايۋپوۆا, گاۋھار سىزدىقوۆا – شاكارىم اتىنداعى ۋنيۆەرسيتەتتى ءبىتىرىپتى. اينا مىڭجاراسوۆا تالدىقورعاننان وقۋ ءبىتىرىپ «ديپلوممەن – اۋىلعا!» باعدارلاماسى اياسىندا كەلىپتى. ياعني, «ديپلوممەن – اۋىلعا!» دەگەن باعدارلاماسىنا ءۇن قوسقان پاتريوت جاستاردىڭ بار ەكەنى.
اقشيمان اۋىلىندا جاس مۇعالىمدەر گۇلدانا امانگەلدى, اردانا قايمولدينا, ىرىسبەك احمەتوۆ تە اقجار اۋىلىندا ۇستازدىق ەتۋدە. مەكتەپ ديرەكتورى ءمادينا قابدىراسىلوۆا وسىدان ءتورت جىل بۇرىن وبلىس ورتالىعىنداعى پەداگوگيكالىق وقۋ ورنىن ءبىتىرىپتى. كوڭىل قۋانتادى. نەگىزىنەن, جوعارى وقۋ ورىندارىن بىتىرگەن سوڭ تۋعان اۋىلدارىنا قايتا ورالىپ, ەڭبەك جولىن باستايتىن جاستاردىڭ قاتارىن كوبەيتۋ جوباسى قولعا الىنسا, بۇل باستاما جولىن تابار ەدى.
بىراق, «ديپلوممەن – اۋىلعا!» مەملەكەتتىك باعدارلاماسى بارىسىنا بولىنگەن قارجىنىڭ ورنىمەن جۇمسالۋ-جۇمسالماۋ ماسەلەسى دە الاڭداتادى. اۋىلدا پاتەر ساتىپ الۋ, تابۋ وڭاي ەمەس. اكىمدەر جاس ماماندارعا ءۇي سالىپ جاتقان جوق. سوڭعى جىلدارى وكىنىشكە قاراي, وڭىردەگى ماي اۋدانىندا – 47, اقتوعايدا – 58, قاشىر اۋدانىنان 25 جاس مامان كەرى قايتقان كورىنەدى.
باعدارلاما بويىنشا 2009-2015 جىلدارى وبلىس مەكتەپتەرىنە بارلىعى 2 770 جاس مامان اۋىلعا بارعانىن ايتادى وبلىستىق ءبىلىم باسقارماسىنىڭ وكىلدەرى.
ولاي بولسا, جاس مامانداردىڭ ديپلومدارىن قۇشاقتاپ, قايتىپ كەتپەۋلەرىنە, اۋىلدا تۇراقتاپ قالۋلارىنا – جەرگىلىكتى اكىمدىكتەر قالاداعىداي لايىقتى جاعداي جاساۋلارى قاجەت.
فاريدا بىقاي,
«ەگەمەن قازاقستان»
پاۆلودار وبلىسى