مەملەكەت باسشىسى نۇرسۇلتان نازارباەۆ حالىقارالىق ۆاليۋتا قورىنىڭ باسقارۋشى ديرەكتورى كريستين لاگاردپەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋ بارىسىندا قازاقستان مەن قور ىنتىماقتاستىعىنىڭ نەگىزگى باعىتتارى, سونداي-اق, الەمدىك قارجى-ەكونوميكا جۇيەسىنىڭ دامۋىنداعى ماڭىزدى ترەندتەر تالقىلاندى.
نۇرسۇلتان نازارباەۆ حۆق-نىڭ وڭىرلىك كونفەرەنتسياسىن استانا ەكونوميكالىق فورۋمى قارساڭىندا قازاقستاندا ءوتكىزۋ تۋرالى شەشىمنىڭ ءبىز ءۇشىن ماڭىزدى قولداۋ بولعانىن اتاپ ءوتتى.
مەملەكەت باسشىسى قازاقستان ءوز تاۋەلسىزدىگىنىڭ العاشقى كۇنىنەن باستاپ حالىقارالىق ۆاليۋتا قورىمەن ىنتىماقتاسىپ كەلە جاتقانىن ايتتى.
– قور قىزمەتكەرلەرى العاشقى جىلدارى تەحنيكالىق جانە قارجىلىق تۇرعىدان زور كومەك كورسەتتى. بۇرىنعى كەڭەستىك وزگە مەملەكەتتەرمەن سالىستىرعاندا ءبىزدىڭ ەل تاۋەلسىزدىگىنىڭ 25 جىلدىعىنا دەيىن كوپ نارسەنى جۇزەگە اسىرا الدى. قازىرگى كەزدە قازاقستان ەكونوميكاسى دا الەمدىك ەكونوميكا سياقتى كۇردەلى كەزەڭدى باستان وتكەرۋدە. بۇعان بىرقاتار فاكتورلار, سونىڭ ىشىندە شيكىزات رەسۋرستارى باعاسىنىڭ تومەندەۋى, قازىر ءبىز جۇزەگە اسىرىپ جاتقان قۇرىلىمدىق رەفورمالاردىڭ كەشىكتىرىلۋى, سونداي-اق, رەسەيگە قاتىستى احۋال مەن قىتايداعى ەكونوميكالىق جاعداي ىقپال ەتىپ وتىر. سوعان قاراماستان, ءبىز ءىجو تومەندەۋىنە جول بەرمەي, وڭ ديناميكانى قامتاماسىز ەتتىك جانە ونى بيىل دا ساقتايمىز دەگەن ۇمىتتەمىن. ءبىزدىڭ رەسپۋبليكا التى جىلدان بەرى ەكونوميكانىڭ شيكىزات رەسۋرستارىنا تاۋەلدىلىگىن ازايتۋ شارالارىن جۇزەگە اسىرىپ جاتىر, – دەدى قازاقستان پرەزيدەنتى.
ك.لاگارد بىرقاتار مەملەكەتتەر ۇكىمەتتەرىنىڭ ەكونوميكالىق بلوگىنىڭ باسشىلارى ءبىرىنشى رەت قاتىسقالى وتىرعان وڭىرلىك كونفەرەنتسيانىڭ تابىستى وتەتىنىنە سەنىم ءبىلدىردى.
حۆق باسقارۋشى ديرەكتورى سونداي-اق, نۇرسۇلتان نازارباەۆقا قورمەن اراداعى سەرىكتەستىكتىڭ جولعا قويىلعانى ءۇشىن العىس ايتتى. وسى سەرىكتەستىك اياسىندا قازاقستانعا قاجەتتى قولداۋ, سونىڭ ىشىندە تەحنيكالىق سيپاتتاعى قولداۋ كورسەتۋ جالعاسىپ كەلەدى.
سونىمەن قاتار, ك.لاگارد ەلدى ەكونوميكالىق, يندۋستريالىق جانە ينفراقۇرىلىمدىق دامىتۋ ءجونىندەگى قازاقستان جۇزەگە اسىرىپ جاتقان رەفورمالاردى حۆق قولدايتىنىنا نازار اۋداردى.