ىزدەستىرۋگە سۇڭگۋىر قايىق تا قوسىلدى
ەگيپەت پرەزيدەنتى ابدۋل فاتتاح حاليل اس-سيسي ەل بيلىگى جەرورتا تەڭىزىنە قۇلاعان ا320 جولاۋشىلار ۇشاعىنىڭ «قارا جاشىگىن» جانە ۇشاق سىنىقتارىن ىزدەستىرۋگە سۇڭگۋىر قايىق جىبەرىلگەنىن مالىمدەدى.
مەملەكەت باسشىسى, سونداي-اق, بورتىندا 66 ادام بار ۇشاق اپاتىنا قاتىستى جايتتاردىڭ بارلىعى زەرتتەلىپ جاتقانىن, وعان بايلانىستى ءدال قازىر قاندايدا ءبىر شەشىم قابىلداۋ اسىعىس بولاتىنىن اتاپ ءوتتى. مامىردىڭ 20-سىندا ەگيپەت بيلىگى جوعالعان اۆيالاينەردەگى ادام دەنەسىنىڭ بولىگىن جانە ۇشاق وتىرعىشىن, سونىمەن قاتار, جولاۋشىلاردىڭ جەكە م ۇلىكتەرىن تاپقانىن حابارلاعان ەدى. تابىلعان ادام دەنەسىنىڭ بولىكتەرى ەل استاناسى كايرگە جەتكىزىلدى. سوت-مەديتسينالىق ساراپتاما قىزمەتى قازا تاپقانداردىڭ دەنەسىن انىقتاۋ ءۇشىن ۇشاق بورتىنداعى جولاۋشىلاردىڭ تۋعان-تۋىستارىنان دنك سىناماسىن الادى.
اسكەري كەلىسسوز جۇرگىزۋدەن باس تارتتى
وڭتۇستىك كورەيانىڭ قورعانىس مينيسترلىگى سولتۇستىك كورەيا تاراپىمەن اسكەري كەلىسسوزدەر جۇرگىزۋدەن باس تارتتى. بۇل جونىندە «ەنحاپ» اقپارات اگەنتتىگى حابارلادى.
رەسمي سەۋلدىڭ اتاپ وتۋىنشە, كورەياارالىق ۇنقاتىسۋ اياسىنداعى ەڭ باستى باسىمدىق كحدر-ءدىڭ يادرولىق قارۋدان باس تارتۋ ماسەلەسى بولىپ تابىلادى. «ءبىز سولتۇستىك كورەيا وزدەرىنىڭ يادرولىق پروبلەمالارىن ەسكەرمەي, اسكەري كەلىسسوزدەر جۇرگىزۋ تۋرالى ۇسىنىسىنا وكىنىشپەن قارادىق», – دەدى وڭتۇستىك كورەيا قورعانىس مينيسترلىگىنىڭ وكىلى مۋن سانگ گيۋن وسى جونىندە. رەسمي سەۋل پحەنياننىڭ ۇسىنىسىنا جاۋاپ رەتىندە قازىر ءسولتۇستىك كورەيامەن ۇنقاتىسۋ تۋرالى سويلەسەتىن ۋاقىت ەمەس ەكەنىن دە اتاپ كورسەتكەن. بۇعان دەيىن دە وڭتۇستىك كورەيا كحدر باسشىسىنىڭ ەكىجاقتى ۇنقاتىسۋدى اسكەري دەڭگەيدە قايتا جالعاستىرۋ جونىندەگى ۇسىنىسىنان باس تارتقان ەدى. ال كحدر پرەزيدەنتى كيم چەن ىن كورەيا ەڭبەك پارتياسىنىڭ سەزىندە ەكى ەل اراسىنداعى اسكەري ۇنقاتىسۋدى جولعا قويۋ قاجەتتىگىن ايتقان بولاتىن.
شىعىس ەۋروپاعا قاتىسۋىن كۇشەيتپەك
ناتو-نىڭ ۆارشاۆاداعى سامميتىندە سولتۇستىكاتلانتيكالىق اليانس كۇشتەرىنىڭ شىعىس ەۋروپاعا قاتىسۋ ماسەلەسىن كۇرت وزگەرتەتىن شەشىم قابىلداناتىن بولادى.
ناتو-نىڭ باس حاتشىسى يەنس ستولتەنبەرگتىڭ سوزىنە قاراعاندا, ۇيىمنىڭ سامميتىندە قاۋىپسىزدىككە قاتىستى جاڭا جاعدايلارعا بەيىمدەلۋ سياقتى نەگىزگى پوزيتسيالار ايقىندالادى. «ءبىز ناتو-نىڭ ەۋروپانىڭ شىعىس بولىگىنە قاتىسۋىن نىعايتۋىمىز قاجەت. بۇل كوپ ۇلتتى قاتىسۋ بولماق. وسىلايشا, ءبىز ءبىر ەلگە جاسالعان شابۋىل ناتو-عا مۇشە ەلدەردىڭ بارلىعىنا جاسالعان شابۋىل بولاتىنىن ەسكەرتەمىز», – دەپ اتاپ وتكەن ي.ستولتەنبەرگ. بۇعان قوسا, ول بىرقاتار وداقتاستار, ونىڭ ىشىندە اقش, ۇلىبريتانيا جانە گەرمانيا اليانستىڭ شىعىس قاپتالىن نىعايتۋعا قازىردىڭ وزىندە نيەت ءبىلدىرىپ وتىرعانىن ايتقان.
ەندى قانشا مارتە سايلانسا دا ەركى
جەكسەنبى كۇنى تاجىكستاندا ەل كونستيتۋتسياسىنا وزگەرىستەر ەنگىزۋ تۋرالى رەفەرەندۋم ءوتتى. ورتالىق سايلاۋ كوميسسياسىنىڭ توراعاسى باحتيەر حۋدوەرزودانىڭ مالىمدەۋىنشە, سايلاۋ ۋچاسكەسىنە كەلگەن تۇرعىنداردىڭ 95 پايىزدان استامى رەفەرەندۋمعا شىعارىلعان سۇراقتى جاقتاپ داۋىس بەرگەن.
رەفەرەندۋمعا ازاماتتار «ەل كونستيتۋتسياسىنا ەنگىزىلەتىن وزگەرىستەر مەن تولىقتىرۋلاردى قابىلدايسىز با؟» دەگەن سۇراققا جاۋاپ قايتارعان. مۇندا ماسەلە 41 تۇزەتۋدەن تۇراتىن قۇجات جوباسىنداعى پرەزيدەنت ەمومالي راحموننىڭ پرەزيدەنتتىككە سايلانۋعا قويىلعان شەكتەۋ مەرزىمىن الىپ تاستاۋ جانە پرەزيدەنتتىك لاۋازىمعا كانديداتتاردىڭ جاسىن 35-تەن 30-عا دەيىن تومەندەتۋدە بولىپ وتىر. كونستيتۋتسياعا ەنگىزىلگەن وزگەرىستەردە, سونداي-اق, ۇلتتىق نەمەسە ءدىني نەگىزدە پارتيالار قۇرۋعا جانە ولاردى شەتەلدەردىڭ قارجىلاندىرۋىنا تىيىم سالىنعان. كەيبىر اقپارات قۇرالدارى پرەزيدەنتتىككە كانديداتتار جاسىنىڭ تومەندەتىلۋى قازىرگى پرەزيدەنت ە.راحموننىڭ ۇلى رۋستام ەموماليگە بايلانىستى ەكەنىن اتاپ كورسەتۋدە. ويتكەنى, ول 2020 جىلى 33 جاسقا تولادى.
نوسەر جاۋىن سۋ تاسقىنىنا ۇلاستى
قىتاي حالىق رەسپۋبليكاسىندا نوسەر جاۋىننىڭ سالدارىنان بىرنەشە پروۆينتسيانى سۋ باستى. «سينحۋا» اگەنتتىگى تاراتقان اقپاراتتارعا قاراعاندا, حۋانان پروۆينتسياسىندا جاۋىن-شاشىننان 500 مىڭعا جۋىق ادام زارداپ شەككەن جانە 18 مىڭ ادام قاۋىپسىز ايماققا كوشىرىلگەن.
سوڭعى مالىمەتتەر بويىنشا, جالپى كولەمى 46 مىڭ گەكتاردان استام الاڭدى سۋ باسقان, قازىرگى كەزدە 4 مىڭداي ادام كومەككە مۇقتاج بولىپ وتىر. ال گۋانسي-چۋجانسي اۆتونوميالىق اۋدانىندا ەكى ادام قازا تاۋىپ, 290 مىڭ ادام زارداپ شەككەن. وسى اۋداندا 610 ءۇيدى سۋ باسىپ, 12 مىڭنان استام تۇرعىن قاۋىپسىز جەرگە كوشىرىلدى. بۇلاردان بولەك, 40-قا جۋىق تاس جولدا كولىك قوزعالىسى توقتاتىلدى جانە كوپتەگەن سۋ قۇرىلعىلارى ىستەن شىقتى. توتەنشە جاعدايلار قىزمەتىنىڭ حابارلاۋىنشا, سيني قالاسىنىڭ ءبىر وزىندە عانا التى ساعات ىشىندە 429,5 مم ىلعال ءتۇسىپتى. سەگىز ادام اجال قۇشىپ, ءتورت ادام حابار-وشارسىز كەتكەن. مەتەورولوگتار يۋنان, سىچۋان پروۆينتسيالارىندا تابيعات اپاتىنىڭ قاۋپى جوعارى ەكەنىن ەسكەرتۋدە.
قىسقا قايىرىپ ايتقاندا:
تايلاندتىڭ وڭتۇستىگىندەگى چيانگراي پروۆينتسياسىندا مەكتەپ وقۋشىلارىنىڭ جاتاقحاناسىنان ءورت شىعىپ, 17 ادام قازا تاپتى, تاعى ەكى وقۋشى ىزدەستىرىلىپ جاتىر. ءورت شىققان كەزدە جاتاقحانادا 7-13 جاس ارالىعىنداعى 38 وقۋشى بولعان.
ميۋنحەن اۋەجايىنان كانادانىڭ ۆانكۋۆەر قالاسىنا بەت العان Lufthansa كومپانياسىنىڭ ۇشاعى بورتتاعى جولاۋشىلاردىڭ ءبىرىنىڭ جانجال شىعارۋىنا بايلانىستى گامبۋرگ اۋەجايىنا قونۋعا ءماجبۇر بولدى. العاشىندا الگى ەر ادام ۇشۋ كەزىندە تەمەكى شەكپەك بولىپتى, سودان كەيىن جانۇشىرا شىڭعىرىپ, اۋە كەمەسىنىڭ ەسىگىن اشۋعا ۇمتىلعان.
الەمدە شايدى ەڭ كوپ ىشەتىن ەل وزبەكستان ەكەندىگى بەلگىلى بولدى. زەرتتەۋ وسى ەل حالقىنىڭ 99,6 پايىزىنىڭ شاي ىشپەسە جۇرە المايتىنىن كورسەتكەن. ال گۆاتەمالا تۇرعىندارىنىڭ 99,6 پايىزى, كەرىسىنشە, كوفەنى قالايدى ەكەن.
«رەيتەر» اقپارات اگەنتتىگى سيريانىڭ جەرورتا تەڭىزىنىڭ جاعالاۋىنداعى دجابلا مەن تارتۋس قالالارىنداعى تەراكتىلەر سالدارىنان 100-دەن استام ادام مەرت بولعانىن حابارلادى. تەراكتىلەر جاۋاپكەرشىلىگىن «ارحار اش-شام» ەكسترەميستىك ۇيىمى مويىندارىنا الدى.
ينتەرنەت ماتەريالدارىنىڭ نەگىزىندە ازىرلەندى