تەست

 تاپسىراتىندار قاي ءپاندى كوبىرەك تاڭدايدى؟ مامىر ايى كەلدى دەگەنشە مەكتەپ ءبىتىرۋشى جاس­تاردان مازا قاشادى. الدا – ۇلكەن سىناق. ماۋسىمنىڭ العاشقى كۇندەرىندە باستالىپ, بەل ورتاسىنا دەيىن سوزىلاتىن بۇل سىناققا سوڭعى دايىندىقتار قىزۋ جۇرۋدە. ءار تۇلەكتىڭ جۇرەك­تەرى ءلۇپىل قاعىپ, كەۋدە­لەرى ۇمىتكە تولى. بيىل جامبىلدىق 44 مەكتەپ ءبىتى­رۋشى حالىقارالىق وليمپيادالار مەن عىلىمي جوبالاردىڭ جەڭىم­پازدارى رەتىندە ۇلتتىق ءبىرىڭ­عاي تەستىلەۋدى تاپسىرۋدان بوساتىلادى. سونداي-اق, 220 وقۋ­شى «التىن بەلگىگە», 84 وقۋشى ۇزدىك اتتەستاتقا ۇمىتكەر. 64  مەكتەپ ءبىتىرۋشى مەملەكەتتىك گرانت يە­گەرلەرى. جانە 2496 مەكتەپ ءبىتىرۋشى ءداستۇرلى ەمتيحاندار تاپسىرادى. اۋدانداردا مەكتەپ بىتىرۋشىلەردىڭ ۇلتتىق بىرىڭعاي تەستىلەۋىن ۇيىم­داسقان تۇردە وتكىزۋ ءۇشىن ولاردىڭ تاماق­­تانۋىنا, تاسى­مال­داۋىنا جانە جاتىن ورنىنا 16 ملن. 990 مىڭ تەڭگە بولىنگەن. وتكەن جىلى تەستىلەۋدە جام­بىلدىق مەكتەپ تۇلەكتەرى ارعى جىلعا قاراعاندا وزدەرىنىڭ جاقسى دايىندىقتارىن كورسەتكەن بولاتىن. ياعني, وبلىستىڭ ورتاشا بالى – 78,6-نى قۇراپ, 2014 جىلمەن سالىستىرعاندا 6,2 بالعا وسكەن-ءدى. مىنە, وسى ۇبت-دا جوعارى ناتيجە كورسەتكەن تاراز قالاسىنداعى №1, 40, 41, 45 گيمنازيالارى مەن وبلىستىق دارىندى بالالارعا ارنالعان 3 مەكتەپ-ينتەرناتتىڭ بازاسىندا وسى ءبىلىم وشاقتارىنىڭ وزىق ءىس-تاجىريبەلەرى تاراتىلدى. – «EDTECH-KZ» حالىقارالىق ءبىلىم ورتالىعى وكىلدەرىنىڭ قاتى­­سۋىمەن 2015 جىلدىڭ قاراشاسى مەن 2016 جىلدىڭ ناۋرىز ايلارىندا 10, 11 سىنىپ وقۋ­شىلارى اراسىندا 2 رەت تەستىلەۋ وتكىزىپ, وعان 18 493 وقۋشى قاتىستى, – دەيدى وڭىرلىك كوم­مۋني­كاتسيالار قىزمەتىندە وتكەن بريفينگتە جامبىل وبلىستىق ءبىلىم باس­قار­ماسى باسشىسىنىڭ ورىنباسارى ءجاميلا بەكباتىروۆا. – تەست ناتيجەسى بويىنشا وقۋشىلاردىڭ تاڭداۋ باسىمدىعى – بيولوگيا, فيزيكا, گەوگرافيا, اعىلشىن ءتى­لى پاندەرىنە بەرىلگەندىگى انىق­تالىپ,  ۇبت كورسەتكىشىنىڭ ءوسۋى وسى پاندەردى ساپالى وقىتۋعا قاتىستى ەكەندىگىنە, تەحنيكالىق قاتەلىكتەرگە جەتكىلىكتى ءمان بەرۋ جونىندە ۇسىنىس بەرىلدى. جالپى العاندا, 2015-2016 وقۋ جىلىندا جامبىل وبلىسىنداعى 316 جالپى ءبىلىم بەرەتىن ورتا مەكتەپ 8561 وقۋشى بىتىرگەلى وتىر. سونىڭ 6065-ءسى, ياعني 70,85 پايىزى ۇبت تاپسىرۋعا ءوتىنىش بەرگەن. 6065 وقۋشىنىڭ 35,6 پايىزى قالا, 64,4 پايىزى اۋىل مەكتەپتەرىنىڭ تۇلەكتەرى ەكەن. ەندەشە, ىسكە ءسات, جاس تۇلەكتەر! ورالحان ءداۋىت, «ەگەمەن قازاقستان» جامبىل وبلىسى