قوستاناي. 18 مامىر. قوستانايدا جاسوسپىرىمدەردىڭ قىلىعى جولاۋشىلار پويىزىنىڭ اپات بولۋىنا اكەلە جازدادى. بۇل تۋرالى alau.kz-كە سىلتەمە جاساعان egemen.kz ءتىلشىسى حابارلادى.
جولاۋشىلار پويىزى رەلستەن شىعىپ كەتە جازدادى. ابىروي بولعاندا رەلستىڭ ۇستىنە قويىلعان بەكەتتىك اۋىر باعانانى الىستان بايقاپ قالعان ماشينيست پويىزدى جەدەل توقتاتىپ ۇلگەرەدى.
پوليتسەيلەر پويىز رەلسىنىڭ ۇستىنە تسەمەنتتەن جاسالعان بەكەتتىك باعانانى قويعان جاسوسپىرىمدەردى كوپ ۇزاتپاي ۇستادى. ولار ىستەگەن ءىسىن تولىعىمەن مويىندادى جانە ونى اۋەسقويلىقتان ىستەگەندەرىن ايتتى. تەمىر جولدىڭ ليساكوۆ قالاسىنا جاقىن مايلين-توبىل ۋچاسكەسى اۋىر تراگەديادان امان الدى. ليساكوۆ قالاسىنداعى 11 جانە 16 جاستاعى ەكى ءجاسوسپىرىم تەمىر جولعا ارقايسىسى جارتى مەتر كەلەتىن 4 باعاندى ۇزىنىنان قويىپ كەتكەن. باعانالار كەڭەستىك ۋاقىتتاعى وندىرىستە جاسالعان, ارقايسىسىنىڭ سالماعى 40 كيلو كەلەدى. مالىمەتتەر بويىنشا, ولاردى تەمىر جول توسەمىنەن العان.
«باعانالاردى توسەمنەن الۋ قيىن شارۋا ەمەس. بالالار ونى بوساتىپ, توسەمنەن بەتونداردى الىپ, رەلسكە قويعان», – دەدى ليساكوۆ قالالىق ىشكى ىستەر ءبولىمى اكىمشىلىك ءبولىمىنىڭ باسشىسى بەرىك ايسەنوۆ.
پوليتسەيلەر بالالاردى كەلەسى كۇنى قولعا تۇسىرگەن. ولاردىڭ سوزىنە قاراعاندا, اۋەسقويلىقتان وسىنداي ارەكەتكە بارعان ءارى تسەمەنت باعاندار پويىزدى قانشالىقتى توقتاتا الاتىنى تۋرالى بىلگىلەرى كەلگەن.
قازىر بالالاردى زاڭ الدىنداعى جاۋاپكەرشىلىك كۇتىپ تۇر. 16 جاستاعى ءجاسوسپىرىمنىڭ ۇستىنەن «كولىك قۇرالدارى نەمەسە حابارلاۋ جولدارىن قاساقانا جارامسىز ەتۋ» بابى بويىنشا قىلمىستىق ءىس قوزعالدى. بۇل باپ بويىنشا ونى 3000 ايلىق كورسەتكىش نەمەسە 6363000 تەڭگە ايىپپۇل, ونى وتەي الماسا 4 جىل باس بوستاندىعىنان ايىرىلۋ جازاسى بەرىلەدى. ال 11 جاستاعى بالا ءۇشىن اتا-اناسى جاۋاپ بەرەتىن بولادى.
ايتا كەتەيىك, جولاۋشىلار پويىزىندا 500 ادام بولعان. ءماشينيستىڭ تاجىريبەلىلىگى بولماعاندا, ءىرى اپات ورىن الار ەدى.
ءنازيرا جارىمبەتوۆا.
دەرەك, فوتو: alau.kz.