اقش-تىڭ قارجى مينيسترلىگى 40 جىلدان سوڭ, العاش رەت وزدەرىنىڭ ساۋد ارابياسىنا قارىزى كولەمىن جاريا ەتتى. «بلۋمبەرگتىڭ» حابارلاۋىنشا, ول 116,8 ميلليارد دوللاردى قۇرايدى.
وسىلايشا, ساۋد ارابياسى اقش-تىڭ ءىرى كرەديتورلارىنىڭ العاشقى وندىعىنا كىرىپ وتىر. قىتاي بۇرىنعىسىنشا (1,3 تريلليون دوللار) ءبىرىنشى ورىندا, جاپونيا (1,1 تريلليون دوللار) ەكىنشى ورىندا تۇر. وتكەن ايدا ساۋد ارابياسى جالپى كولەمى 750 ميلليارد دوللار بولاتىن اقش-تىڭ قارىزى مەن وزگە دە امەريكالىق اكتيۆتەردى ساتامىز دەپ «قورقىتقان» ەدى. ەگەر اقش كونگرەسى ساۋد ارابياسىن 2001 جىلعى 11 قىركۇيەكتە بولعان تەررورلىق شابۋىلعا قاتىسى بار دەپ جاۋاپكەرشىلىككە تارتۋعا رۇقسات ەتەتىن بولسا, رەسمي ەر-رياد وسىعان بارۋى مۇمكىن.
ريم پاپاسى بىرقاتار سىن ايتتى
ريم پاپاسى فرانتسيسك قازىرگى الەۋمەتتىك تەڭسىزدىكتى كورسەتە وتىرىپ, نارىقتىق ەكونوميكاعا بىرقاتار سىن ايتتى. مۇداي پىكىردى ول «La Croix» باسىلىمىنا بەرگەن سۇحباتىندا بىلدىرگەن.
پونتيفيكتىڭ ايتۋىنشا, جاھاندىق ەكونوميكالىق جۇيەدە «اقشاعا قۇنىعۋشىلىق, تابىنۋشىلىق» ارتىپ بارادى. ادامزات بايلىعىنىڭ 80 پايىزدان استامى 16 پايىزعا جۋىق تۇرعىننىڭ قولىندا. نارىقتىق ەركىندىك تولىق جۇمىس ىستەمەيدى. پونتيفيك, سونداي-اق, نارىقتىڭ ءوزى جاقسى نارسە ەكەنىن, بىراق مەملەكەت تەپە-تەڭدىك بالانسىن ساقتاۋدى قاداعالاپ, باقىلاۋدى جۇزەگە اسىرۋ قاجەتتىگىن اتاپ وتكەن. بۇدان بولەك فرانتسيسك بىرقاتار يسلام ەلدەرى – يراك نەمەسە ليۆيا سياقتى مەملەكەتتەرگە باتىستىق دەموكراتيانى ەكسپورتتاۋ تاجىريبەسىن دە سىنعا العان. ونىڭ سوزىنە قاراعاندا, مادەني ەرەكشەلىكتەرگە نازار اۋدارماي, العا قاراي ءجۇرۋ مۇمكىن ەمەس.
ماسەلە رەفەرەندۋم ارقىلى شەشىلەدى
فينليانديا پرەزيدەنتى ساۋلي نينيستە ەلدىڭ ناتو-عا مۇشەلىككە كىرۋ مۇمكىندىگى تۋرالى ماسەلەنى جالپىۇلتتىق رەفەرەندۋم ارقىلى شەشۋ قاجەتتىگىن مالىمدەدى.
«بىزدە ەۋروپالىق وداققا قوسىلۋ بويىنشا رەفەرەندۋم وتكىزىلدى. قازىرگى ناتو-عا مۇشەلىككە كىرۋ جاعدايى ودان دا ەرەكشە ماڭىزدى تاقىرىپ دەپ ەسەپتەيمىن», – دەدى پرەزيدەنت ەستونيانىڭ ERR تەلەراديوكومپانياسىنا بەرگەن سۇحباتىندا. سونداي-اق, ول ەلدىڭ ءوزىنىڭ قاۋىپسىزدىگىن قامتاماسىز ەتۋگە مۇمكىندىگى بار ەكەنىنە نازار اۋدارعان. «بىزدە قارسى جاۋاپ بەرەتىن رەسۋرستار جەتكىلىكتى», – دەپ اتاپ وتكەن نينيستە وسى جونىندە. پرەزيدەنت 1 مامىردا ەلىنىڭ سولتۇستىكاتلانتيكالىق اليانسقا قوسىلۋعا قارسى ەكەنىن ايتقان بولاتىن. فينليانديانىڭ ناتو-عا مۇشەلىككە كىرۋ تۋرالى پىكىرتالاسى ۋكرايناداعى داعدارىسقا بايلانىستى كۇشەيە تۇسكەنىن ايتا كەتەيىك.
قىسقا قايىرىپ ايتقاندا:
جاپونيادا 9-15 مامىر ارالىعىندا اپتاپ ىستىقتان 600-گە جۋىق ادام اۋرۋحاناعا تۇسكەن. وتكەن جىلى وسى ەلدە اپتاپ ىستىق سالدارىنان 100 ادام كوز جۇمعان ەدى.
بۇۇ باس حاتشىسى پان گي مۋن الەم ەلدەرىنىڭ ۇكىمەتتەرىن زورلىق-زومبىلىق پەن كەمسىتۋشىلىككە جول بەرمەۋگە شاقىرا كەلىپ, جاڭا تۋعان سابيلەردىڭ اكەلەرى ءۇشىن دە دەكرەتتىك دەمالىس تاجىريبەسىن ەنگىزۋ جونىندە پىكىر ءبىلدىردى.
ورتالىق بارلاۋ باسقارماسىنىڭ قىزمەتكەرى بايقاۋسىزدا اقش-تىڭ سەناتقا دايىنداعان جاۋاپتار الۋ كەزىندە ازاپتاۋ ءتاسىلىن قولدانۋعا قاتىستى بايانداماسىنىڭ ەلەكتروندى نۇسقاسىن جويىپ جىبەرگەن. بايانداما 6,7 مىڭ بەتتەن تۇرادى.
قىتايدىڭ شاندۋن پروۆينتسياسىندا ەر كىسى كوشەدەگى ادامدارعا پىشاق الا جۇگىرگەن جانە مەكتەپ عيماراتىن ورتەگەن. سونىڭ سالدارىنان ەكى ادام كوز جۇمىپ, بەس ادام جاراقات الدى. قىلمىسكەر قاماۋعا الىندى.
قۋاڭشىلىقتان ميلليونداعان ادام زارداپ شەگۋدە
ۇندىلىك اقپارات قۇرالدارىنىڭ حابارلاۋىنشا, ەل بيلىگى ءىرى وزەندەردىڭ ءبىر بولىگىن قۇرعاقشىلىق جايلاعان اۋداندارعا بۇرۋ جوباسىنا قولداۋ ءبىلدىردى.
ءۇندىستان ۇكىمەتىنىڭ باعالاۋى بويىنشا, قۋاڭشىلىق سالدارىنان تىكەلەي نەمەسە جاناما تۇردە 330 ميلليونعا جۋىق ۇندىلىك زارداپ شەگىپ وتىر. اپتاپ ىستىقتان قازا تاپقاندار دا بار, ولاردىڭ سانى 500-دەن اسقان. مامىر ايىنىڭ باسىندا ۇندىستانعا جوعارى تەمپەراتۋرا تولقىنى كەلىپ, ەلدىڭ كوپتەگەن اۋداندارىندا تەرمومەتر باعانى تسەلسي بويىنشا 40 گرادۋستان جوعارى كوتەرىلگەن. ەلدىڭ سۋ رەسۋرستارى ءمينيسترى ۋما ءباحارتيدىڭ سوزىنە قاراعاندا, ءىرى وزەندەردىڭ ءبىر بولىگىن قۇرعاقشىلىق جايلاعان اۋداندارعا بۇرۋ جوباسىنا سايكەس, قۋاڭشىلىق قىسپاعىنداعى اۋداندار ءۇشىن سۋدى ءىرى وزەندەر – براحماپۋترا مەن گانگتان, سونداي-اق, گيمالاي تاۋىنىڭ مۇزداقتارىنان الۋعا بولادى. «جۇرتشىلىق بۇل جوبانى قولداۋدا جانە كوشۋگە دە قۋانا كەلىسىپ وتىر», – دەپ اتاپ ءوتتى مينيستر.
باقىلاۋىنداعى اۋماقتاردان ايىرىلا باستادى
«يسلام مەملەكەتى» ەكسترەميستىك ۇيىمى يراكتاعى باقىلاۋ اۋماعىنىڭ 45 پايىزى, ال سيرياداعى تەرريتورياسىنىڭ 20 پايىزعا جۋىق جەرىنەن ايىرىلدى. پەنتاگوننىڭ ءباسپاسوز حاتشىسى پەتەر كۋك وسىلاي دەپ مالىمدەدى.
اقش پەن يراكتىڭ كۇش قۇرىلىمدارى سوڭعى اپتالاردا «يسلام مەملەكەتى» سودىرلارىنىڭ قالاي شەگىنگەنىن, ولاردىڭ باعدات جانە باسقا ەلدى مەكەندەردە ازاماتتىق نىساندارعا شابۋىلدار جاساعانىن بىرنەشە رەت حابارلاعان ەدى. ناقتى مالىمەتتەرگە قاراعاندا, «يسلام مەملەكەتى» ەكسترەميستىك ۇيىمى سوڭعى ايلاردا قوماقتى قارجىسى مەن مۇنايدان تۇسەتىن تابىستان دا ايىرىلا باستاعان. سودىرلار يراكتىڭ فاللۋدجا قالاسى مەن ەكىنشى ءىرى قالاسى – موسۋلدى قايتا باقىلاۋلارىنا العانىمەن, جىل باسىنان بەرى رامادي جانە حيت قالالارىن تاستاپ شىعۋعا ءماجبۇر بولدى.
الەمدەگى العاشقى روبوت-ادۆوكات
«Fututrism» باسىلىمى: «Watson جاساندى پاراسات نەگىزىندە IBM كومپانياسى جاساپ شىعارعان Ross روبوت-ادۆوكات Baker&Hosteller حالىقارالىق ادۆوكاتتىق بيۋروعا قابىلداندى», – دەپ جازدى. بۇل الەمدەگى العاشقى روبوت-ادۆوكات بولىپ تابىلادى.
روبوت-ادۆوكات بانكروتتىق راسىمگە بايلانىستى ءىستى جۇرگىزەتىن بولىمدە جۇمىس ىستەيدى. اتالعان باسىلىمدا كورسەتىلگەندەي, قازىرگى كەزدە بۇل بولىمدە 50 قىزمەتكەر بار ەكەن. روبوت كاسىبي ادەبيەتكە سىلتەمە جاساۋ ارقىلى دايەكسوزدەر كەلتىرە وتىرىپ, گيپوتەزامەن سۇراقتى ءتۇسىنىپ, وعان جاۋاپ بەرۋگە قابىلەتتى. وسىلايشا, كيبەرادۆوكات ورىنسىز اقپاراتتاردى ەلەكتەن وتكىزىپ, زاڭگەرلەرگە كومەكتەسەدى. سونىمەن قاتار, روبوت-ادۆوكات سوت تالقىلاۋلارى بازاسىن تۇراقتى جاڭارتىپ, زاڭگەرلەردى اعىمداعى ءىستى قاراۋعا ىقپال ەتەتىن جاعدايلار جونىندە حاباردار ەتىپ تە وتىرادى.
ينتەرنەت ماتەريالدارى نەگىزىندە ازىرلەندى