ەرەن ەرىنىڭ ەڭبەگىن ەلەۋدەن استە تانبايتىن جەتىسۋلىقتار تالدىقورعان قالاسىنداعى «جاستار» سپورت سارايىندا گرەك-ريم كۇرەسى بويىنشا قازاقتان شىققان تۇڭعىش وليمپيادا چەمپيونى جاقسىلىق ۇشكەمپىروۆتىڭ 65 جىلدىق مەرەيتويىنا ارنالعان حالىقارالىق تۋرنير وتكىزدى. جارىستى الماتى وبلىسىنىڭ اكىمى اماندىق باتالوۆ ءسوز سويلەپ اشتى.
«بۇگىنگى جارىستىڭ جاس ۇرپاقتىڭ سپورتقا دەگەن ىنتاسىن ارتتىرۋ مەن سالاماتتى ءومىر سالتىن قالىپتاستىرۋدا ءرولى وتە زور. بويىنداعى قايراتى مەن جىگەرىن قازاق ەلىنىڭ ابىرويىن اسقاقتاتۋعا ارناعان جاقسىلىق ۇشكەمپىروۆ قازاق جاستارى ءۇشىن ۇلگى-ونەگە. «ەر سىنشىسى – ەلى. ەلىن سۇيگەن ەر بولار» دەگەن ءسوز جەتىسۋدىڭ ءتول پەرزەنتى ءبىزدىڭ بالۋانىمىزعا ارناپ ايتىلعانداي», – دەدى وبلىس اكىمى. سونداي-اق, ەلىمىزگە تانىمال تۇلعالار جاقسىلىق ۇشكەمپىروۆتى ورتالارىنا الا تۇرىپ جاستارعا ۇلگى ەتىپ, ىستىق ىقىلاستارىن ءبىلدىردى.
تۋرنيرگە قىرعىزستان, ءوزبەكستان, تۇركيا جانە ارمەنيا مەملەكەتتەرىنىڭ جاس بالۋاندارى قاتىستى. ارنايى شاقىرىلعان قوناقتار قاتارىندا ەركىن كۇرەستەن اتلانتا-1996 وليمپيا ويىندارىنىڭ قولا ءجۇلدەگەرى ماۋلەن مامىروۆ, گرەك-ريم كۇرەسىنەن وليمپيادا چەمپيونى يۋري مەلنيچەنكو, مەرەيتوي يەسىنىڭ باپكەرى روم يلماتوۆ, «Zhersu» كورپوراتسياسىنىڭ ءتوراعاسى, قازاقستان كۇرەس فەدەراتسياسىنىڭ ايماقتاردى دامىتۋ جونىندەگى ۆيتسە-پرەزيدەنتى باۋىرجان وسپانوۆ بولدى. وتكەن كۇندەر بەلگىسىن ايشىقتاعان بەينەفيلمدە جاقسىلىق ۇشكەمپىروۆتىڭ 1975, 1980 جىلدارى كسرو جانە ءماسكەۋ وليمپياداسىنىڭ چەمپيونى, 1981 جىلى الەم چەمپيونى, 1982 جىلى الەم كۋبوگىنىڭ كۇمىس جۇلدەگەرى اتاعىن جەڭىپ العان مەرەيلى ساتتەرى كورسەتىلدى.
ەكى كۇنگە سوزىلعان ءدۇبىرلى جارىستا يلحوم باحروموۆ (وزبەكستان, 50 كگ.), عالىم قابدۋناسىروۆ (الماتى وبلىسى, 55 كگ.), ايدوس سۇلتانعالي (قىزىلوردا, 60 كگ.), ەسەنامان باعجانوۆ (اقتوبە وبلىسى, 66 كگ.), قاھارمان كيسمەتوۆ (اتىراۋ, 74 كگ.), سانجار تەمىربەك (الماتى وبلىسى, 84 كگ.), ساركيس پشەنيچنيكوۆ (قوستاناي, 96 كگ.), دانيار مارۆەن (الماتى قالاسى, 120 كگ.) چەمپيون اتاعىن جەڭىپ الدى. ال ءمىنسىز تەحنيكاسى ءۇشىن ايدوس سۇلتانعاليعا «ەڭ ۇزدىك بالۋان» اتاعى بەرىلدى.
مەرەيتوي يەسىنە الماتى وبلىسىنىڭ اتىنان تالدىقورعان قالاسىنان پاتەر كىلتى, ال قازاقستان كۇرەس فەدەراتسياسىنان اۆتوكولىك سىيعا تارتىلدى.
نۇربول الدىباەۆ,
«ەگەمەن قازاقستان»
تالدىقورعان