وتان سولداتىنىڭ سۇيەگى ەلگە جەتكىزىلدى
كۇندەي كۇركىرەپ وتكەن سوعىستىڭ اششى زاردابى مىڭداعان جۇرەكتەردەن ءالى جازىلعان جوق. قان مايدانعا وڭتۇستىك قازاقستان وبلىسىنداعى قازىرگى بايدىبەك اۋدانى, مىڭبۇلاق اۋىلىنان اتتانعان ماقاش تاجىباەۆ 1942 جىلى حابار-وشارسىز كەتكەن ەدى. رەسەيدىڭ «پاميات-2015» ىزدەۋ بىرلەستىگى مايدانگەرلەردىڭ دەرەكتەرىن انىقتاۋ بارىسىندا بوزداقتىڭ سۇيەگىن تاپقان. ولار مەدالداعى اتى-جونىنەن تۋعان جەرىن تاۋىپ, حابار بەرگەن.
مايدان دالاسىندا قۇربان بولعان جاۋىنگەردىڭ سۇيەگىن وبلىستىق ارداگەرلەر كەڭەسى مەن ءبىر توپ دەپۋتات تۋعان ەلگە اكەلدى. شىمكەنتتەگى اباي ساياباعىندا «ماڭگىلىك الاۋ» مەموريالىندا سالتاناتتى جيىن ءوتىپ, جاۋىنگەردىڭ سۇيەگى تۋىسقاندارىنا تاپسىرىلدى. ءسويتىپ, جاۋىنگەردىڭ كالۋگا وبلىسىندا جەرلەنگەن سۇيەگى ەندى تۋعان جەرىنەن ماڭگىلىك دامىل تاپتى.
وسىعان قوسا ايتاتىن ءبىر دەرەك, ءوڭتۇستىك قازاقستاننان مايدانعا 140 مىڭنان استام جاۋىنگەر اتتانعان. سوعىستا 105 مىڭ جاۋىنگەر حابار-وشارسىز كەتىپ, سوڭىنان «قارا قاعاز» كەلگەن. سوڭعى ەكى جىلدا ءۇش ساربازدىڭ سۇيەگى تابىلىپ, تۋعان جەرگە اكەلىندى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى