ۋاقىت ۇكىمەتتەن جيناقىلىقتى تالاپ ەتەدى

كەشە استانادا «نۇر وتان» پارتياسىنىڭ ۇيىمداستىرۋىمەن مەملەكەتتىك ورگانداردىڭ فۋنكتسيالارىن باسەكەلەستىك ورتاعا جانە ءوزىن ءوزى رەتتەيتىن ۇيىمدارعا بەرۋگە ارنالعان بريفينگ ءوتتى. وعان «نۇر وتان» پارتياسىنىڭ پارلامەنت ماجىلىسىندەگى فراكتسياسى جەتەكشىسىنىڭ ورىنباسارى اسقار بازارباەۆ, ءماجىلىس دەپۋتاتى سەرىك قۇسايىنوۆ, ۇلتتىق ەكونوميكا مينيسترلىگى مەن «اتامەكەن» ۇلتتىق كاسىپكەرلەر پالاتاسىنىڭ وكىلدەرى قاتىستى. مەملەكەتكە ءتان ەمەس جانە ارتىق فۋنك­تسيال­اردى قىسقارتۋ ارقىلى جيناقى ۇكىمەت قۇرۋ ماسەلەلەرى تالقىلانعان باسقوسۋدا ءبىرىنشى كەزەكتە ءسوز العان اسقار بازارباەۆ «100 ناقتى قادام» ۇلت جوس­پارىنىڭ 97-قادامىن جۇزەگە اسىرۋ بارىسىن­دا اتقارى­لىپ جاتقان شارالارعا كەڭىنەن توقتالدى. «ۇلت جوسپارىنىڭ 97-قادا­مىن جۇزەگە اسىرۋ اياسىندا 2015 جىلعى 12 قاراشادا ء«وزىن ءوزى رەتتەۋ تۋرالى» زاڭ, سونداي-اق, «قازاقستان رەسپۋبليكاسىنىڭ كەيبiر زاڭنامالىق اكتiلەرiنە ءوزىن ءوزى رەتتەۋ ماسەلەلەرى بويىنشا وزگەرiستەر مەن تولىقتىرۋلار ەنگiزۋ تۋرالى» زاڭ قابىلداندى. اتالعان زاڭداردى جۇزەگە اسىرۋ ماقساتىندا سايكەسىنشە, زاڭعا تاۋەلدى اكتىلەر قابىلداندى جانە ءوزىن ءوزى رەتتەيتىن ۇيىمدار بويىنشا تاسىلدەردى ءتۇسىندىرۋ جۇمىستارى جۇرگىزىلۋدە», – دەدى ا.بازارباەۆ. سونىمەن قاتار, سپيكەر پرەمەر-ءمينيستردىڭ وكىمىمەن ءوزىن ءوزى رەتتەيتىن ۇيىمدار مەن باسەكەلەستىك ورتاعا مەملەكەتتىك ورگانداردىڭ فۋنكتسيالارىن بەرۋ ماسەلەلەرى بويىنشا ۇسىنىستاردى جاساۋ ءۇشىن ارنايى كوميسسيا قۇرىلعانىن, ونىڭ قۇرامىنا پارلامەنت دەپۋتاتتارى, ورتا­لىق اتقارۋشى ورگانداردىڭ باسشىلىعى, «اتامەكەن» ۇكپ, «قازاقستان ازاماتتىق اليانسى» زتب ەنگەنىن جەتكىزدى. ودان ءارى ا.بازارباەۆ كو­ميس­سيا جانىندا ءوزىن ءوزى رەتتەيتىن ۇيىم­­دار مەن باسەكەلەستىك ورتاعا مەم­لەكەتتىك ورگانداردىڭ فۋنك­تسيا­لارىنا ينۆەنتاريزاتسيا جۇرگىزۋدە مەملەكەتتىك ورگان­دار­دىڭ جۇمىسىن ۇي­لەستىرۋ ءۇشىن ساراپتامالىق توپ جۇمىس ىستەي­تىنىن, بۇل رەتتە 2016 جىلعى 29 ساۋىردە ۇلتتىق ەكونوميكا مينيسترلىگىندە ورتالىق جانە جەرگىلىكتى اتقارۋشى ورگان­دار ءۇشىن فۋنكتسيالاردىڭ ين­ۆەن­تاريزاتسياسى بويىنشا بەي­نەكونفەرەنتسيا رەجىمىندە وقىتۋ سەمينارى وتكەنىن اتاپ ءوتتى. جيىندا بەلگىلى بولعانداي, قازىرگى تاڭدا ورتالىق جانە جەر­گىلىكتى اتقارۋشى ورگانداردىڭ جۇ­مىس توپتارى ءوزىن ءوزى رەتتەيتىن ۇيىم­دار مەن باسەكەلەستىك ورتاعا بەرۋ مۇمكىندىگى بار فۋنكتسيالارعا ين­ۆەن­تاريزاتسيا جۇرگىزىپ, سا­راپ­تا­ما­لىق توپتىڭ قاراۋىنا ەنگىزبەك. بۇدان بولەك, سپيكەر فۋنك­تسيالاردى باسەكەلەستىك ورتاعا جانە ءوزىن ءوزى رەتتەيتىن ۇيىم­دارعا بەرۋدىڭ بىرقاتار تاسىلدەرى بەكىتىلگەنىن ءمالىم ەتتى. ونىڭ ايتۋىن­شا, مەملەكەتتىك ورگان­دار­دىڭ فۋنكتسيالارىن جىكتەي كەلىپ, ولاردى تۇراقتى, ۋاقىتشا جانە ءتان ەمەس فۋنكتسيالار دەپ بولە وتىرىپ ينۆەنتاريزاتسيا جۇرگىزۋ, «اتامەكەن» ۇكپ جانە «قازاقستاننىڭ ازاماتتىق اليانسى» زتب بىرلەسىپ نارىقتىڭ قانشالىقتى دايىن ەكەندىگىنە تالداۋ جاساۋ, ۇلتتىق ەكونوميكا مينيسترلىگىنىڭ سايتىندا باسە­كەلەستىك ورتانى تارتۋ ءۇشىن الدىن الا تىزبەنى جاريالاۋ, فۋنكتسيالاردىڭ بازالىق تىزبەسىن انىقتاۋ جانە باسقا دا ماسەلەلەر باستى نازاردا بولادى. ءوز كەزەگىندە سەرىك قۇسايىنوۆ مەملە­كەتتىك ورگان­دار­دىڭ فۋنك­تسيالارىن اۋتسور­سينگ ار­قى­لى بەرۋ شەشىمى قابىل­دان­عان جاعدايدا, فۋنكتسيا «مەم­لەكەتتىك ساتىپ الۋ تۋرالى» زاڭنىڭ شەڭبەرىندە بەرىلەتىنىن, ال مەملەكەتتىك تاپسىرىس ار­قىلى شەشىم قابىلدانعان جاع­دايدا «بيۋدجەت تۋرالى» جانە «مەملەكەتتىك الەۋمەتتىك تاپ­سىرىس تۋرالى» زاڭداردىڭ شەڭ­بەرىندە بەرۋ جوسپارلانىپ وتىرعانىن, كورسەتىلەتىن قىز­مەتتى الۋشىلاردىڭ قاراجاتى جانە ءوزىن ءوزى رەتتەۋ ەسەبىنەن شەشىم قا­بىل­دانعان جاعدايدا, فۋنكتسيا سالا­لىق زاڭنامانىڭ شەڭبەرىندە ۇسىنىلاتىنىن جەتكىزدى. «اتامەكەن» ۇكپ نورماتيۆتىك-قۇقىق­تىق اكىلەردى ۇيلەستىرۋ دەپار­تامەنتىنىڭ ساراپشىسى ايجان بيجانوۆا مەملەكەتتىك ورگان قىزمەتىن باسەكەلەس ورتاعا بەرۋ ءىسى ابدەن پىسىقتالىپ بارىپ جۇزەگە اسىرى­لاتىنىنا توقتالدى. جيىنعا قاتىسۋشىلاردىڭ سوزىنە قارا­عاندا, جوعارىدا كورسەتىلگەن شارا­لار­دى ىسكە اسىرۋ مەملەكەتتىك فۋنك­تسيا­لاردى قىسقارتۋعا, ازاماتتاردىڭ شە­شىمدەر قابىلداۋ ۇدەرىسىنە قاتىسۋىنا, ءوزىن ءوزى رەتتەۋدى جانە جەرگىلىكتى باسقارۋدى رەتتەۋدى دامىتۋعا, مەملەكەتتىڭ شىعى­سىن تومەندەتۋگە جانە ۇكىمەتتى جيناقى ەتۋگە مۇمكىندىك بەرەتىن كورىنەدى. جيىن بارىسىندا سپيكەرلەر اتالعان ماسەلەگە بايلانىستى شەتەلدىك تاجىريبەلەر تياناقتى زەرتتەلىپ, زەردەلەنگەنىن ايتتى. ولاردىڭ سوزدەرىنە قاراعاندا, اقش-تا اق ءۇيدىڭ اكىمشىلىگى جىل سايىن فەدەرالدى ۆەدوم­ستۆولاردىڭ ۇسىنىسى بويىنشا اۋتسورسينگ ارقىلى باسەكەلەستىك ورتاعا بەرۋگە بولاتىن فۋنك­تسيالاردىڭ تىزبەسىن قالىپ­تاستىراتىن كورىنەدى. جولدىباي بازار, «ەگەمەن قازاقستان»