استانادا قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ كەزەكتى وتىرىسى ءوتتى.
القالى جيىندى اشقان ۇلتتىق كوميسسيانىڭ توراعاسى, ءمادەنيەت جانە سپورت ءمينيسترى ارىستانبەك مۇحامەدي ۇلى اتالمىش قۇرىلىمنىڭ 2015 جىلى اتقارعان ءىس-شارالارىنا قىسقاشا توقتالدى.
ونىڭ ايتۋىنشا, كوميسسيا تاراپىنان وسىناۋ بەدەلدى حالىقارالىق ۇيىمنىڭ اياسىندا ەلىمىز مۇددەلىلىك تانىتىپ وتىرعان جوبالاردى قولداۋ مەن ءجۇزەگە اسىرۋ باعىتىندا بىرقاتار جۇمىستار جۇرگىزىلگەن. بىلتىر قاراشا ايىندا ءوزىنىڭ فرانتسياعا رەسمي ساپارى كەزىندە ەلباسى ن.ءا.نازارباەۆ يۋنەسكو-نىڭ 70 جىلدىعىنا وراي وتكەن 38-ءشى سەسسياسىنا قاتىسقانى بەلگىلى. سوندا سويلەگەن سوزىندە مەملەكەت باسشىسى بىرىككەن ۇلتتار ۇيىمىنىڭ قۇرامىنداعى ىرگەلى ءبىر وتاۋ رەتىندە يۋنەسكو-نىڭ مادەني, تابيعي مۇرالاردى ساقتاۋ مەن ءبىلىم, عىلىم جانە كوممۋنيكاتسيا سالاسىندا ەلدەر اراسىنداعى ىنتىماقتاستىق پەن ىقپالداستىقتىڭ كەرەگەسىن كەڭەيتۋدە ايرىقشا ءرول اتقاراتىنىن اتاپ كورسەتتى. قازاقستان پرەزيدەنتىنىڭ مادەنيەتارالىق ديالوگتى دامىتۋ, بەيبىتشىلىك پەن تۇراقتىلىقتى قولداۋ جونىندەگى حالىقارالىق اكادەميا قۇرۋ ءجانە استانادا مادەنيەتتەردى جاقىنداستىرۋ ورتالىعىن قۇرۋ تۋرالى باستاماسىن مارتەبەلى كونفەرەنتسياعا قاتىسۋشىلار وتە جوعارى باعالادى.
كونفەرەنتسيا قورىتىندىسىندا قازاقستاننىڭ ينيتسياتيۆاسى بويىنشا يۋنەسكو-نىڭ 2016-2017 جىلدارداعى ايتۋلى داتالار كۇنتىزبەسىنە الاش ارداقتىسى ءاليحان بوكەيحاننىڭ 150 جىلدىعى, الماتى قالاسىنىڭ 1000 جىلدىعى, سونداي-اق, قوجا احمەت ءياساۋيدىڭ 850 جىلدىعى ەنگىزىلدى. وسىنىڭ ءوزى-اق تاۋەلسىز ەلىمىزدىڭ الەمدىك قاۋىمداستىقتا ويىپ الار ورنى بارىن بايقاتسا كەرەك.
وتىرىستا وزەكجاردى ويلارىن ورتاعا سالعان اتاقتى اقىنىمىز ولجاس سۇلەيمەنوۆ مىناۋ الاساپىرانعا تولى الماعايىپ ۋاقىتتا مادەنيەتتەر جاقىنداسۋىنا ايرىقشا ءمان بەرىلۋگە ءتيىس ەكەندىگىن تىلگە تيەك ەتتى. «مادەني بايلانىستار نەگە ءبىز قالاعان دەڭگەيگە جەتپەي تۇر؟ دۇنيەدە قاشان رۋحاني تۇسىنىستىك سالتانات قۇرادى؟ عالىمدارىمىز بەن قاپتاعان عىلىمي ورتالىقتاردىڭ مىنە وسى ماسەلەگە باس قاتىرۋلارى قاجەت. حريستيان ءدىنىنىڭ ەكى تارماعى سانالاتىن كاتوليكتەر مەن پراۆوسلاۆيە ءدىنى وكىلدەرىنىڭ حريستوستىڭ تۋعان كۇنى جونىندە ءبۇگىنگە دەيىن ورتاق شەشىمگە كەلە الماي جۇرگەندەرى كوپ نارسەنى اڭعارتادى. سوندىقتان, ريم پاپاسى مەن رەسەي پاتريارحىنىڭ كەزدەسۋىن جاقسىلىقتىڭ نىشانىنا بالايمىن», دەدى و.سۇلەيمەنوۆ.
باسقوسۋدا, سونداي-اق, يۋنەسكو-نىڭ الماتى قالاسىنداعى كلاستەرلىك بيۋروسى ديرەكتورىنىڭ مىندەتىن اتقارۋشى اندرەي شەۆەلەۆ, الەمدىك مۇرالار جونىندەگى ۇلتتىق كوميتەتتىڭ توراعاسى, اكادەميك كارل بايپاقوۆ, ماتەريالدىق ەمەس مادەني مۇرالاردى قورعاۋ ءجونىندەگى ۇلتتىق كوميتەتتىڭ ءتورايىمى حانزادا ەسەنوۆا جانە باسقالار يۋنەسكو ىستەرى بويىنشا وزدەرىنىڭ ۆەدومستۆولارىندا جۇزەگە اسىرىلعان شارۋالار جايىندا بايانداپ بەردى. ءماجىلىس سوڭىندا قر يۋنەسكو جانە يسەسكو ىستەرى جونىندەگى ۇلتتىق كوميسسيانىڭ باس حاتشىسى اسەل وتەگەنوۆا جينالعانداردى الداعى مەرزىمگە مەجەلەنگەن اۋقىمدى جوسپارلارمەن تانىستىردى.
تالعات باتىرحان,
«ەگەمەن قازاقستان»