الماتى قالاسىندا كاركەن احمەتوۆ اتىنداعى وليمپيادا رەزەرۆتەرىن دايىندايتىن رەسپۋبليكالىق مامانداندىرىلعان مەكتەپ-ينتەرنات-كوللەدجىنىڭ اۋماعىندا سالىنعان قازاقستانداعى تۇڭعىش دزيۋدو اكادەمياسى قولدانىسقا بەرىلدى.
اكادەميانىڭ اشىلۋ راسىمىنە مادەنيەت جانە سپورت ءمينيسترى ارىستانبەك مۇحامەدي ۇلى, الماتى قالاسىنىڭ اكىمى باۋىرجان بايبەك, حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر, قازاقستان دزيۋدو فەدەراتسياسىنىڭ پرەزيدەنتى كەڭەس راقىشەۆ جانە فەدەراتسيا وكىلدەرى, ەلگە تانىمال سپورتشىلار مەن جاس دزيۋدوشىلار قاتىستى.
اكادەميانىڭ سالتاناتتى اشىلۋى كەزىندە مادەنيەت جانە سپورت ءمينيسترى ارىستانبەك مۇحامەدي ۇلى مەن حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر جاڭا سپورت عيماراتىنىڭ تۇساۋىن كەستى.
بۇدان كەيىن شەتەلدىك قوناقتار مەن رەسمي وكىلدەر الەمدىك ستاندارتتارعا ساي ەتىپ سالىنعان جاڭا دزيۋدو اكادەمياسىن ارالاپ كوردى. اۋقىمدى 4 جۇپتىق تاتامي توسەلگەن كەڭ زالدا وتكەن جيىن بارىسىندا ارىستانبەك مۇحامەدي ۇلى, الماتى قالاسىنىڭ اكىمى باۋىرجان بايبەك جانە حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر ءسوز سويلەپ, يگى تىلەكتەرىن ءبىلدىردى.
– بۇل ءبىزدىڭ قالامىز ءۇشىن عانا ەمەس, بۇكىل مەملەكەتىمىزدىڭ مارتەبەسىن الەمدىك دەڭگەيدە پاش ەتەتىن ەلىمىزدىڭ ايتۋلى وقيعاسى. مۇنداي دزيۋدو اكادەمياسى قازاقستاندا تۇڭعىش رەت شاڭىراق كوتەرىپ وتىر. وتاندىق جاس سپورتشىلاردى ۇلكەن سپورتقا باستاپ, ەلىمىزدىڭ كوك تۋىن حالىقارالىق دودالاردا بيىك جەلبىرەتەتىن سپورت مەكتەبىن سالۋعا جەكە قاراجاتىنان 2,5 ميلليون دوللاردى بولگەن كەڭەس راقىشەۆكە العىسىمىز شەكسىز! ەلباسىمىز ناسيحات ەتكەن سالاماتتى ءومىر سالتىن دامىتۋ ماقساتىندا ەلىمىزدە بۇگىنگى تاڭدا مەملەكەت جانە جەكە تۇلعالار تاراپىنان بارلىق جاعداي جاسالىپ وتىرعاندىعى بارشامىزدى قۋانتادى, – دەدى قالا باسشىسى باۋىرجان بايبەك.
جيىن سوڭىندا قازاقستان دزيۋدو فەدەراتسياسىنىڭ پرەزيدەنتى, «قازكوممەرتسبانك» اق ديرەكتورلار كەڭەسىنىڭ ءتوراعاسى كەڭەس راقىشەۆ جاڭا دزيۋدو اكادەمياسىنىڭ سيمۆوليكالىق كىلتىن وسى مەكتەپ-ينتەرناتتىڭ تۇلەگى, 2015 جىلى دزيۋدودان كادەتتەر اراسىندا ساراەۆو قالاسىندا وتكەن الەم چەمپيوناتىنىڭ التىن جۇلدەگەرى ايبولات ىستىبايعا تاپسىردى. جيىن سوڭىندا تاتاميگە شىققان جاس دزيۋدوشىلار ونەرلەرىن پاش ەتتى.
ايتا كەتەلىك, دزيۋدو اكادەمياسى الەمدىك ستاندارتتارعا ساي ەتىپ سالىنعان. ونىڭ 4 جۇپ تاتامي توسەلگەن اۋقىمدى زالىندا ءبىر مەزەتتە 200 ادامعا دەيىن جاتتىعۋ جاساي الادى. سونىمەن قاتار, اكادەميا اۋماعىندا ترەناجەر زالى, 100 ادامعا شاقتالعان 2 جانە 4 ورىندىق جاتاقحانا, 100 ادامعا ارنالعان اسحانا, دارىگەر كابينەتى, باسسەين, ساۋنا, سپورتتىق كيىمدەردى جۋعا جانە سپورتشىلار دەمالۋعا ارناپ جابدىقتالعان بولمەلەر بار.
دزيۋدو اكادەمياسىن سالۋعا مەملەكەتتىك-جەكەمەنشىك سەرىكتەستىك نەگىزىندە شامامەن 4,5 ميلليوننان اسا اقش دوللارى جۇمسالعان. سونىڭ ىشىندە 2,5 ميلليون اقش دوللارى جەكە ينۆەستوردىڭ قاراجاتى.
قۇرىلىس جۇمىستارىن قازاقستان دزيۋدو فەدەراتسياسىنىڭ رەسمي دەمەۋشىسى SAT&Company كومپانياسى جۇرگىزدى. اكادەميا اۋماعى 1 گەكتارعا جۋىقتايدى. ال, جالپى اكادەميا عيماراتىنىڭ الاڭى 4,5-5 مىڭ شارشى مەتردى قۇرايدى. بولاشاقتا بۇل سپورتتىق بازادا تەك قازاقستاننىڭ ۇلتتىق قۇرامالارى عانا ەمەس, شەت ەلدەردىڭ ۇلتتىق قۇراما كوماندالارى دا كەلىپ, وسى جەردە تولىققاندى وقۋ-جاتتىعۋ جيىندارىن وتكىزۋدى ۇيعارىپ وتىر. سونىمەن قاتار, مۇندا بىرلەسكەن وقۋ-جاتتىعۋ جيىندارى, سەمينارلار ۇيىمداستىرىلادى. سونداي-اق اكادەمياداعى وقۋ-جاتتىعۋ جەتكىنشەكتەر ءۇشىن تەگىن بولادى. بولاشاقتا بۇل مەكەمەگە حالىقارالىق مارتەبە بەرىلۋى دە مۇمكىن.
قانات ەسكەندىر,
«ەگەمەن قازاقستان»
الماتى