بەكبولات تىلەۋحانوۆ: «جەر - حالىقتىڭ اسىراۋشىسى»

استانا. 14 مامىر. بۇگىن ۇلتتىق مۋزەيدە ءوتىپ جاتقان جەر رەفورماسى جونىندەگى كوميسسيا تىرىسىندا پارلامەنت ءماجىلىسىنىڭ دەپۋتاتى بەكبولات تىلەۋحانوۆ جەر ماسەلەسىنە بايلانىستى ءوز ويىن ءبىلدىرىپ, جەر حالىقتىڭ باستى اسىراۋشىسى دەگەندى ايتتى. بۇل تۋرالى egemen.kz ءتىلشىسى حابارلادى. جيىندا ءسوز العان بەكبولات تىلەۋحانوۆ جەر رەفورماسىن قايتا قاراۋدا ءبىز حالىقتىڭ مۇددەسىن قورعايتىن تۇسىن باستى نازارعا الۋىمىز كەرەك دەدى. سونداي-اق, ول: «اعايىندار, جەر - ءبىزدىڭ باستى بايلىعىمىز, اسىراۋشىمىز, بابالارىمىزدان قالعان مۇرا. سوندىقتان دا داۋعا بايلانىستى داۋرىعىپ, بيلىككە كىنا ارتپاۋىمىز كەرەك. ەلباسىنىڭ تاپسىرماسىنا سايكەس ارنايى كوميسسيا قۇرىلدى. ەندى ءبىز قازاق دالاسىنىڭ بولاشاعى ءۇشىن ەگجەي-تەگجەي جەر كودەكسىن قايتا قاراپ, جۇمىس جاسايمىز. جەردى قورعاۋ, قاستەرلەۋ ءبارىمىزدىڭ ماقسات-مۇراتىمىز», – دەدى. سونىمەن قاتار, ماجىلىسمەن: «ەلدىڭ جەرگە دەگەن ماحابباتى, بۇلكىلدەگەن جۇرەگى, قامقورلىعى قازاق دەگەن ۇلتتىڭ قايسار ەكەنىن تاعى ءبىر كورسەتتى. الايدا, جەر ساتىلادى ەكەن, قىتايلىقتار قاپتايدى دەگەن ءسوز جالعان. بۇل ءتيىستى مينيسترلىكتەردىڭ, ءبىزدىڭ دۇرىس جۇمىس جاساي الماعانىمىزدان ورىن الدى. حالىق نارازىلىق تانىتتى. اينالايىن اعايىن, جەر ساتىلمايدى, تەك وتاندىق كاسىپكەرلەر جەر-اناعا اقشا قۇيىپ, تۇلەتىپ, ەلدىڭ ەكونوميكاسىن كوتەرە الادى», – دەدى. تالعات رايىمبەكوۆ. دەرەك, فوتو: egemen.kz.