الەم تىنىشتىقتى قالايدى

كەشە استاناداعى ۇلتتىق مۋزەيدە مەملەكەت باسشىسى نۇرسۇلتان نازارباەۆتىڭ «الەم. ءححى عاسىر» مانيفەسىنە ارنالعان «قازاقستان: ۇلت قاۋىپسىزدىگىنە تونگەن جاڭا سىن-قاتەرلەر» تاقىرىبىندا دوڭگەلەك ۇستەل ءوتتى. ەلىمىزدىڭ جاس تاريحشىلارى, عالىمدار, ساياساتتانۋشىلار مەن الەۋمەتتانۋشىلار جانە ستۋدەنتتەر قاتىسقان دوڭگەلەك ۇستەل بارىسىندا «الەم. ءححى عاسىر» مانيفەسى كەڭىنەن تالقىلانىپ, ونىڭ تۇراقتىلىق پەن ورنىقتى دامۋداعى ءرولى ءسوز بولدى. سونداي-اق, باسقوسۋدا وتكەن عاسىرلارداعى سۇراپىل سوعىستاردىڭ ءالى كۇنگە تيگىزىپ كەلە جاتقان زارداپتارى تۋرالى ايتىلدى. ۇلتتىق مۋزەيدىڭ «قازاقستان تاريحى» ءبولىمىنىڭ جەتەكشىسى شىنار ۋايسوۆا ءوز كەزەگىندە «الەم. ءححى عاسىر» مانيفەسىنىڭ ءمان-ماڭىزىن ايتا كەلىپ, قازاقستاننىڭ يادرولىق قاۋىپسىزدىك سالاسىنداعى كوشباسشىلىعىن ءسوز ەتتى. «الەم. ءححى عاسىر» مانيفەسى ارقىلى ەلباسى نۇرسۇلتان نازارباەۆ جەر بەتىندەگى بەيبىتشىلىكتى ساقتايتىن قۇجات ۇسىنىپ وتىر. قازاقستان – ادامزات تاريحىندا يادرولىق قارۋدان رەسمي باس تارتقان العاشقى مەملەكەت, سەمەي پوليگونىن جاپقان ەل. يادرولىق قارۋدى جەردە دە, سۋدا دا, اۋادا دا پايدالانۋعا بولمايدى. ەلباسى مانيفەسى – تەك يادرولىق قارۋعا ەمەس, جەر بەتىندەگى كەز كەلگەن سوعىس تۇرىنە قارسى ۇندەۋ», – دەدى ش.ۋايسوۆا. دوڭگەلەك ۇستەلگە قاتىسقان ساياساتتانۋشى, فيلولوگيا عىلىمدارىنىڭ كانديداتى, ساياساتتانۋ دوكتورى (PhD) مۇحيت-ارداگەر سىدىقنازاروۆ وتكەن عاسىرلارداعى سۇراپىل سوعىستاردىڭ ادامزاتقا الىپ كەلگەن اۋىرتپالىعى جونىندە كەڭىنەن اڭگىمەلەپ بەردى. «ەگەر ءبىرىنشى دۇنيەجۇزىلىك سوعىستاعى, ودان كەيىنگى اشارشىلىق پەن قۋعىن-سۇرگىن جىلدارىنداعى, ۇلى وتان سوعىسىنداعى ادام شىعىنىن ەسەپتەسەك, جان اۋىرادى. قازاقستان وسىناۋ زۇلماتتى جىلداردى باسىنان وتكەرمەگەندە قازىر ءبىزدىڭ حالقىمىزدىڭ سانى 80 ميلليونعا جەتەتىن ەدى», – دەدى سپيكەر. سونداي-اق, ول بەيبىت ءومىر باردا, ونىڭ قادىرى بىلىنبەيتىنىن ايتىپ ءوتتى. دوڭگەلەك ۇستەل ساتىندە تاريح عىلىمدارىنىڭ دوكتورى, قازاقستان باس رەداكتورلار كلۋبىنىڭ مۇشەسى ۆيدادي سالاحوۆ, ساياسي شولۋشى دامير قاسىموۆ, اۋعان سوعىسى ارداگەرلەر كەڭەسى توراعاسىنىڭ ورىنباسارى جانات بايجۇمانوۆ جانە باسقالار «الەم. ءححى عاسىر» مانيفەسى جونىندە وزدەرىنىڭ ورنىقتى پىكىرلەرىن جەتكىزدى. ولاردىڭ سوزدەرىنە قاراعاندا, الەمدىك يادرولىق قاۋىپسىزدىكتى نىعايتۋ تۇرعىسىنداعى قازاقستاننىڭ كوتەرگەن باستامالارى الەم جۇرتشىلىعى تاراپىنان قىزۋ قولداۋ تاۋىپ وتىر. بۇدان بولەك, ولار مانيفەستىڭ بۇۇ-نىڭ رەسمي قۇجاتى رەتىندە قابىلدانعانىنا ەكپىن بەردى. جولدىباي بازار, «ەگەمەن قازاقستان»